സുഖമുളള ജീവിതമല്ല പോലീസുകാരുടേത്. എപ്പോഴാണ് ഏതു വഴിക്കാണു പ്രശ്‌നങ്ങള്‍ തേടിയെത്തുന്നത് എന്ന് ഒരു ധാരണയും ഉണ്ടാകില്ല. മധ്യപ്രദേശില്‍ അടുത്തിടെ നടന്ന ഈ സംഭവം, ഏതൊരു വ്യക്തിയെക്കൊണ്ടും അങ്ങനെ ചിന്തിപ്പിച്ചു പോകും. ബോംബ് ഭീഷണിയെത്തുടര്‍ന്ന് ഒരു പ്രദേശത്തുനടത്തിയ തിരച്ചിലിനൊടുവിലാണ് ബോംബ് കണ്ടെടുക്കുന്നത്. 12 ഇഞ്ച് നീളവും ഏകദേശം 10 കിലോ ഭാരവും ഉള്ള ബോംബ് കണ്ടെടുത്തതാകട്ടെ ഗ്രാമത്തിലെ ഒരു സ്‌കൂളിനടുത്തു നിന്നും. ഏകദേശം 400ല്‍പരം കുട്ടികള്‍ പഠിക്കുന്ന സ്‌കൂളിന് അരികില്‍ വച്ച് ആ ബോംബ് നിര്‍വീര്യമാക്കുക അസാധ്യം. എപ്പോള്‍ പൊട്ടും എന്നുറപ്പില്ലാത്ത ആ ബോംബ് മുന്നില്‍ വച്ചുകൊണ്ട് ഒരു ഭാഗ്യപരീക്ഷണത്തിനു നില്‍ക്കാന്‍ കോണ്‍സ്റ്റബിള്‍ അഭിഷേക് പട്ടേലും കൂട്ടരും തയ്യാറല്ലായിരുന്നു.

രണ്ടാമതൊന്ന് ആലോചിക്കാന്‍ നില്‍ക്കാതെ അഭിഷേക് പട്ടേല്‍ ബോംബും കയ്യില്‍ എടുത്ത് ഓടി. ദൂരെ തുറസ്സായ സ്ഥലത്തു കൊണ്ടുപോയി ബോംബ് നിര്‍വീര്യമാക്കുകയായിരുന്നു ലക്ഷ്യം. 500 മീറ്റര്‍ അകലെവരെ ബോംബിന്റെ പ്രസരണം എത്തുന്നതിനാല്‍ അതിനും അകലെയായി കൊണ്ടുപോയി ബോംബ് നിര്‍വീര്യമാക്കി കുട്ടികളെ രക്ഷിക്കുക എന്നതായിരുന്നു അഭിഷേകിന്റെ ലക്ഷ്യം. എന്തായാലും ലക്ഷ്യത്തില്‍ വിജയിച്ച അഭിഷേക് പട്ടേല്‍ വിദ്യാര്‍ഥികളെ ബാധിക്കാത്ത രീതിയില്‍ തന്നെ ബോംബ് നിര്‍വീര്യമാക്കി. ജീവന്‍ പണയപ്പെടുത്തി കുട്ടികളുടെ ജീവന്‍ രക്ഷിച്ച അഭിഷേകിനും സംഘങ്ങങ്ങള്‍ക്കും പോലീസ് സേന പ്രത്യേക പാരിതോഷികം ഏര്‍പ്പാടാക്കിയിട്ടുണ്ട്.