അജ്മാനിൽ വാഷിംഗ് മെഷീനില്‍ നിന്ന്‍ തീ പടര്‍ന്ന് ഒൻപതോളം പേർക്ക് പരിക്കേറ്റതായി റിപ്പോർട്ടുകൾ. തിങ്കളാഴ്ച രാവിലെ അല്‍ നൂയിമിയയിലെ ഒരു റെസിഡന്‍ഷ്യല്‍ കെട്ടിടത്തിലായിരുന്നു തീപിടിത്തമുണ്ടായത്.

പോലീസ് ഓപ്പറേഷന്‍ സെന്റര്‍ മാനേജ്മെന്റിന്റെ ഡെപ്യൂട്ടി ഡയറക്ടര്‍ ലെഫ്റ്റനന്റ് കേണല്‍ റൈഡ് ഒബൈദ് അല്‍ സബാബി ആണ് ഇക്കാര്യം വ്യക്തമാക്കിയത്. ഒരു കുടുംബത്തിലെ പിതാവിനെയും മാതാവിനെയും 5 വയസ്സുള്ള മകനെയും അതീവ ഗുരുതരാവസ്ഥയില്‍ ഷാര്‍ജയിലെ അല്‍ ഖാസിമി ആശുപത്രിയില്‍ എത്തിച്ചു.

അഗ്നിശമനസേന സ്ഥലത്തെത്തി തീയണച്ചതിന് ശേഷം കെട്ടിടത്തിലുണ്ടായിരിക്കുന്നവരെ മറ്റൊരു സ്ഥലത്തേക്ക് മാറ്റിയെന്ന് അധികൃതര്‍ പറഞ്ഞു. വൈദ്യുതി ഉപകരണങ്ങളുടെ ഉചിതമായ അറ്റകുറ്റപ്പണികള്‍, സുരക്ഷ എന്നിവ നിര്‍ബന്ധമായും പരിശോധിക്കണമെന്ന് അധികൃതര്‍ നിര്‍ദ്ദേശം നല്‍കി.