തൃശൂർ പെരുമ്പിലാവ് - കുറ്റിപ്പുറം സംസ്ഥാനപാത കടവല്ലൂർ അമ്പലം സ്റ്റോപ്പിന് സമീപം ബൈക്കും ടൂറിസ്റ്റ് ബസും കൂട്ടിയിടിച്ചുണ്ടായ അപകടത്തിൽ ബൈക്കിൽ പോയിരുന്ന കൊച്ചി എയർപോർട്ട് ജീവനക്കാരനായ യുവാവിന് ദാരുണാന്ത്യം.

കുറ്റിപ്പുറം പഴവൂർ ചക്കുവളപ്പിൽ സുധീറിന്റെ മകൻ സി വി ജിതിൻ (22) ആണ് മരിച്ചത്. ഞായറാഴ്ച രാത്രി 7:20നായിരുന്നു അപകടം നടന്നത്. കുന്നംകുളം ഭാഗത്തുനിന്ന് കുറ്റിപ്പുറം ഭാഗത്തേക്ക് പോവുകയായിരുന്ന ടൂറിസ്റ്റ് ബസുമായി മറ്റൊരു വാഹനത്തെ മറികടന്നെത്തിയ ബുള്ളറ്റ്‌ ബൈക്ക് കൂട്ടിയിടിക്കുകയായിരുന്നു.

ഇടിയുടെ ആഘാതത്തിൽ ജിതിൻ സംഭവസ്ഥലത്തുവെച്ചുതന്നെ മരിച്ചു. മൃതദേഹം പെരുമ്പിലാവിലെ സ്വകാര്യ ആശുപത്രിയിൽ സൂക്ഷിച്ചിരിക്കുകയാണ്. കുന്നംകുളം പൊലീസ് സ്ഥലത്തെത്തി തുടർനടപടികൾ സ്വീകരിക്കുകയും ചെയ്തു. അപകടത്തിൽ ടൂറിസ്റ്റ് ബസിനും ബൈക്കിനും കാര്യമായ കേടുപാടുകൾ സംഭവിച്ചിട്ടുണ്ട്.

അപകടത്തെ തുടർന്ന് മേഖലയിൽ ഭാഗികമായി ഗതാഗതം തടസ്സപ്പെട്ടു. കൊച്ചി എയർപോർട്ടിൽ ജീവനക്കാരനായ ജിതിൻ എയർ പോർട്ടിലേക്ക് പോകുംവഴിയാണ് അപകടമുണ്ടായത്. മാതാവ് നിഷ. രണ്ട് സഹോദരന്മാരുണ്ട്.