ഇന്നലെ രാവിലെ മക്കയിലുണ്ടായ വാഹനാപകടത്തിൽ ഒരാൾ മരിച്ചതായി റിപ്പോർട്ടുകൾ. അല്ലീത്​, ഗമീഖ റോഡിൽ സ്​കൂൾ അധ്യാപകരെ കൊണ്ടുപോകുന്ന വാനും കാറും തമ്മിൽ കൂട്ടിയിടിക്കുകയായിരുന്നുവെന്ന് അധികൃതർ വ്യക്തമാക്കി. അപകടത്തിൽ വനിലുണ്ടായിരുന്ന അധ്യാപികയാണ് മരിച്ചത്.

അപകടത്തിൽ ഗുരുതരമായി പരിക്കേറ്റ അധ്യാപികയെ ആശുപത്രിയിലെത്തിച്ചെങ്കിലും പിന്നീട്​ മരിച്ചു. വാഹനത്തിനുള്ളിൽ കുടുങ്ങിയ ഡ്രൈവറെ സിവിൽ ഡിഫൻസ്​ എത്തിയാണ്​ പുറത്തെടുത്തത്​. അതേസമയം അപകടത്തിൽ ഏഴോളം പേർക്ക് പരിക്കുകൾ പറ്റിയിട്ടുണ്ട്. ഇതിൽ രണ്ട്​ പേരുടെ പരിക്ക്​ നിസ്സാരമാണ്. പരിക്കേറ്റവരെ അല്ലീത്​ ജനറൽ ആശുപത്രിയിൽ പ്രവേശിപ്പിച്ചു.