തന്നെ തടവിലാക്കിയിരിക്കുകയാണെന്നും തന്റെ ആരോഗ്യസ്ഥിതി അതീവ ഗുരുതരമായ അവസ്ഥയിലാണെന്നും പറഞ്ഞുകൊണ്ട് രംഗത്തുവന്ന് സൗദി രാജകുമാരി ബസ്മ ബിന്‍ത് സൗദ്. തന്നെ തടവിലാക്കിയിരിക്കുന്ന അല്‍ ഹൈര്‍ ജയിലില്‍നിന്നും മോചിപ്പിക്കണമെന്ന് സൗദി രാജാവിനോടും കിരീടാവകാശിയായ മുഹമ്മദ് ബിന്‍ സല്‍മാനോടും ട്വിറ്റര്‍ വഴി രാജകുമാരി അഭ്യര്‍ത്ഥന നടത്തിയിട്ടുമുണ്ട്.

തന്റെ മേല്‍ ചുമത്തിയിരിക്കുന്ന കേസില്‍ പുനഃപരിശോധന നടത്തണമെന്നും താന്‍ തെറ്റൊന്നും ചെയ്യാത്തതിനാല്‍ തടവില്‍ നിന്നും മോചിപ്പിക്കണമെന്നുമാണ് 56കാരിയായ രാജകുമാരിയുടെ അഭ്യര്‍ത്ഥന. രണ്ട് ട്വീറ്റുകളിലൂടെയാണ് തന്റെ ഇപ്പോഴത്തെ അവസ്ഥ ബസ്മ വ്യക്തമാക്കിയത്. തനിക്ക് മരുന്നുകളൊന്നും ലഭിക്കുന്നില്ലെന്നും അവര്‍ ചൂണ്ടിക്കാണിക്കുന്നു.

എന്നാല്‍ ജയിലില്‍ കഴിയുന്ന ബസ്മയ്ക്ക് ട്വീറ്റ് ചെയ്യാന്‍ കഴിഞ്ഞതെങ്ങനെയെന്ന് വ്യക്തമല്ല. 1953 മുതല്‍ 1964 മുതല്‍ സൗദി ഭരിച്ചിരുന്ന സൗദ് രാജാവിന്റെ ഏറ്റവും ഇളയ മകളാണ് ബസ്മ. ഭരണരീതികള്‍ക്കും സംവിധാനത്തിനും മാറ്റം വരണമെന്ന് ആഗ്രഹിച്ച രാജകുമാരി പേരുകേട്ട മനുഷ്യാവകാശ പ്രവര്‍ത്തക കൂടിയായിരുന്നു.രാജ്യം വിട്ട് ബ്രിട്ടണിലേക്ക് പോകാന്‍ ബസ്മ ശ്രമിച്ചതിനാണ് അവരെ തടവിലാക്കിയതെന്നാണ് വിവരം. കഴിഞ്ഞ വര്‍ഷമാണ് ബസ്മയെ അവരുടെ മകളോടൊപ്പം വീട്ടുതടങ്കലില്‍ ആക്കിയെന്ന വിവരം ലോകം അറിഞ്ഞത്. പിന്നീട് ഏറെ കാലത്തേക്ക് ബസ്മയെ കുറിച്ചുള്ള വിവരമൊന്നും പുറത്തുവന്നിരുന്നില്ല. ഇങ്ങനെയൊരു സാഹചര്യത്തിലാണ് ഇപ്പോള്‍ ട്വിറ്റര്‍ വഴി രാജകുമാരി രംഗത്തെത്തിയിരിക്കുന്നത്. ജയിലില്‍ രാജകുമാരിയോടൊപ്പം അവരുടെ മകളും കഴിയുന്നുണ്ട്.

55 കാരിയായ ബസ്മ രാജകുമാരി സൗദി അറേബ്യയുടെ രണ്ടാമത്തെ അധികാരിയായിരുന്ന സൗദ് ബിന്‍ അബ്ദുല്‍ അസീസ് അല്‍-സൗദിന്റെ മകളാണ്. സൗദി രാജകുടുംബത്തിലെ രാഷ്ട്രീയ ശബ്ദമായിരുന്നു ബസ്മ. 2012 ല്‍ ദ ഇന്‍ഡിപെന്റഡിനു നല്‍കിയ അഭിമുഖത്തില്‍ സൗദി ഭരണകൂടം മതപരമായ വേര്‍തിരിവുകള്‍ സൃഷ്ടിക്കുന്നതിനെതിരെയും സൗദിയിലെ സാമ്പത്തിക അസമത്വത്തിനെതിരെയും വിമര്‍ശനമുന്നയിച്ചിരുന്നു.

2018 ജനുവരിയില്‍ ബി.ബി.സി അറബിക്കിന് നല്‍കിയ അഭിമുഖത്തില്‍ യെമനില്‍ സൗദി സേന നടത്തുന്ന ആക്രമണങ്ങള്‍ അവസാനിപ്പിക്കണമെന്നും ഇവര്‍ ആവശ്യപ്പെട്ടിരുന്നു. ഇതിനു ശേഷം മുഖ്യധാരാ മാധ്യമങ്ങളില്‍ ഇവരെ കണ്ടിട്ടില്ല. ഇവരുടെ അഭിഭാഷകന്‍ ലിയോനാര്‍ഡ് ബെന്നറ്റ് നല്‍കുന്ന വിവരപ്രകാരം ചികിത്സക്കായി സ്വിറ്റ്സര്‍ലന്റിലേക്ക് പോവുന്നതിനിടെയാണ് ബസ്മയെ അറസ്റ്റ് ചെയ്തത്. നേരത്തെ സൗദി രാജകുടുംബത്തിലെ ഇരുപതോളം അംഗങ്ങളെ മുഹമ്മദ് ബിന്‍ സല്‍മാന്‍ അറസ്റ്റ് ചെയ്തതായി നേരത്തെ മിഡില്‍ ഈസ്റ്റ് ഐ റിപ്പോര്‍ട്ട് ചെയ്തിരുന്നു. നവംബറില്‍ നടക്കുന്ന ജി20 ഉച്ചകോടിക്കു മുമ്പായി അധികാരത്തിലേറാനുള്ള സല്‍മാന്‍ രാജകുമാരന്റെ നീക്കത്തിന്റെ ഭാഗമാണിതെന്നായിരുന്നു റിപ്പോര്‍ട്ട്.