ഈ വിമാനത്താവളങ്ങളിൽ ഇറങ്ങാൻ നിർബന്ധിത ഐ.സി.എ ട്രാവൽ പെർമിറ്റ് ആവശ്യമില്ല; മടക്കയാത്ര വൈകുന്ന പ്രവാസികൾക്ക് ഏറെ ആശ്വാസം പകരുന്ന നടപടിയുമായി അബൂദബി അന്താരാഷ്ട്ര വിമാനത്താവളം അധികൃതർ
കൊറോണ വ്യാപനത്തിന്റെ തീവ്രത കുറഞ്ഞ നാളുകളിലേക്ക് കടക്കുന്ന യുഎഇ ഇപ്പോഴിതാ എല്ലാ വിസക്കാരെയും തിരിച്ചുവിളിക്കുകയുണ്ടായി. ഇതേതുടർന്ന് യു.എ.ഇ റസിഡൻസി വിസയുള്ളവർക്ക് അബൂദബി, അൽഐൻ വിമാനത്താവളങ്ങളിൽ ഇറങ്ങാൻ നിർബന്ധിത ഐ.സി.എ ട്രാവൽ പെർമിറ്റ് ആവശ്യമില്ലെന്ന് അബൂദബി അന്താരാഷ്ട്ര വിമാനത്താവളം അധികൃതർ അറിയിച്ചിരിക്കുകയാണ്. ഐ.സി.എ അനുമതി ലഭിക്കാത്തതിനാൽ തന്നെ മടക്കയാത്ര വൈകുന്ന പ്രവാസികൾക്ക് ഏറെ ആശ്വാസം പകരുന്ന നടപടിയാണിത് എന്നാണ് ലഭ്യമാകുന്ന വിവരം.
അതേസമയം പുതുക്കിയ യാത്രാനിയമങ്ങൾ ചൊവ്വാഴ്ച മുതൽ പ്രാബല്യത്തിൽ വരുന്നതാണ്. വിമാനക്കമ്പനികൾക്ക് അയച്ച ഔദ്യോഗിക വിജ്ഞാപനത്തിലാണ് ഇക്കാര്യം വ്യക്തമാക്കുന്നത്. ഇതുസംബന്ധിച്ച ഔദ്യോഗിക പ്രഖ്യാപനം ഉടൻ ഉണ്ടായേക്കുമെന്നും അധികൃതർ വ്യക്തമാക്കി. പാക്കിസ്ഥാൻ ഇൻറർനാഷണൽ എയർലൈൻസ് (പി.ഐ.എ), ടർക്കിഷ് എയർലൈൻ, മിഡിൽ ഈസ്റ്റ് എയർലൈൻ എന്നിവയുടെ ട്രാവൽ ഏജൻസികൾക്ക് ഇതുസംബന്ധിച്ച ഔദ്യോഗിക അറിയിപ്പ് ലഭിച്ചുകഴിഞ്ഞു.
എന്നാൽ, എയർ ഇന്ത്യക്ക് ഇതുവരെ അറിയിപ്പ് ലഭിച്ചിട്ടില്ല എന്നാണ് ലഭ്യമാകുന്ന വിവരം. അംഗീകൃത ലബോറട്ടറിയിൽ നിന്നുള്ള കോവിഡ് പരിശോധന ഫലം വേണമെന്ന നിബന്ധനക്ക് മാറ്റമില്ലാതെ തന്നെ തുടരുകയാണ്. ആയതിനാൽ തന്നെ ഔദ്യോഗികമായി ഒരു പ്രഖ്യാപനം ഉണ്ടാകുന്നതുവരെ യാത്രയ്ക്കായി ഒരുങ്ങരുതെന്ന് എയർ ഇന്ത്യ അറിയിക്കുകയുണ്ടായി.
https://www.facebook.com/Malayalivartha