കൊറോണ വ്യാപനം ഉരുവാക്കിയ പ്രതിസന്ധിയിൽ ദുരിതമനുഭവിച്ചവർക്ക് കൈത്താങ്ങായി മാറിയ ഖത്തർ ഇൻകാസിന്റെ തലശ്ശേരി മണ്ഡലം പ്രസിഡന്റും സാമൂഹിക പ്രവർത്തകനുമായ കണ്ണൂർ കതിരൂർ സ്വദേശി അബ്ദു റഹിം എടത്തിൽ (47) കോവിഡ് -19 ബാധിച്ചു മരിച്ചു. കോവിഡ് -19 സ്ഥിരീകരിച്ചതിനെ തുടർന്ന് ബിൻ മഹ്മൂദിലെ സർക്കാർ ഐസലേഷൻ കേന്ദ്രത്തിൽ കഴിയവേയായിരുന്നു മരണം. ചികിത്സയിലിരിക്കെ ശ്വാസ തടസ്സം ഗുരുതരമായതിനെ തുടർന്ന് ഹമദ് ആശുപതിയിലെ തീവ്ര പരിചരണ വിഭാഗത്തിലേക്ക് മാറ്റിയിരുന്നു.

കോവിഡ് -19 ദുരിതബാധിതർക്ക് ആവശ്യമായ സഹായങ്ങൾ എത്തിക്കുന്നതിൽ സജീവമായി പ്രവർത്തിക്കുന്നതിനിടെയാണ് കോവിഡ് ബാധിച്ചത് എന്നാണ് ലഭ്യമാകുന്ന വിവരം. ദോഹയിലെ അൽ സലാം കമ്പനിയിലെ ജീവനക്കാരനാണ് ഇദ്ദേഹം. റെയ്സ ആണ് ഭാര്യ. അബ്‌നർ, അൽവിത, ആദിബ എന്നിവർ മക്കൾ ആണ്. ഖത്തർ കെഎം സി സി അൽ ഇഹ്‌സാൻ മയ്യിത്ത് പരിപാലന കമ്മിറ്റിയുടെ നേതൃത്വത്തിൽ കോവിഡ് പ്രോട്ടോകോൾ പ്രകാരം ദോഹയിൽ ഖബറടക്കുകയും ചെയ്യും.