ഒരു പ്രാവ് കൂട് കൂട്ടിയത് ബെൻസ് കാറിൽ. അതും ദുബായ് കിരീടാവകാശി ഷെയ്ഖ് ഹംദാന്റെ കാറിൽ. ഈ വാർത്ത കുറച്ചുനാളുകൾക്ക് മുന്നേ തന്നെ മാധ്യമങ്ങളിൽ മാത്രമല്ല മനുഷ്യരുടെ മനസിലും നിറഞ്ഞതാണ്. ഇപ്പോൾ ഇതാ പ്രാവിൻന്റെ മുട്ടകള്‍ വിരിഞ്ഞതിന്റെ വിഡിയോ പുറത്തു വിട്ടിരിക്കുകയാണ് ഹംദാൻ. അത്രമേൽ തനിക്ക് പ്രിയപ്പെട്ട കാറിനെക്കാൾ വലുത് ആ ജീവനുകളാണെന്ന് കാണിക്കുകയാണ് ഹംദാൻ. അതോടൊപ്പം തന്നെ പ്രാവ് മുട്ടയിട്ടതിനാല്‍ കുറച്ചു നാളുകളായി കാര്‍ ഓടിക്കാതെ മാറ്റി വച്ചിരിക്കുകയാണ് അദ്ദേഹം.

ദുബായ് കിരീടാവകാശിയും എക്‌സിക്യൂട്ടീവ്‌ കൗണ്‍സില്‍ ചെയര്‍മാനുമായ ഷെയ്ഖ് ഹംദാന്‍ ബിന്‍ മുഹമ്മദ് ബിന്‍ റാഷിദ് അല്‍ മക്തൂമിന്റെ ബെന്‍സ് കാറിന്റെ മുന്‍ വശത്തു കുറച്ചു ദിവസങ്ങള്‍ക്ക് മുന്‍പാണ് പ്രാവ് കൂടുകൂട്ടി മുട്ടയിട്ടത്. ആയതിനാൽ തന്നെ ആരും കാറിന്റെ അടുത്തേക്ക് പോകാതിരിക്കാന്‍ അദ്ദേഹം പ്രത്യേക കയറു കൊണ്ട് വേലി കെട്ടിയാണ് അത് സംരക്ഷിച്ചത് തന്നെ. ആ കാരുണ്യത്തണലിൽ മുട്ടകൾ വിരിഞ്ഞു. രണ്ട് പ്രാവിൻ കുഞ്ഞുങ്ങൾ കൂടി കൂട്ടിലെത്തിയിരിക്കുകയാണ്.

‘ചില സമയങ്ങളില്‍ ചെറിയ കാര്യങ്ങള്‍ പോലും വിലമതിക്കാനാകാത്തതാണ്’. വിഡിയോ സോഷ്യൽ മീഡിയയിൽ പങ്കുവച്ച് ഹംദാൻ കുറിച്ച വരികൾ ഇതാണ്. പ്രാവിന്റെ മുട്ടയ്ക്ക് കരുതലായി കാര്‍ ഉപയോഗിക്കാതെ മാറ്റി വയ്ക്കുകയാണെന്ന് ഹംദാന്‍ നേരത്തെ തന്നെ വീഡിയോ ട്വീറ്റ് ചെയ്തിരുന്നു. ഹംദാന്റെ സഹജീവികളോടുള്ള കരുതലിനെ പ്രകീർത്തിക്കുകയാണ് ഇപ്പോൾ ലോകം മുഴുവനും.