പ്രവാസികൾക്ക് കൂടുതൽ ആത്മവിശ്വാസം നൽകിക്കൊണ്ട് ഗൾഫ് രാഷ്ട്രങ്ങൾ കുതിച്ചുയരുകയാണ്. കൊറോണ വ്യാപനം മൂലം തൊഴിൽ നഷ്ടപ്പെട്ടവർക്ക് ആശ്വാസവാർത്ത. അടുത്ത ആറു​ മാസത്തിനിടെ 6000 ജീവനക്കാരെ റിക്രൂട്ട്​ ചെയ്യുമെന്ന്​ വ്യക്തമാക്കി ദുബായുടെ ഔദ്യോഗിക എയര്‍ലൈനായ എമിറേറ്റ്​സ് രംഗത്ത് എത്തിയിരിക്കുകയാണ്. യാത്രക്കാരുടെ എണ്ണം പഴയ നിലയിലേക്ക്​ തിരിച്ചെത്തിയതോടെയാണ്​ കൂടുതല്‍ ജീവനക്കാരെ നിയമിക്കാനായി കമ്പനി ഒരുങ്ങുന്നത്​.

പൈലറ്റ്​, കാബിന്‍ ക്രൂ, എന്‍ജിനീയറിങ്​ സ്​പെഷലിസ്​റ്റ്​, മറ്റ്​ ജീവനക്കാര്‍ എന്നിവരെ നിയമിക്കാനാണ്​ പദ്ധതി. എമിറേറ്റ്​സി​ന്റെ 90 ശതമാനം സര്‍വിസുകളും പുനരാരംഭിച്ചതായി എമിറേറ്റ്​സ്​ ചെയര്‍മാന്‍ ശൈഖ്​ അഹ്​മദ്​ ബിന്‍ സഈദ്​ ആല്‍ മക്​തൂം വ്യക്തമാക്കി. മഹാമാരിക്ക്​ മുമ്ബുണ്ടായിരുന്ന ശേഷിയുടെ 70 ശതമാനം യാത്രക്കാരും ഈ വര്‍ഷം അവസാനത്തോടെ തിരികെയെത്തുന്നതാണ്.

ഇത്തരത്തിൽ 6000 പുതിയ ജീവനക്കാരെ നിയമിക്കുന്നത്​ സാമ്പത്തിക സ്​ഥിതിക്ക്​ കരുത്ത്​ പകരുന്നതിനൊപ്പം തന്നെ പുത്തൻ അവസരങ്ങളും സൃഷ്​ടിക്കുമെന്നും അദ്ദേഹം ചൂണ്ടിക്കാണിച്ചു. കോവിഡ്​ രൂക്ഷമായ സമയത്ത്​ എമിറേറ്റ്​സ്​ ഉള്‍പ്പെടെയുള്ള എയര്‍ലൈനുകള്‍ ചെലവ്​ ചുരുക്കുന്നതിന്റെ ഭാഗമായി ജീവനക്കാരുടെ എണ്ണം കുറക്കുകയും ശമ്പളം വെട്ടിക്കുറക്കുകയും ചെയ്​തിരുന്നു. എന്നാൽ സര്‍വിസുകള്‍ പഴയനിലയിലേക്ക്​ തിരികെയെത്തിയതോടെ ജീവനക്കാരെ തിരിച്ചുവിളിക്കുകയും ശമ്പളം പുനഃസ്​ഥാപിക്കുകയും ചെയ്തിട്ടുണ്ട്. ഇതിനു പിന്നാലെയാണ്​​ വീണ്ടും ജീവനക്കാരെ നിയമിക്കാന്‍ കമ്പനി ഒരുങ്ങുന്നത്​. സെപ്​റ്റംബറില്‍ 3000 കാബിന്‍ ക്രൂവിനെയും 500 എയര്‍പോര്‍ട്ട്​ സര്‍വിസ്​ ജീവനക്കാരെയും നിയമിക്കുമെന്ന്​ എമിറേറ്റ്​ അറിയിച്ചു. ദുബൈയില്‍ 600 പൈലറ്റുമാരെ നിയമിക്കുമെന്നും അറിയിച്ചിരുന്നു.

അതോടൊപ്പം തന്നെ ഏവരെയും അമ്പരപ്പിലാഴ്ത്തി മിഡ്​ല്‍ ഈസ്​റ്റിലെ വ്യോമയാന മേഖലയില്‍ രണ്ടു ലക്ഷത്തോളം തൊഴിലവസരങ്ങളാണ്​ വൈകാതെ സൃഷ്​ടിക്കപ്പെടാന്‍ പോകുന്നത്​. അടുത്ത 20 വര്‍ഷത്തെ പദ്ധതികള്‍ ലക്ഷ്യമിട്ടാണ്​ കൂടുതല്‍ ജീവനക്കാരെ റിക്രൂട്ട് ചെയ്യുന്നത്​. എമിറേറ്റ്​സിനു​ പുറമെ ഇത്തിഹാദ്​ ഉള്‍പ്പെടെയുള്ള വിമാന കമ്പനികള്‍ റിക്രൂട്ട്​മെന്‍റ്​ നടത്തുന്നതായുള്ള വാർത്തകൾ പുറത്ത് വന്നിരുന്നു​.

1.96 ലക്ഷം പുതിയ ജീവനക്കാരെയാണ്​ മിഡ്​ല്‍ ഈസ്​റ്റിലെ വ്യോമയാന മേഖല നിലവിൽ ലക്ഷ്യമിടുന്നത്​. 54,000 പൈലറ്റ്​, 51,000 സാങ്കേതിക വിദഗ്​ധര്‍, 91,000 കാബിന്‍ ക്രൂ എന്നിവര്‍ ഉള്‍പ്പെടുന്നുണ്ട്. ബോയിങ്ങാണ്​ ഇക്കാര്യം അറിയിച്ചത്​. 2040ഓടെ 3000 പുതിയ വിമാനങ്ങള്‍ വേണ്ടിവരുമെന്നാണ്​ വിലയിരുത്തപ്പെടുന്നത്. ഇതിന്​ 2.75 ട്രില്ല്യണ്‍ ദിര്‍ഹമിന്റെ ​പദ്ധതികളാണ്​ അണിയറയില്‍ അധികൃതർ ഒരുക്കുന്നത്​.