സൗദിയിലേക്ക് എത്തിച്ചേരാൻ പ്രവാസികൾ തയ്യാറായിക്കഴിഞ്ഞു. അങ്ങനെ പ്രവാസികൾ കാത്തിരുന്ന ആ വാർത്ത അറിയിക്കുന്നതിന് മുന്നാലെ തന്നെ ഒരുങ്ങുകയാണ് സൗദി അധികൃതർ. ഇപ്പോഴിതാ രാജ്യത്തിന് പുറത്തു നിന്ന് വാക്‌സിനെടുക്കാതെ വരുന്ന കമ്പനി തൊഴിലാളിക​ളെ താമസിപ്പിക്കാൻ പ്രത്യേക സമ്പർക്കവിലക്ക്​ കേന്ദ്രങ്ങൾക്ക്​ ലൈസൻസ് അനുവദിക്കാൻ സൗദി അധികൃതർ ഒരുങ്ങിക്കഴിഞ്ഞു.​

സൗദിയിലേക്ക് യാത്ര ചെയ്യാൻ കാത്തിരിക്കുന്ന പ്രവാസികൾക്ക് ഏറെ ആശ്വാസം നൽകുന്നതോടൊപ്പം തന്നെ സൗദി കൂടുതൽ മുന്നൊരുക്കങ്ങൾ നടത്തുന്നതും ഏറെ ആകാംക്ഷയോടെയാണ് നോക്കികാണുന്നത്. കോവിഡിനെ ഇല്ലാതാക്കാൻ ബന്ധപ്പെ​ട്ട വകുപ്പുകളുമായി ഏ​കോപിപ്പിച്ചാണ്​ വിവിധ പ്രവേശന കവാടങ്ങൾ വഴി രാജ്യത്തേക്ക്​ വരുന്നവരെ സുരക്ഷിത രീതിയിൽ സ്വീകരിക്കുന്നതിനും താമസിപ്പിക്കുന്നതിനുമുള്ള സമ്പർക്കവിലക്ക്​ കേന്ദ്രങ്ങൾക്ക്​ ലൈസൻസ്​ നല്കാൻ തീരുമാനിച്ചിരിക്കുന്നത്​.

അതോടൊപ്പം തന്നെ കേന്ദ്രങ്ങൾക്കുണ്ടായിരിക്കേണ്ട സൗകര്യങ്ങളും പാലിക്കേണ്ട നിബന്ധനകളും മന്ത്രാലയം വ്യക്തമാക്കിയിട്ടുണ്ട്. സ്ഥലം, കെട്ടിടം, ഡിസൈൻ, കെട്ടിട നിലവാരം, ടോയ്‌ലറ്റുകൾ, ലൈറ്റിങ്​, വെൻറിലേഷൻ, സെൻട്രൽ അടുക്കള, ​ജീവനക്കാർ, തൊഴിലാളികൾ, സൗകര്യങ്ങളും സേവനങ്ങളും ഉൾപ്പെടെയുള്ള കാര്യങ്ങളെ അടിസ്ഥാനമാക്കിയാണ്​​ ലൈസൻസ്​ നൽകുന്നത്.

കൂടത്തെ താമസിക്കുന്ന കെട്ടിടങ്ങൾ വൃത്തിയുള്ളതാകണം, റിപ്പയറിങ് ജോലികൾ​ നടത്തണം, അണുവിമുക്തമാക്കുന്നതിന് കീട നിയന്ത്രണ കമ്പനിയുമായി കരാർ ഉണ്ടാക്കണം, കെട്ടിടങ്ങളും അവിടുത്തെ സൗകര്യങ്ങളും വൃത്തിയാക്കാനും അണുവിമുക്തമാക്കാനും ക്ലീനിങ്​ കമ്പനിയുമായി കരാർ ഉണ്ടാക്കണം, കാവലിനും നിരീക്ഷണത്തിനും കാമറകളും സെക്യൂരിറ്റി ജീവനക്കാരും ഉണ്ടായിരിക്കണം, ആവശ്യമായ ടോയ്​ലറ്റുകൾ ഉണ്ടായിരിക്കണം, ക്യു.ആർ. കോഡ് ഫോമിലൂടെ വരുന്ന ആളുകൾക്ക്​ ബുക്കിങ് നൽകാനുള്ള വെബ്‌സൈറ്റ്​ ഉണ്ടാകണം, പ്രവേശന കവാടങ്ങളിൽ നിന്ന്​ ആളുകളെ സ്വീകരിക്കാനും സ്ഥാപനസമ്പർക്കവിലക്ക്​ ആസ്ഥാനത്തേക്ക് കൊണ്ടുപോകാനും സൗകര്യമുണ്ടായിരിക്കണം, ഓരോ യാത്രക്കാരനും രണ്ടു കോവിഡ്​ പരിശോധനകൾ നടത്തുന്നതിന് അംഗീകൃത മെഡിക്കൽ ലബോറട്ടറികളുമായി കരാർ ഉണ്ടാക്കണം, കോവിഡിനെയും ക്വാറൻറീനെയും കുറിച്ച്​ ബോധവത്​കരണം നടത്തണം, വരുന്നവർ തവക്കൽന ആപ്പിൽ രജിസ്​റ്റർ ചെയ്തിട്ടുണ്ടെന്ന് ഉറപ്പാക്കണം എന്നിങ്ങനെയുള്ള​ നിബന്ധനകളാണ് നൽകിയിരിക്കുന്നത്.

റിയാദ്, ജിദ്ദ, ദമ്മാം, ദഹ്‌റാൻ എന്നിവിടങ്ങളിൽ ക്വാറൻറീൻ കേന്ദ്രങ്ങൾ തുടങ്ങാനുള്ള ലൈസൻസിനായി ഇതിനകം 25 അപേക്ഷകൾ ലഭിച്ചതായി അധികൃതർ അറിയിക്കുകയുണ്ടായി. ഇത്രയും കെട്ടിടങ്ങളിലായി 3,276 പേരെ താമസിപ്പിക്കാൻ കഴിയും. 1,669 ആളുകളെ താമസിപ്പിക്കാൻ ശേഷിയുള്ള 10 കെട്ടിടങ്ങൾക്ക്​ ഇതിനോടകം തന്നെ ലൈസൻസ്​ നൽകി. അതിൽ ആളുകളെ താമസിപ്പിക്കാൻ തുടങ്ങിയിട്ടുണ്ട്​.

അതോടൊപ്പം തന്നെ സ്​ഥാപന സമ്പർക്കവിലക്ക്​​ യോഗ്യതയുള്ള കെട്ടിടങ്ങളുടെ അപേക്ഷ ലഭിച്ചാൽ നിർദിഷ്​ട ആവശ്യകതകളും മാനദണ്ഡങ്ങളും പാലിച്ചിട്ടുണ്ടോയെന്ന്​ ഉറപ്പുവരുത്തിയാൽ ഉടൻ തന്നെ ലൈസൻസ്​ അനുവദിക്കുന്നതാണ്​​. അംഗീകൃത സമ്പർക്കവിലക്ക്​കേന്ദ്രങ്ങളുടെ വിവരങ്ങൾ മന്ത്രാലയത്തി​െൻറ ഇലക്ട്രോണിക് പ്ലാറ്റ്‌ഫോമിൽ പ്രസിദ്ധീകരിക്കുകയും ചെയ്യുന്നതാണ്.

അതേസമയം എല്ലാ കേന്ദ്രങ്ങളും മുൻകരുതലുകളും പ്രതിരോധ നടപടികളും പാലിക്കണമെന്നും ആതുരശിശ്രൂഷക്ക്​ ആവശ്യമായ സൗകര്യങ്ങളൊരുക്കുന്നതിൽ അലംഭാവം കാണിക്കരുതെന്നും മുനിസിപ്പൽ-ഗ്രാമകാര്യ-ഭവന മന്ത്രാലയം എല്ലാവരോടും ആവശ്യപ്പെടുകയും ചെയ്തിട്ടുണ്ട്. എല്ലാ നടപടിക്രമങ്ങളും പൊതുജനാരോഗ്യ അതോറിറ്റിയുടെ തുടർച്ചയായ വിലയിരുത്തലിന് വിധേയമായിരിക്കുമെന്നും മന്ത്രാലയം വ്യക്തമാക്കുകയുണ്ടായി. വിമാനയാത്ര ആരംഭിക്കുന്നതിന് മുൻപേ തന്നെ ഇത്തരത്തിൽ മുന്നൊരുക്കങ്ങൾ നടത്തുന്നത് ഏറെ പ്രതീക്ഷയാണ് നൽകുന്നത്.