ദുബായില്‍ 550 കോടി ദിര്‍ഹത്തിന്റെ 'ദുബായ് ഫുഡ് പാര്‍ക്ക്' പദ്ധതിക്ക് യുഎഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ഷെയ്ഖ് മുഹമ്മദ് ബിന്‍ റാഷിദ് അല്‍ മക്തൂം തുടക്കം കുറിച്ചു. ദുബായ് ഹോള്‍സെയില്‍ സിറ്റിയില്‍ അത്യാധുനിക മാര്‍ക്കറ്റ്, ഭക്ഷ്യ സംസ്‌കരണ-സംഭരണ കേന്ദ്രങ്ങള്‍, പാക്കിങ് മേഖലകള്‍, ഹോട്ടലുകള്‍, ധനകാര്യസ്ഥാപനങ്ങള്‍, മാലിന്യ പുനസംസ്‌കരണ സംവിധാനങ്ങള്‍ തുടങ്ങിയവ ഉള്‍പ്പെടുന്ന പടുകൂറ്റന്‍ സംരംഭമാണിത്. ദുബായ് സൗത്തിനോടു ചേര്‍ന്നു 4.8 കോടി ചതുരശ്ര അടിയിലാണു പരിസ്ഥിതി സൗഹൃദ മാനദണ്ഡങ്ങള്‍ പൂര്‍ണമായും പാലിക്കുന്ന ഫുഡ്പാര്‍ക്ക് സജ്ജമാകുക.

അല്‍ മക്തൂം രാജ്യാന്തര വിമാനത്താവളം, എക്‌സ്‌പോ 2020 വേദി എന്നിവിടങ്ങളില്‍നിന്നു പത്തുമിനിറ്റും ജബല്‍ അലി ഫ്രീസോണില്‍നിന്നു 15 മിനിറ്റും യാത്രചെയ്താല്‍ മതിയാകും. വിശാലമായ ലോജിസ്റ്റിക്‌സ് മേഖലയും തൊഴിലാളികള്‍ക്കുള്ള താമസകേന്ദ്രങ്ങളും മറ്റു പ്രത്യേകതകളാണ്. ഭാവിയിലെ ആവശ്യങ്ങള്‍കൂടി കണ്ടറിഞ്ഞാണു നൂതന സംവിധാനങ്ങളോടെ ഇത്തരമൊരു ബൃഹത് സംരംഭം തുടങ്ങുന്നതെന്നു ദുബായ് ഹോള്‍സെയില്‍ സിറ്റി സിഇഒ: അബ്ദുല്ല ബെല്‍ഹൗള്‍ പറഞ്ഞു. നിക്ഷേപകര്‍ക്കും ഏജന്‍സികള്‍ക്കും ഉപയോക്താക്കള്‍ക്കും ഒരുപോലെ ഗുണപരമായ പദ്ധതിയാണിത്. ഭക്ഷ്യ, അനുബന്ധ മേഖലകള്‍ ഒരു കുടക്കീഴിലാകുന്നതു സുതാര്യത കൂടുതല്‍ ഉറപ്പുവരുത്തുമെന്നും വ്യക്തമാക്കി.

കസ്റ്റംസ്, ലൈസന്‍സിങ് നടപടിക്രമങ്ങള്‍ക്കും സര്‍ക്കാര്‍, ധനകാര്യ സേവനങ്ങള്‍ക്കും സൗകര്യമുള്ള ഇവിടെ ഭക്ഷ്യമേഖലയുമായി ബന്ധപ്പെട്ട എല്ലാ കാര്യങ്ങളും ഒരു കുടക്കീഴിലാകും. മേഖലയില്‍ ആദ്യമായുള്ള ഇത്തരമൊരു പദ്ധതി ആയിരക്കണക്കിനു തൊഴിലവസരങ്ങള്‍ സൃഷ്ടിക്കുകയും ചെയ്യും. യുഎഇ ഭക്ഷ്യവിപണി 2030 ആകുമ്പോഴേക്കും 70% വളര്‍ച്ച കൈവരിക്കുമെന്നു കണക്കാക്കുന്നു. ഭക്ഷ്യ സംഭരണ-സംസ്‌കരണ രംഗങ്ങളിലടക്കം ഗള്‍ഫ് മേഖലയിലെ മുഖ്യകേന്ദ്രമായി ദുബായ് മാറാന്‍ ഫുഡ് പാര്‍ക്ക് സഹായകമാകുമെന്നു ടീകോം ഗ്രൂപ്പ് സിഇഒ: ഡോ.അമിന അല്‍ റുസ്താമനി പറഞ്ഞു.

നൂതനസാങ്കേതിക വിദ്യകളും കൂടുതല്‍ ഗുണപരമായ സേവനങ്ങളും ഉറപ്പുവരുത്താന്‍ സഹായകമാകും. ലോകോത്തര മാനദണ്ഡങ്ങള്‍ പാലിക്കുന്നതാണോ ഉല്‍പന്നങ്ങളെന്നും ഉറപ്പാക്കാം. പുനര്‍കയറ്റുമതിക്കു മാത്രമായി 1.1 കോടി ചതുരശ്ര അടി വിസ്തീര്‍ണമുള്ള ഫ്രീസോണ്‍ പദ്ധതി മേഖലയില്‍ ഉണ്ടാകും. പ്രമുഖ രാജ്യാന്തര കമ്പനികളുടെ പ്രധാനകേന്ദ്രമായി ദുബായ് മാറാന്‍ പദ്ധതി സഹായകമാകും. കൂടുതല്‍ കമ്പനികള്‍ ഇതിനായി ചര്‍ച്ചകള്‍ നടത്തിവരികയാണെന്നും ചൂണ്ടിക്കാട്ടി.

നിക്ഷേപമേഖലയില്‍ വന്‍ സാധ്യതകള്‍ക്ക് അവസരമൊരുക്കുന്ന പദ്ധതിയാണിത്. ഇറക്കുമതി, കയറ്റുമതി, പുനര്‍കയറ്റുമതി എന്നിവയ്ക്കും ചരക്കുനീക്കത്തിനുമുള്ള സൗകര്യം ഇവിടെയുണ്ടാകും. കര, ആകാശം, കടല്‍ എന്നിവിടങ്ങള്‍ വഴിയുള്ള ചരക്കുനീക്കത്തിനുള്ള സൗകര്യം, വിവിധ ഭൂഖണ്ഡങ്ങളിലേക്കു പെട്ടെന്നു പോകാനാവുന്ന തീരം എന്നീ അനുകൂലഘടകങ്ങളുള്ള ദുബായില്‍ ഇത്തരമൊരു കേന്ദ്രം യാഥാര്‍ഥ്യമാകുന്നത് പല മേഖലകള്‍ക്കും നേട്ടമാകുമെന്നു മാത്രമല്ല, രാജ്യത്തിന്റെ ഭക്ഷ്യസുരക്ഷ ഉറപ്പാക്കുകയും ചെയ്യുമെന്നു പ്രതീക്ഷിക്കുന്നു