ഒമാൻ ഗതാഗത, നിയമ മേഖലകളില്‍ വൻ അഴിച്ചു പണികൾക്ക് തയ്യറെടുക്കുന്നു. വാഹനങ്ങൾ അശ്രദ്ധമായി ഓടിക്കുന്നവർക്കെതിരെയും നിയമങ്ങൾ പാലിക്കാത്തവർക്കെതിരെയും കടുത്ത നടപടികൾ ഏർപ്പെടുത്തുകയാണ് പുതിയ തീരുമാനം.

നിലവിലെ നിയമ ലംഘനങ്ങൾക്കുള്ള ശിക്ഷ പരമാവധി വര്‍ധിപ്പിക്കും. അതോടൊപ്പം തന്നെ പിൻ സീറ്റിലിരിക്കുന്നവരും സീറ്റ്​ ബെൽറ്റ് ധരിയ്ക്കണമെന്നാണ് പുതിയ നിയമങ്ങൾ. മാർച്ച് ഒന്ന് മുതൽ നിയമങ്ങൾ കർക്കശമാക്കുമെന്നാണ് ഒമാൻ അറിയിച്ചിരിക്കുന്നത്.

പരിശീലകരില്ലാതെ ഡ്രൈവിങ്​ പഠിച്ചാൽ 35 റിയാൽ പിഴ നൽകേണ്ടി വരും. കൂടാതെ ലൈസൻസിൽ ഒരു ബ്ലാക്ക്​ പോയിന്റ്​ ചേര്‍ക്കുകയും ചെയ്യും. പരിശീലന വാഹനം ഓടിക്കുമ്പോള്‍ ലൈസൻസുള്ള ഡ്രൈവറും കൂടെയുണ്ടാവണമെന്ന്​ ആർ.ഒ.പി ട്രാഫിക്​ വിഭാഗം അറിയിച്ചു. ഓരോ ഗതാഗത ലംഘനത്തിനും ബ്ലാക്ക്​ പോയിന്റുകളുമുണ്ടാകും. ഇത്​ 12 പോയന്റായി ഉയർന്നാൽ ഡ്രൈവിങ്​ ലൈസൻസ്​ റദ്ദാക്കും.

ആംബുലൻസിന്റെ സ്ഥലത്ത്​ പാർക്ക്​ ചെയ്താൽ 35 റിയാലാണ്​ പിഴയൊടുക്കേണ്ടി വരുക. അതുപോലെ റോഡിന്റെ വശങ്ങളിലൂടെ മറ്റ്​ വാഹനങ്ങളെ മറി കടന്നാൽ രണ്ട്​ ബ്ലാക്ക്​ പോയന്റും 50 റിയാലും പിഴ നൽകണം.

ഡ്രൈവറെ തിരിച്ചറിയാൻ കഴിയാത്ത രീതിയിൽ മുഖം മറച്ച്​ വാഹനം ഓടിച്ചാൽ അമ്പത്​ റിയാൽ പിഴ ഈടാക്കുകയും മുന്ന്​ ബ്ലാക്ക്​ പോയിന്റും ചുമത്തുകയും ചെയ്യും. വാഹനത്തിൽ അനാവശ്യ ഉപകരണങ്ങൾ ഘടിപ്പിക്കുന്നതിനും നിയന്ത്രണങ്ങൾ ഏർപ്പെടുത്തിയിട്ടുണ്ട്. ഇതോടൊപ്പം തന്നെ ഒന്നാം തീയതി മുതൽ നാല്​ വയസിന്​ താഴെയുള്ള കുട്ടികൾക്ക്​ പ്രത്യേക സീറ്റ്​ നിർബന്ധമാക്കും.