പ്രവാസി വീട്ടുജോലിക്കാര്‍ക്ക് ആശ്വാസം നൽകുന്ന തീരുമാനവുമായി അബുദാബി ഭരണകൂടം രംഗത്തെത്തിയിരിക്കുകയാണ്. വീട്ടുജോലികൾ ചെയ്തു വരുന്ന ജോലിക്കാര്‍ക്ക് എളുപ്പത്തില്‍ നീതി ലഭിക്കുന്നതിനായി പ്രത്യേക ട്രിബ്യൂണല്‍ ആണ് അധികൃതർ ഒരുക്കിയിരിക്കുന്നത്. ജോലിക്കാരുടെ പരാതി പരിഹരിക്കാന്‍ വേണ്ടി മാത്രമാണ് ഇത്തരത്തിലൊരു ട്രിബ്യൂണല്‍ ആരംഭിച്ചിരിക്കുന്നത്.

അബുദാബിയിലെ എല്ലാ കോടതികളിലും ജോലിക്കാരുടെ പരാതികള്‍ ആദ്യമെ തന്നെ പരിഗണിക്കണമെന്നും പ്രേത്യേക നിർദ്ദേശമുണ്ട്. കഴിഞ്ഞ ബുധനാഴ്ചയാണ് ഇത് സംബന്ധിച്ചുള്ള പ്രഖ്യാപനമുണ്ടായത്.

അബുദാബി കിരീടാവകാശിയും യുഎഇ സായുധസേന ഡെപ്യൂട്ടി സുപ്രീം കമാന്‍ഡറുമായ ഷെയ്ഖ് മുഹമ്മദ് ബിന്‍ സായിദ് അല്‍നഹ്യയാണ് ഇത് സംബന്ധിച്ച നിര്‍ദ്ദേശം നല്‍കിയിരിക്കുന്നത്.

ജോലിക്കാര്‍ക്ക് എതിരെയുള്ള പീഡനം, നിര്‍ബന്ധിച്ച്‌ ജോലി ചെയ്യിക്കുക, മനുഷ്യ കടത്ത് എന്നിവ നേരത്തെ തന്നെ അബുദാബി നിരോധിച്ചിരുന്നു. അതോടൊപ്പംതന്നെ ജോലിക്കാര്‍ക്ക് തങ്ങളുടെ ഔദ്യോഗിക രേഖകള്‍ കൈവശം വയ്ക്കാനുള്ള അവകാശവുമുണ്ട്.