സൗദി അറേബ്യയിലെ ആദ്യ സിനിമ തിയറ്റര് ഈമാസം 18 ന്
സൗദി അറേബ്യയിലെ ആദ്യ സിനിമ തിയറ്റര് ഈമാസം 18 ന് പ്രവര്ത്തനം ആരംഭിക്കും. തലസ്ഥാനമായ റിയാദിലായിരിക്കും ആദ്യ തിയറ്റര് പ്രദര്ശനം നടക്കുകയെന്ന് ഔദ്യോഗിക വാര്ത്ത ഏജന്സി അറിയിച്ചു. അമേരിക്കയില് സന്ദര്ശനം നടത്തുന്ന കിരീടാവകാശി അമീര് മുഹമ്മദ് ബിന് സല്മാന് ബുധനാഴ്ച ലോസ് ആഞ്ചലസില് അമേരിക്കന് മള്ട്ടി സിനിമ (എ.എം.സി) കമ്പനിയുമായി വിപുലമായ കരാര് ഒപ്പിട്ടതിന് പിന്നാലെയാണ് തിയതി പ്രഖ്യാപനം വന്നത്.
അഞ്ചുവര്ഷത്തിനകം രാജ്യത്തെ 15 നഗരങ്ങളിലായി 40 തിയറ്ററുകള് ആരംഭിക്കാനാണ് എ.എം.സിയുമായുള്ള കരാര്. സൗദി ജനറല് എന്റര്ടൈന്മന്റെ് അതോറിറ്റിയുടെ തിയറ്റര് ലൈസന്സ് ലഭിക്കുന്ന ആദ്യ കമ്പനിയായി ഇതുവഴി എ.എം.സി മാറി. 1920 ല് സ്ഥാപിതമായ വാന്ഡ ഗ്രൂപ്പിന്റെ നിയന്ത്രണത്തിലുള്ളതാണ് ലോകപ്രശസ്ത തിയറ്റര് ശൃംഖലായായ എ.എം.സി. കഴിഞ്ഞ വര്ഷം ഡിസംബര് 11 നാണ് സിനിമ തിയറ്ററുകള്ക്ക് അനുമതി നല്കാന് ഓഡിയോവിഷ്വല് മീഡിയ ജനറല് കമീഷന്റെ ബോര്ഡ് യോഗം തീരുമാനിച്ചത്.
തിയറ്ററുകള് മാര്ച്ചില് തുറക്കാനാകുമെന്നാണ് പ്രതീക്ഷയെന്ന് സാംസ്കാരിക, വാര്ത്താവിതരണ വകുപ്പ് മന്ത്രി അവ്വാധ് ബിന് സാലിഹ് അല്അവ്വാധ് അനന് അറിയിച്ചിരുന്നു. ലൈസന്സിങ്ങിന്റെ വിശദാംശങ്ങളിലും നിയന്ത്രണങ്ങളിലും നിയമങ്ങളിലുമൊക്കെ ഇതിനകം ധാരണയായി കഴിഞ്ഞിട്ടുണ്ട്. 2030 ഓടെ രാജ്യത്ത് 300 ഓളം തിയറ്ററുകളിലായി 2,000 ലേറെ സ്ക്രീനുകള് ഉണ്ടാകുമെന്നാണ് കരുതപ്പെടുന്നത്. എ.എം.സിക്ക് പിന്നാലെ യു.എ.ഇയിലെ വോക്സ് സിനിമാസ്, ബ്രിട്ടനിലെ വ്യൂ, കനേഡിയന് കമ്പനിയായ ഐമാക്സ് എന്നിവയും സൗദിയിലേക്ക് വരുന്നുണ്ട്.
കിരീടാവകാശി അമീര് മുഹമ്മദ് ബിന് സല്മാന്റെ കാര്മികത്വത്തിലുള്ള 'വിഷന് 2030' പദ്ധതിയുടെ ഭാഗമായാണ് സൗദി വിനോദമേഖലയിലും വിപ്ലവം സംഭവിക്കുന്നത്. ഏതാനും മാസങ്ങള്ക്ക് മുമ്പ് ഇത് സംബന്ധിച്ച സൂചന നല്കുന്ന പ്രഖ്യാപനങ്ങള് ഭരണതലത്തില് നിന്ന് വന്നിരുന്നു.
മൂന്നരപ്പതിറ്റാണ്ടുകള്ക്ക് ശേഷമാണ് സൗദിയില് തിയറ്ററുകള്ക്ക് പ്രവര്ത്തനാനുമതി ലഭിക്കുന്നത്. 1980 കളുടെ തുടക്കം വരെ സൗദിയിലെ വിവിധ നഗരങ്ങളില് തിയറ്ററുകള് പ്രവര്ത്തിച്ചിരുന്നു.
https://www.facebook.com/Malayalivartha