സിറിയയുടെ മുകളിലെ റഡാറില്‍ നിന്നും റഷ്യയുടെ സൈനിക വിമാനം കാണാതായ സംഭവത്തില്‍ ദുരൂഹതയേറുന്നു. ഇസ്രായേലും ഫ്രാന്‍സും സിറിയില്‍ വ്യോമാക്രമണം നടത്തവേയായിരുന്നു വിമാനം റഡാറില്‍ നിന്നും കാണാതായത്. 14 യാത്രക്കാരുമായി ഐ120ടര്‍ബോ പ്രോപ് എന്ന വിമാനമാണ് കാണാതായത്. റഷ്യന്‍ സമയം തിങ്കളാഴ്ച രാത്രി 11 മണിക്ക് കാണാതായ ഈ വിമാനം ഇസ്രയേലിന്റെ ആക്രമണം നേരിടുന്നതിനിടെ സിറിയ അബദ്ധത്തില്‍ വെടിവെച്ച് വീഴ്ത്തിയതാണെന്ന് സൂചനയുണ്ട്. ഈ സമയം ഇസ്രയേലിന്റെ നാല് എഫ്16 യുദ്ധ വിമാനങ്ങള്‍ സിറിയയിലെ ലതാകിയ മേഖലയില്‍ വ്യോമാക്രമണം നടത്തുകയായിരുന്നു.

റഷ്യയുടെ എയര്‍ കണ്‍ട്രോള്‍ റഡാര്‍ സിസ്റ്റം ഈ അവസരത്തില്‍ തന്നെ അടുത്തുള്ള ഫ്രഞ്ച് യുദ്ധക്കപ്പലില്‍ നിന്നും റോക്കറ്റ് ലോഞ്ച് ചെയ്തതായി കണ്ടെത്തിയിരുന്നു. ഇതുമായി ബന്ധപ്പെട്ട് സിറിയയോ ഇസ്രയേലോ പ്രതികരിച്ചിട്ടില്ല. സംഭവത്തില്‍ പങ്കില്ലെന്ന് പന്റെഗണും ഫ്രാന്‍സും വ്യക്തമാക്കിയിട്ടുണ്ട്. വിമാനത്തിലുള്ളവരെ കുറിച്ച് വിവരങ്ങളൊന്നും തന്നെ ലഭ്യമായിട്ടില്ല. രക്ഷാപ്രവര്‍ത്തനം നടക്കുന്നുണ്ട്.

സിറിയന്‍ തീരത്തിന് 35 കിലോമീറ്റര്‍ അകലെയായിരുന്ന വിമാനം മെഡിറ്ററേനിയന്‍ കടലില്‍ മുങ്ങിയിരിക്കാനുള്ള സാധ്യതയുള്ളതായി രക്ഷാപ്രവര്‍ത്തകര്‍ അറിയിച്ചു.