ഒരു ശാക്തിക ചേരികളിലും അംഗമാകാതെ നിന്ന ഇന്ത്യ ലോകത്തിന് മാതൃകയായിരുന്നു. ഇന്ത്യയുടെ ആദ്യ പ്രധാനമന്ത്രി ജവഹര്‍ലാല്‍ നെഹ്‌റുവായിരുന്നു ഇങ്ങനെയൊരു ആശയം മുന്നോട്ട് വെച്ചത്. തുടര്‍ന്ന് വന്ന പ്രധാനമന്ത്രിമാരും ഇതേ രീതി പിന്തുടര്‍ന്നു. എന്നാല്‍ മന്‍മോഹന്‍ സിംഗ് പ്രധാനമന്ത്രിയായിരുന്നപ്പോഴാണ് ഇന്ത്യ അമേരിക്കന്‍ പക്ഷത്തേക്ക് നീങ്ങിയത്. മോഡി പ്രധാനമന്ത്രിയായപ്പോള്‍ ബന്ധം ശക്തവും ദൃഢവുമായി. ഇന്ത്യ അമേരിക്കയുടെ അടുത്ത പങ്കാളിയെന്നാണ് പ്രസിഡന്റ് ബറാക് ഒബാമ ഈ ബന്ധത്തെ വിശേഷിപ്പിച്ചത്. മോഡി പ്രധാനമന്ത്രിയായി ഒരു വര്‍ഷത്തിനകം മൂന്ന് തവണ ഒബാമയുമായി കൂടിക്കാഴ്ച നടത്തിയിരുന്നു. ഒബാമയുടെ ഇപ്പോഴത്തെ ഇന്ത്യന്‍ സന്ദര്‍ശനവും അമേരിക്കയുടെ ഉറ്റ സുഹൃത്ത് എന്ന നിലയിലായിരുന്നു. പ്രോട്ടോകോള്‍ ലംഘിച്ച് രണ്ട് മണിക്കൂര്‍നേരം തുറന്ന വേദിയിലിരുന്ന് റിപ്പബ്ലിക് ദിന പരേഡ് വീക്ഷിച്ച ഒബാമ ഇക്കാര്യം വ്യക്തമാക്കിയാണ് ഇന്ത്യയില്‍ നിന്ന് മടങ്ങിയത്. എന്നാല്‍ അമേരിക്കയുടെ ഇന്ത്യയോടുള്ള അടുപ്പം ചൈനയെയാണ് വിറളിപിടിപ്പിച്ചത്.
ചൈനീസ് പ്രസിഡന്റ് ഷീ ചിന്‍പിങ് രാഷ്ട്രപതി പ്രണബ് മുഖര്‍ജിക്ക് അയച്ച റിപ്പബ്ലിക്ദിന സന്ദേശത്തില്‍ ഏഷ്യ പസഫിക് മേഖലയില്‍ കടന്നുകയറാനുള്ള അമേരിക്കന്‍ തന്ത്രം ഇന്ത്യ തിരിച്ചറിയണമെന്നാണു വ്യക്തമാക്കിയിരുന്നത്. കൂടുതല്‍ സൈനിക സഹകരണത്തിന് ഇന്ത്യയും അമേരിക്കയും ഒരുങ്ങുന്നതാണു ചൈനയെ പ്രകോപിപ്പിച്ചത്. ഇന്ത്യയുമായുള്ള നയതന്ത്രബന്ധം ശക്തിപ്പെടുത്താന്‍ ചൈന ആഗ്രഹിക്കുന്നെന്നു ചൈനീസ് പ്രസിഡന്റ് അഭിപ്രായപ്പെട്ടു. എന്നാല്‍ ഇന്ത്യയുമായുള്ള ബന്ധം ഒബാമ തുറന്ന് പറഞ്ഞതോടെ ചൈന നിലപാട് മാറ്റി.
പാകിസ്ഥാനെ തങ്ങോളോട് അടുപ്പിച്ച് റഷ്യയുമായി കൂട്ടുകൂടാനാണ് ചൈന ആഗ്രഹിക്കുന്നത്. പാകിസ്ഥാനെ അടുത്ത സുഹൃത്തായി പ്രഖ്യാപിച്ച ചൈന, ഉടന്‍ നടക്കാനിരിക്കുന്ന സൈനിക പരേഡില്‍ റഷ്യന്‍ പ്രസിഡന്റ് വ്‌ളാഡിമര്‍ പുടിനെ മുഖ്യാതിഥിയായി ക്ഷണിച്ചാണ് തങ്ങളുടെ നയതന്ത്ര ബന്ധങ്ങള്‍ക്ക് ശക്തി പകരാന്‍ ഒരുങ്ങുന്നത്. രണ്ടാം ലോകമഹായുദ്ധ വിജയത്തിന്റെ വാര്‍ഷികം പ്രമാണിച്ചാണു ചൈന പരേഡ് ഒരുക്കുന്നത്. ചൈനയുടെ പകരം വയ്ക്കാനില്ലാത്ത ഉറ്റസുഹൃത്താണു പാകിസ്ഥാനെന്നു ചൈനീസ് വിദേശകാര്യ മന്ത്രി വാങ് യിയാണ് വ്യക്തമാക്കിയത്. പാക് സൈനിക മേധാവി ജനറല്‍ റഹീല്‍ ഷരീഫിനോടാണ് അദ്ദേഹം ചൈനയുടെ സ്‌നേഹം അറിയിച്ചത്. രണ്ട് ദിവസത്തെ സന്ദര്‍ശനത്തിനാണു റഹീല്‍ ചൈനയിലെത്തിയത്. പാകിസ്ഥാന്റെ ഉത്കണ്ഠ ചൈനയുടേത് കൂടിയാണെന്നു കമ്യൂണിസ്റ്റ് പാര്‍ട്ടി പോളിറ്റ് ബ്യൂറോ അംഗം കൂടിയായ മെങ് ജിയാന്‍ഷുവും വ്യക്തമാക്കി.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha