കാലാവസ്ഥാ വ്യതിയാനവും ആഗോളതാപനവും മൂലം സമുദ്ര നിരപ്പ് ഉയരുന്നത് ഇന്ത്യ, ചൈന, അമേരിക്ക, യൂറോപ്പ് എന്നീ രാജ്യങ്ങള്‍ക്ക് വന്‍നാശം വിതയ്ക്കുമന്ന് യു എന്‍ സമിതിയുടെ കരട് റിപ്പോര്‍ട്ട്. ആഗോള താപനത്തെത്തുടര്‍ന്ന് ഹിമപാളികളുടെ ഉരുകല്‍ അനിയന്ത്രിതമായി വര്‍ദ്ധിച്ചത് സമുദ്ര നിരപ്പ് ഉയരുന്നതിനും കര കടലെടുക്കുന്നതിനും കാരണമാകുന്നു.

ഭൂമിയിലെ രണ്ട് ഹിമപാളികളായ ഗ്രീന്‍ലാന്‍ഡിലും അന്റാര്‍ട്ടിക്കയിലും, ഒരു ദശാബ്ദത്തിനിടെ പ്രതിവര്‍ഷം 400 ബില്യണ്‍ ടണ്ണാണ് ഉരുകിയത്. ഇത് 2100ല്‍ 100 ബില്യണിലേക്ക് കുറച്ചില്ലെങ്കില്‍ മനുഷ്യരാശിക്ക് വന്‍നാശമാകും ഉണ്ടാകുകയെന്ന് റിപ്പോര്‍ട്ട് മുന്നറിയിപ്പ് നല്‍കുന്നു.

സമുദ്ര നിരപ്പ് ഉയരുന്നത് ഇന്ത്യയിലെ മൂന്ന് തീരനഗരങ്ങള്‍ക്കും വന്‍ഭീഷണി ഉയര്‍ത്തും. കൊച്ചി, മുംബയ്, ചെന്നൈ നഗരങ്ങള്‍ കടലിനടിയിലാകുമെന്നാണ് റിപ്പോര്‍ട്ട് പറയുന്നത്. ചൈനയില്‍ ഷാങ്ഹായി, നിങ്‌ബോ, തായ്‌ഷോ അടക്കം അരഡസന്‍ തീര നഗരങ്ങള്‍ ഭീഷണിയിലാണ്.

മത്സ്യ സമ്ബത്തിന്റെ അനിയന്ത്രിതമായ നാശം, ചുഴലിക്കാറ്റ് അടക്കമുള്ള പ്രകൃതി ദുരന്തങ്ങള്‍ വഴിയുള്ള നാശനഷ്ടങ്ങളുടെ വര്‍ദ്ധന,കരകളെ കടലെടുക്കുന്ന പ്രവണത ഇതെല്ലാം ഈ വിനാശത്തിന്റെ സൂചനകളാണെന്ന് ഇന്റര്‍ ഗവണ്‍മെന്റ് പാനല്‍ ഓണ്‍ ക്ലൈമറ്റ് ചേയ്ഞ്ച് നടത്തിയ പഠന റിപ്പോര്‍ട്ടില്‍ സൂചിപ്പിക്കുന്നു. ഉത്തരാര്‍ദ്ധ ഗോളത്തില്‍ സ്ഥിതിചെയ്യുന്ന ഹിമപാളി ഈ നൂറ്റാണ്ടിന്റെ അവസാനത്തോടെ 30 ശതമാനത്തോളം ഉരുകി തീരുമെന്നും റിപ്പോര്‍ട്ടില്‍ പറയുന്നു.
അമേരിക്കയില്‍ മിയാമി, ന്യൂയോര്‍ക്ക് അടക്കമുള്ള നഗരങ്ങളും, യൂറോപ്പില്‍ ആംസ്റ്റര്‍ഡാം, വെനീസ്, ഹാംബര്‍ഗം തുടങ്ങിയവയും സമുദ്രനിരപ്പ് ഉയരുന്നത് കാരണമുള്ള ഭീഷണി നേരിടുന്നവയാണ്. നിലവിലെ സാഹചര്യമനുസരിച്ച് 2050 ഓടെ താഴ്ന്നനിരപ്പില്‍ സ്ഥിതി ചെയ്യുന്ന നഗരങ്ങളും ചെറിയ ദ്വീപുകളുമെല്ലാം മുങ്ങിപ്പോകാന്‍ സാദ്ധ്യതയുണ്ട്.