ചൈനയിലെ പുതിയ നഗര സംസ്‌കാരമാണ് ബേതിംഗ് ഹൗസ് എന്നറിയപ്പെടുന്ന കുളിമുറികള്‍. വെള്ളമോ വെള്ളം ചൂടാക്കാനുള്ള സെന്‍ട്രല്‍ ഹീറ്റിംഗ് സംവിധാനങ്ങളോ ഇല്ലാത്ത കെട്ടിട സമുച്ചയങ്ങളില്‍ ജീവിക്കുന്നവര്‍ക്ക് പണം കൊടുത്ത് ശരീരശുദ്ധി വരുത്താന്‍ സൗകര്യം നല്‍കുന്ന സ്ഥലങ്ങളാണിവ.
തെക്കു പടിഞ്ഞാറന്‍ ചൈനയിലെ യുനാന്‍ പ്രവിശ്യയിലുള്ള അത്തരമൊരു ബേതിംഗ് ഹൗസിന്റെ പേരില്‍ അടുത്തയിടെ പത്രത്തില്‍ വന്ന ഒരു പരസ്യം എല്ലാവരുടെയും ശ്രദ്ധ പിടിച്ചു പറ്റി. ഒരു മാസമായി അവിടെ കഴിയുന്ന 6 വയസ്സുകാരി സിയായോയെ കൂട്ടികൊണ്ടു പോകാന്‍ എത്രയും വേഗം അപ്പൂപ്പനെത്തണമെന്നാണു പരസ്യം. പരസ്യം കണ്ട് വളരെപ്പേര്‍ ബാത്ത്ഹൗസ് മാനേജര്‍ വാഗിനെ വിളിച്ച് കാര്യമന്വേഷിച്ചു.
ഒരു മാസം മുമ്പ് അവിടെ ശരീര ശുദ്ധിയ്ക്കായി ചെന്ന ഒരു ആളോടൊപ്പം അവിടെയെത്തിയതാണ് കുട്ടി. കുളിയും മസാജും ഒക്കെ കഴിഞ്ഞ് അതിനുള്ള പണമടയ്ക്കാന്‍ പറഞ്ഞപ്പോള്‍ താന്‍ പേഴ്‌സ് കൊണ്ടു വരാന്‍ മറന്നു പോയെന്നും വീട്ടില്‍ പോയി കാശെടുത്തിട്ട് വരാമെന്നും, താന്‍ കബളിപ്പിച്ചു കടന്നു കളയും എന്നു തോന്നാതിരിക്കാന്‍ കൊച്ചുമകളെ അവിടെ നിര്‍ത്തിയിട്ട് പോകുകയാണെന്നും പറഞ്ഞ് അയാള്‍ അവിടുന്ന് പോയതാണ്. അന്നു മുതല്‍ ആ അപ്പൂപ്പന്‍ തിരിച്ചു വരുന്നതും കാത്തിരിക്കുകയാണ് ആ ബേതിംഗ് ഹൗസിലെ സ്റ്റാഫ്.. അവിടുത്തെ സ്റ്റാഫ് ഒരു മാസമായി ആ കുട്ടിയെ പൊന്നു പോലെയാണ് നോക്കുന്നത്. രാത്രിയില്‍ സെന്റര്‍ അടച്ചു കഴിയുമ്പോള്‍ അവള്‍ക്കുറങ്ങാന്‍ ഒരു സ്ഥലവും ഒരുക്കി. ഒരു ടിവിയും വച്ചു കൊടുത്തു. ആഹാരവും വസ്ത്രവും ഒക്കെ അവള്‍ക്കു കൊടുക്കുന്നു. ബേതിംഗ്ഹൗസിലെ ശുചി മുറി സൗകര്യങ്ങളൊക്കെ സൗജന്യമായി ഉപയോഗിക്കാന്‍ അവളെ അനുവദിക്കുകയും ചെയ്യുന്നു. എന്നാലും കുടുംബത്തോടൊപ്പമല്ലേ കുഞ്ഞ് കഴിയേണ്ടത് എന്നു വിചാരിച്ചാണ് അപ്പൂപ്പനായി പരസ്യം കൊടുത്തതെന്ന് മാനേജര്‍ അറിയിച്ചു.
പത്രങ്ങളില്‍ ഈ വാര്‍ത്ത വന്നതോടെ ഗവണ്‍മെന്റിന്റെ സോഷ്യല്‍ സര്‍വീസ് ഡിപ്പാര്‍ട്ടുമെന്റുകാര്‍ വേഗം ഈ പ്രശ്‌നത്തില്‍ ഇടപെടണമെന്ന് ജനങ്ങള്‍ ആവശ്യപ്പെട്ടിരിക്കുകയാണ്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക