സിറിയയില്‍ ഇസ്ലാമിക് സ്‌റ്റേറ്റ്(ഐസിസ്) ഭീകരരുടെ പിടിയിലായിരുന്ന അമേരിക്കന്‍ മനുഷ്യാവകാശ പ്രവര്‍ത്തക കെയ്‌ല മുള്ളര്‍ കൊല്ലപ്പെട്ടതായി അമേരിക്ക സ്ഥിരീകരിച്ചു.അമേരിക്കന്‍ രഹസ്യാന്വേഷണ ഏജന്‍സികളാണ് മുള്ളര്‍ മരിച്ചതായി സ്ഥിരീകരിച്ചത്. മുള്ളറുടെ മരണം സ്ഥിരീകരിച്ചതായി അവരുടെ കുടുംബം ചൊവ്വാഴ്ച പത്രക്കുറിപ്പിലൂടെ അറിയിച്ചു. തടവിലിരിക്കെ 2014ല്‍ മുള്ളര്‍ അയച്ച കത്തിന്റെ പകര്‍പ്പും അവര്‍ പുറത്തുവിട്ടു. മുള്ളറുടെ മരണത്തില്‍ അമേരിക്കന്‍ പ്രസിഡന്റ് ബറാക്ക് ഒബാമ അനുശേചനം രേഖപ്പെടുത്തി. മരണത്തിന് ഉത്തരവാദികളായ ഭീകരരെ കണ്ടെത്തുകയും നിയമത്തിനു മുന്നില്‍ കൊണ്ടുവരുകയും ചെയ്യുമെന്നും അദ്ദേഹം പറഞ്ഞു.
2013 ആഗസ്റ്റിലാണ് അരിസോണ സ്വദേശിയായ 26കാരി കെയ്‌ല മുള്ളര്‍ ഐസിസ് തടവിലാകുന്നത്. 6 മില്യണ്‍ യു.എസ് ഡോളറും ന്യൂറോസയന്റിസ്റ്റായ ആഫിയ സിദ്വിഖിയുടെ മോചനവുമായിരുന്നു ഇവരെ വിട്ടയക്കുന്നതിനായി ഐസിസ് ആവശ്യപ്പെട്ടു വന്നിരുന്നത്. എന്നാല്‍, സിറിയയിലെ റാഖ പട്ടണത്തില്‍ ജോര്‍ദാന്‍ യുദ്ധവിമാനങ്ങള്‍ വെള്ളിയാഴ്ച നടത്തിയ ആക്രമണത്തില്‍ മുള്ളര്‍ കെട്ടിടാവശിഷ്ടങ്ങള്‍ക്കിടയില്‍ കുഴിച്ചുമൂടപ്പെട്ടെന്ന് ഐസിസ് അറിയിക്കുകയായിരുന്നു. മുള്ളറെ തടവിലാക്കിയിരുന്ന കെട്ടിടം ആക്രമണത്തില്‍ തകര്‍ന്നടിഞ്ഞതിന്റെ ദൃശ്യം മാത്രമാണ് ഐസിസ് പുറത്തുവിട്ടിരുന്നത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha