യുകെയില്‍ എസക്‌സിനടുത്തുള്ള ബ്രെയിന്‍ ട്രീ എന്ന സ്ഥലത്തെ ആന്‍ഡി വാട്ടര്‍മാന്‍ എന്ന ഡ്രൈവര്‍ക്ക് ഇപ്പോള്‍ ആകെ ഒരു ഹീറോ പരിവേഷമാണുള്ളത്. ഡബിള്‍ ഡെക്കര്‍ ബസിന്റെ ഡ്രൈവറായ വാട്ടര്‍മാന്‍ തന്റെ ലാസ്റ്റ് ട്രിപ്പിലെ അവസാന യാത്രക്കാരനേയും ഇറക്കിയതിനുശേഷം ബസ് തിരികെ ഡിപ്പോയിലേയ്ക്ക് കൊണ്ടു വരികയായിരുന്നു.

 അപ്പോഴാണ് തീപിടിച്ച ഒരു കെട്ടിടത്തിന്റെ സമീപത്ത് സഹായം ചോദിച്ചു നിലവിളിക്കുന്ന ആളുകളെ കണ്ടത്. കെട്ടിടത്തിന്റെ മുകളിലത്തെ നിലയിലൂടെ പുറത്തു വന്നു കൊണ്ടിരുന്ന കറുത്ത പുക പടലങ്ങള്‍ക്കിടയിലൂടെ ആ കെട്ടിടത്തിന്റെ ഒരു ബ്‌ളോക്ക് മാത്രമേ കാണാന്‍ കഴിയുന്നുണ്ടായിരുന്നുള്ളൂ. എങ്കിലും അകത്ത് നിന്നും ഒരാള്‍ രക്ഷപ്പെടുത്താന്‍ അഭ്യര്‍ത്ഥിക്കുന്നതായി കണ്ടു. എന്തെങ്കിലും ചെയ്താലേ പറ്റൂ എന്നു മനസ്സിലായി. ഫയര്‍ സര്‍വ്വീസുകാരെ വിളിച്ചിട്ടുണ്ടായിരുന്നെങ്കിലും അവര്‍ എത്തിയിരുന്നില്ല.

ആന്‍ഡി വാട്ടര്‍മാന്‍ തന്റെ ഡബിള്‍ഡെക്കറിനെ ആ കെട്ടിടത്തോട് കഴിയുന്നത്ര ചേര്‍ത്തു നിര്‍ത്തി. തീയ്ക്കുള്ളിലായിരുന്നയാള്‍ക്ക് വാട്ടര്‍മാന്‍ എന്തു ചെയ്യാനാണ് ഉദ്ദേശിക്കുന്നതെന്ന് മനസ്സിലായി. കെട്ടിടത്തില്‍ നിന്നും ഏകദേശം അഞ്ചടിയോളം താഴത്തുള്ള ഡബിള്‍ഡക്കറിനു മുകളിലേയ്ക്കു രണ്ടും കല്പിച്ച് അയാള്‍ ചാടി. ബസിന്റെ മേല്‍ക്കൂരയില്‍ തന്നെ കൃത്യമായി അയാള്‍ വന്നു വീണു. പക്ഷേ അപ്പോഴാണ്‌ മനസ്സിലായത് അയാള്‍ കുളിച്ചു കൊണ്ടു നില്‍ക്കുമ്പോഴാണ് കെട്ടിടത്തിന് തീപിടിച്ചത്. അതു കൊണ്ട് നൂല്‍ബന്ധമില്ലാതെയായിരുന്നു ബസിനു മുകളിലേയ്ക്ക് ചാടിയത്. പിന്നാലെയെത്തിയ ഫയര്‍ സര്‍വീസുകാര്‍ നല്‍കിയ ടവല്‍ ഉപയോഗിച്ച് നാണം മറച്ചു. ഭയം കൊണ്ട് കിടുകിടെ വിറയ്ക്കുകയായിരുന്നു അയാള്‍ എന്നതൊഴിച്ച് അയാള്‍ക്ക് മറ്റൊരു ദോഷവും പറ്റിയില്ല.

വാട്ടര്‍മാന്റെ അവസരോചിതമായ ഇടപെടല്‍ കൊണ്ടാണ് ഒരു ജീവന്‍ നഷ്ടപ്പെടാതിരുന്നതെന്ന്, എസ്‌ക്‌സ് ഫയര്‍ ആന്റ് റെസ്‌ക്യൂവിന്റെ ഒരു വക്താവ് പറഞ്ഞു. ആന്‍ഡി ജോലി ചെയ്യുന്ന ഫസ്റ്റ് എസക്‌സ് ബസ് കമ്പനിയുടെ ബോസിനും ആന്‍ഡിയെ കുറിച്ച് അഭിമാനമാണുള്ളത്.

തീയ്ക്കുള്ളില്‍ അകപ്പെട്ട ആളിന്റെ മനസ്സിലെ തീ കെടുത്താന്‍ \'വാട്ടര്‍മാന്‍\' തന്നെ എത്തിയത് കൗതുകമുണര്‍ത്തുന്ന യാദൃച്ഛികത തന്നെ.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha