ഐഎസ് ഭീകരര്‍ വീണ്ടും ലോകത്തെ ഞെട്ടിച്ച് കൊടും ക്രൂരത ചെയ്തു. ഐഎസ് ഭീകരരുടെ കൊടും ക്രൂരതയ്ക്ക് കീഴടങ്ങിയത് ഒരു കൂട്ടം ക്രിസ്ത്യാനികളാണ്. ലിബിയയിലാണ് ക്രിസ്ത്യാനികളെ ഇസ്‌ലാമിക് സ്‌റ്റേറ്റ് ഭീകരര്‍ കൂട്ടക്കൊല ചെയ്തിരിക്കുന്നത്. 21 ഈജിപ്തുകാരെ കഴുത്തറുത്തു കൊല്ലുന്ന വീഡിയോയാണ് പുറത്തുവിട്ടത്. ശക്തമായി തിരിച്ചടിക്കുമെന്ന് ഈജിപ്ത് പ്രഖ്യാപിച്ചിട്ടുണ്ട്. ഈജിപ്ഷ്യന്‍ തൊഴിലാളികളാണ് ഇത്തവണ ഐഎസ് ക്രൂരതയ്ക്ക് ഇരയായതെന്നാണ് റിപ്പോര്‍ട്ടുകള്‍.
 21 പേരെ വരിയായി നിര്‍ത്തി കഴുത്തറുക്കുന്നതിന്റെ ദൃശ്യങ്ങളാണ് പുറത്തുവിട്ടിരിക്കുന്നത്. കോപ്റ്റിക് ഓര്‍ത്തഡോക്‌സ് സഭാംഗങ്ങളാണ് കൊല്ലപ്പെട്ടവരെല്ലാം. വടക്കന്‍ ഈജിപ്തിലെ ദരിദ്രതൊഴിലാളി കുടുംബങ്ങളില്‍ നിന്നുള്ളവരാണ് എല്ലാവരും. ഐഎസിന്റെ ട്രിപ്പോളി വിഭാഗമായ വിലായത്ത് ട്രിപ്പോളി കൂട്ടക്കുരുതിയുടെ ഉത്തരവാദിത്തം ഏറ്റെടുത്തു. ക്രിസ്ത്യന്‍ രാജ്യങ്ങള്‍ക്ക് രക്തം കൊണ്ടുള്ള സന്ദേശം എന്ന തലക്കെട്ടിലാണ് വീഡിയോ.

ഉസാമ ബിന്‍ലാദന്റെ മൃതദേഹമൊഴുക്കിയ കടലില്‍ ക്രിസ്ത്യാനികളുടെ രക്തമൊഴുക്കുമെന്ന് തീവ്രവാദികള്‍ മുന്നറിയിപ്പ് നല്‍കിയിട്ടുണ്ട്. തുടര്‍ന്ന് കൊല്ലപ്പെട്ടവരുടെ രക്തം കടലില്‍ ഒഴുകുന്ന ദൃശ്യങ്ങളും കാണാം. ഇറ്റലിയുടെ കിഴക്കുഭാഗത്തെത്തിയ ഭീകരര്‍ അള്ളാഹുവിന്റെ സഹായത്താല്‍ റോം പിടിച്ചടക്കുമെന്നും അവകാശപ്പെടുന്നു. അതേസമയം, മനുഷ്യത്വരഹിതമായ ഈ കൂട്ടക്കുരുതിക്ക് അതേ നാണയത്തില്‍ തിരിച്ചടി നല്‍കുമെന്ന് രാജ്യത്തെ അഭിസംബോധന ചെയ്ത ഈജിപ്ഷ്യന്‍ പ്രസിഡന്റ് അബ്ദല്‍ ഫത്താ അല്‍ സിസി പറഞ്ഞു. ദേശീയ സുരക്ഷാസേന അടിയന്തര യോഗം ചേരും. ലിബിയയിലേക്ക് പോകരുതെന്ന് ഈജിപ്ഷ്യന്‍ പൗരന്‍മാരോട് സര്‍ക്കാര്‍ നിര്‍ദേശിച്ചു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha