യു.എസ് പ്രസിഡന്റ് ബറാക് ഒബാമയെ കൊലപ്പെടുത്താന്‍ തയ്യാറായ മൂന്ന് യുവാക്കള്‍ യു.എസിലെ ബ്രൂക്ക്‌ലിനില്‍ നിന്നും അറസ്റ്റിലായി. ഉസ്ബക്കിസ്ഥാന്‍ സ്വദേശിയായ അബ്ദുള്‍റസൂല്‍ ഹസനോവിച്ച് ജുറാബോവ്(24), അബ്‌റോര്‍ ഹബിബോവ്(30), ഖസാക്കിസ്ഥാന്‍ സ്വദേശിയായ അഖ്‌റോര്‍ സൈദാഖ്‌മേതോവ്(19), എന്നിവരാണ് അറസ്റ്റിലായത്. ഇവര്‍ക്ക് ഇസ്ലാമിക് സ്‌റ്റേറ്റ് തീവ്രവാദികളുമായി ബന്ധമുണ്ടെന്ന് പൊലീസ് സ്ഥിരീകരിച്ചു.
ജോണ്‍ എഫ്. കെന്നഡി അന്താരാഷ്ട്ര വിമാനത്താവളത്തില്‍ നിന്നും ഇസ്താംബുളിലേക്ക് കടക്കാന്‍ ശ്രമിക്കുന്നതിനിടെയാണ് സൈദാഖ്‌മേതോവ് അറസ്റ്റിലായത്. ഇയാള്‍ക്ക് ഐ.എസില്‍ ചേരാനുള്ള ഒത്താശകള്‍ ചെയ്തു കൊടുത്തത് ഹബിബോവാണ്. 2014 ആഗസ്റ്റില്‍ പ്രസിഡന്റിനെ വധിക്കും എന്ന് ഭീഷണി മുഴക്കിയതോടെയാണ് ജുറാബോവ് നോട്ടപ്പുള്ളിയായത്. ന്യൂയോര്‍ക്കില്‍ നിന്നും ഇസ്താംബുളിലേക്ക് യാത്ര ചെയ്യാനുള്ള ടിക്കറ്റ് ഇയാളും നേരത്തെ തയ്യാറാക്കിയിരുന്നു. ടര്‍ക്കിയില്‍ നിന്നും സിറിയയിലെത്തി ഐഎസിന് വേണ്ടി അവിടെ ജിഹാദ് നടത്തുകയായിരുന്നു ഇവരുടെ ലക്ഷ്യം.
ഐ.എസിനെ പിന്തുണയ്ക്കുന്ന ഇവര്‍ക്കെതിരെ ചാരക്കേസാണ് ചുമത്തിയിരിക്കുന്നത്. യു.എസിലും അമേരിക്കന്‍ പ്രസിഡന്റിനും എഫ്.ബി.ഐ ഏജന്റുമാര്‍ക്കും നേരെ തീവ്രവാദികളുടെ അനുമതി ലഭിക്കുന്ന പക്ഷം ആക്രമണം നടത്താന്‍ ഇവര്‍ തയ്യാറായിരുന്നെന്ന് അധികൃതര്‍ അറിയിച്ചു. ഇവര്‍ക്കെതിരെയുള്ള കുറ്റം തെളിഞ്ഞാല്‍ 15 വര്‍ഷം വരെ തടവ് ശിക്ഷ ലഭിച്ചേക്കാം.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha