ഐസിസ് ഭീകരനായ ജിഹാദി ജോണ്‍ ആരാണെന്ന് തിരിച്ചറിഞ്ഞതിനെ തുടര്‍ന്ന് കുവൈറ്റിലുള്ള അയാളുടെ കുടുംബത്തെ പോലീസ് ചോദ്യം ചെയ്തു. അമേരിക്കന്‍ പത്രപ്രവര്‍ത്തകനായ ജെയിംസ് ഫോളിയെ തലയറുത്തു കൊല്ലുന്ന വീഡിയോ, വാര്‍ത്തകളില്‍ കാണിച്ച അന്നു തന്നെ മുഖം മൂടി ധരിച്ചു നില്‍ക്കുന്ന കൊലയാളിയെ അവന്റെ ശബ്ദത്തില്‍ നിന്നും തന്റെ മകനാണതെന്ന് തിരിച്ചറിഞ്ഞിരുന്നുവെന്ന്, മുഹമ്മദെന്ന ജിഹാദി ജോണിന്റെ അമ്മ 47 കാരിയായ ഘനേയ എംവാസി പോലീസിനോടു പറഞ്ഞു. കഴിഞ്ഞ വര്‍ഷം ഓഗസ്റ്റില്‍ ഈ വീഡിയോ പുറത്തു വന്നതിനുശേഷം അപ്പോള്‍ തന്നെ അവര്‍ ഈ വിവരം അധികൃതരെ അറിയിച്ചിരുന്നുവോ എന്നു വ്യക്തമല്ല. എങ്കിലും കഴിഞ്ഞ സെപ്തംബര്‍ മുതലെങ്കിലും മുഹമ്മദാണ് ജിഹാദി ജോണെന്ന് അധികൃതര്‍ക്ക് അറിയാമായിരുന്നുവെന്നതാണ് വസ്തുത.

ഇറാക്കില്‍ നിന്ന് അനധികൃതമായി കുവൈറ്റിലെത്തിയവരെ ഉള്‍ക്കൊള്ളിച്ചിരിക്കുന്ന ബേദൂണ്‍ വിഭാഗത്തില്‍ പെടുന്നവരാണ് എംവാസി കുടുംബമെന്ന് ജിഹാദി ജോണിന്റെ 51 കാരനായ പിതാവ് ജസെം എംവാസി പറഞ്ഞു. 1993 വരെ കുവൈറ്റില്‍ പോലീസ് ഓഫീസറായി ജോലി നോക്കിയതിനുശേഷം ജസെം ബ്രിട്ടനിലേക്കു പോയി. തുടര്‍ന്ന് തന്റെ ഭാര്യയേയും, പില്‍ക്കാലത്ത് ജിഹാദി ജോണായി മാറിയ മുഹമ്മദ് അടക്കമുള്ള മക്കളേയും ബ്രിട്ടനിലേയ്ക്ക് കൊണ്ടു വരികയായിരുന്നു. നോര്‍ത്ത് വെസ്റ്റ് ലണ്ടനില്‍ താമസമാക്കിയ അവര്‍ ചില വര്‍ഷങ്ങള്‍ക്കുശേഷം വീണ്ടും കുവൈറ്റിലേയ്ക്കു മടങ്ങി.

ബ്രിട്ടനില്‍ നിന്നും 2009 ല്‍ കുവൈറ്റിലെത്തിയ മുഹമ്മദ് 2010 ഏപ്രില്‍ വരെ അവിടെ ഒരു കമ്പ്യൂട്ടര്‍ സ്ഥാപനത്തില്‍ ജോലി നോക്കിയിരുന്നു. വിവാഹിതനാകാന്‍ ശ്രമിച്ചെങ്കിലും വേണ്ടത്ര പണം അപ്പോള്‍ മുഹമ്മദിന്റെ പക്കലുണ്ടായിരുന്നില്ലത്രേ. കൂടാതെ അയാളുടെ പ്രവര്‍ത്തനങ്ങളില്‍ കുവൈറ്റ് അധികൃതര്‍ക്ക് സംശയം ഉണ്ടായതിനാല്‍ കുവൈറ്റില്‍ കടക്കരുതെന്ന് അയാളെ വിലക്കുകയും ചെയ്തു. ഇതോടെ വധുവിന്റെ വീട്ടുകാര്‍ വിവാഹത്തില്‍ നിന്നും പിന്‍മാറി. അങ്ങനെ മുഹമ്മദ് ലണ്ടനിലേക്കു തിരിച്ചു പോയി.

2013 നുശേഷം മുഹമ്മദുമായി യാതൊരു സമ്പര്‍ക്കവും ഉണ്ടായിരുന്നില്ലെന്ന് ജസെം എംവാസി പോലീസിനോടു പറഞ്ഞു. മനുഷ്യാവകാശ പ്രവര്‍ത്തനങ്ങളുമായി ബന്ധപ്പെട്ട് സിറിയയിലേക്കു പോകുകയാണെന്ന് അറിയിച്ചു കൊണ്ട് തുര്‍ക്കിയില്‍ നിന്നാണ് മുഹമ്മദ് അവസാനമായി അച്ഛനെ വിളിച്ചതെന്നാണ് അയാള്‍ പറയുന്നത്. അന്ന്, അച്ഛനോട് എന്തെങ്കിലും തെറ്റ് ചെയ്തിട്ടുണ്ടെങ്കില്‍ ക്ഷമിക്കണമെന്ന് അവന്‍ അപേക്ഷിച്ചിരുന്നതായും അച്ഛന്‍ ഓര്‍ക്കുന്നു.

തികഞ്ഞ യാഥാസ്ഥിതിക മുസ്ലീങ്ങളായ എംവാസിയും കുടുംബവും ഐസിസുമായി ബന്ധപ്പെട്ട് തങ്ങളുടെ പേര് പ്രചരിക്കുന്നതില്‍ തികച്ചും അസ്വസ്ഥരാണ്. ജിഹാദി ജോണിന്റെ ഒരു കസിന്‍ അടുത്തിടെ അവനായി തയ്യാറാക്കിയ ഒരു സന്ദേശത്തില്‍, ഞങ്ങളെല്ലാവരും നിന്നെ വെറുക്കുന്നുവെന്നും, നീ വധിക്കപ്പെട്ടുവെന്നറിയുന്ന സന്തോഷവാര്‍ത്തയ്ക്കായി കുടുംബം കാത്തിരിക്കുകയും ആണെന്നാണ് അറിയിച്ചത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha