ഇങ്ങനെയും അമ്മമാര്‍ ഈ ലോകത്തുണ്ടോ ആരും ചോദിച്ചു പോകും. എല്ലാവരുടെയും ശ്രദ്ധ തന്നിലേയ്ക്ക് ആകര്‍ഷിക്കാനണ് മകനെ ഇങ്ങനെയൊക്കെ ചെയ്തതെന്നാണ് ആ സ്ത്രീ പറഞ്ഞ ന്യായം.
യുഎസിലെ കെന്റക്കിയിലുള്ള ലേസി സ്പിയേഴ്‌സ് എന്ന 27 കാരി ഇടയ്ക്കിടെ ട്വീറ്റ് ചെയ്യുമായിരുന്നു. എന്റെ മകനാണെനിക്കെല്ലാം. അവനെ എനിക്കെന്തിഷ്ടമാണെന്നോ എന്നൊക്കെ! അവളുടെ ട്വീറ്റ് കാണുന്ന ബന്ധുക്കളും സുഹൃത്തുക്കളുമെല്ലാം ഉടനെ തന്നെ അവളെ ഫോണില്‍ വിളിച്ച് ആശ്വസിപ്പിക്കുകയോ നേരില്‍ വന്നു കാണുകയോ ഒക്കെ ചെയ്യും. കാരണം ലേസിയുടെ 5 വയസ്സുള്ള മകന്‍ ഗാമെറ്റ് പോള്‍ സ്പിയേഴ്‌സിന് രക്തത്തില്‍ സോഡിയത്തിന്റെ അളവ് കൂടുന്ന അസുഖമുണ്ടെന്നും അത് വല്ലാതെ കൂടിയാല്‍ ആ കുഞ്ഞ് മരിച്ചു പോയേക്കാമെന്നും എല്ലാവര്‍ക്കും അറിയാം. കുഞ്ഞിന് ഈ അസുഖമുണ്ടെന്നറിഞ്ഞതു മുതല്‍ ലേസി വല്ലാത്ത മാനസിക സംഘര്‍ഷത്തിലാണെന്ന് അവളെ അറിയുന്ന എല്ലാവര്‍ക്കും അറിയാം. അതുകൊണ്ട് ബന്ധുക്കളും സ്‌നേഹിതരുമെല്ലാം അടിയ്ക്കടി അവളെ ഫോണില്‍ വിളിയ്ക്കുകയോ നേരില്‍ ചെന്നു കാണുകയോ ഒക്കെ ചെയ്യുമ്പോള്‍ അവള്‍ സന്തോഷവതിയായി കാണാറുണ്ടെന്ന് എല്ലാവരും മനസ്സിലാക്കിയിട്ടുണ്ട്.
എന്നാല്‍ എല്ലാവരുടെയും പ്രാര്‍ത്ഥനകള്‍ വിഫലമാക്കി കൊണ്ട് കുഞ്ഞു ഗാമെറ്റ് മരിച്ചു പോയി. അവനെ ചികിത്സിച്ചു കൊണ്ടിരുന്ന ഡോക്ടര്‍മാര്‍ക്ക് വേണ്ട മരുന്നുകള്‍ നല്‍കിയിട്ടും സോഡിയം അവന്റെ രക്തത്തിലുണ്ടായത് സംശയങ്ങള്‍ക്കിടയാക്കി. തുടര്‍ന്നുള്ള അന്വേഷണത്തില്‍ പുറത്തു വന്ന വിവരങ്ങള്‍ ബന്ധുക്കളേയും സ്‌നേഹിതരേയും ഒന്നാകെ ഞെട്ടിച്ചു കളഞ്ഞു.
ആശുപത്രിയിലെ സിസിടിവി ദൃശ്യങ്ങളില്‍ രണ്ടു തവണ കുട്ടിയേയും കുട്ടി ടോയ്‌ലറ്റിലേയ്ക്കു പോകുന്ന ലേസിയുടെ കൈയ്യില്‍ ഒരു കണക്ടര്‍ ട്യൂബ് ഉള്ളതായി കാണുന്നുണ്ട്. ടോയ്‌ലറ്റില്‍ പോയി വന്നതിനുശേഷം കുഞ്ഞ് വല്ലാത്ത ബുദ്ധിമുട്ടിലാകുകയും ചെയ്യുന്നുണ്ട്. അവളുടെ മകന് ആഹാരം നല്‍കുന്നതിനായി വയറ്റില്‍ ഒരു ബാഗ് ഘടിപ്പിച്ചിട്ടുണ്ടായിരുന്നു. ആ ബാഗിലൂടെ അമിത അളവില്‍., സോഡിയം ക്ലോറൈഡ് എന്ന സാധാരണ ഉപ്പ് കലക്കി കുഞ്ഞിന് കൊടുത്തിരുന്നത് ലേസി തന്നെയായിരുന്നു. അന്വേഷണത്തിനായി വീട്ടില്‍ അധികൃതരെത്തുന്നതിനു മുമ്പ് അത്തരത്തിലൊരു ഫീഡിംഗ് ബാഗ് വീട്ടിലുള്ളത് എടുത്ത് ഒളിപ്പിക്കാന്‍ ലേസി കൂട്ടുകാരിയോട് ആവശ്യപ്പെട്ടിരുന്നു. എന്നാല്‍ അത് ചെയ്യുന്നതിനു മുമ്പ് അധികൃതര്‍ പിടിച്ചെടുത്തു. ഒടുവില്‍ സാഹചര്യത്തെളിവുകള്‍ എല്ലാം ലേസിക്ക് എതിരായപ്പോള്‍ അവളെല്ലാം പോലീസിനോട് സമ്മതിച്ചു.
വീട്ടുകാരും, ബന്ധുക്കളും , സ്‌നേഹിതരും സഹപ്രവര്‍ത്തകരുമെല്ലാം എപ്പോഴും അവളെ കുറിച്ച് ഓര്‍ത്തിരിക്കുന്നതിനും ഇടയ്ക്കിടെ അവളെ വിളിക്കുന്നതിനുമെല്ലാം ഇടയാക്കിയത് മകന് രോഗം വന്നതോടെയാണെന്നും , ആ രീതികള്‍ എപ്പോഴും തുടരുന്നതിന് മകന്‍ രോഗിയായി തുടരേണ്ടത് ആവശ്യമായിരുന്നതിനാലാണ് അങ്ങനെയൊക്കെ ചെയ്തതെന്നുമായിരുന്നു അവളുടെ കുറ്റ സമ്മതം. ലേസി തന്നെയാണ് കുട്ടിയെ കൊന്നതെന്ന് കോടതി വിധിച്ചിട്ടുണ്ട്.  ഉപ്പും ചോറും തിന്നതിന്റെ കൂറ് ഞാനെന്നും കാണിയ്ക്കുമെന്നുള്ള ഒരു ചൊല്ല് നമ്മുടെ ഭാഷയിലുണ്ട്. ഉപ്പ് നന്ദിയുടെയും സ്‌നേഹത്തിന്റെയും ലക്ഷണമായതിനാലാണ് അങ്ങനെ പറയുന്നത്. ഇവിടെ അത് ഉപ്പിന്റെ മറവിലെ ചതിയായി മാറി എന്നു മാത്രം.