ഭീകരര്‍ തട്ടിക്കൊണ്ടുപോയ മകനെ അന്വേഷിച്ചെത്തിയ വൃദ്ധയെക്കൊണ്ട് ഐസിസ് ഭീകരര്‍ മകന്റെ മൃതദേഹം തീറ്റിച്ചുവെന്ന് ബ്രിട്ടീഷ് സൈനികന്റെ വെളിപ്പെടുത്തല്‍. ഇറാക്കില്‍ ഇസ്ലാമിക് സ്‌റ്റേറിനെതിരെ പോരാടുന്ന ബ്രിട്ടീഷ് സൈനികന്‍ യാസിര്‍ അബ്ദുള്ള എന്ന മുപ്പത്താറുകാരനാണ് ഒരു അഭിമുഖത്തില്‍ ഞെട്ടിപ്പിക്കുന്ന ഈ വെളിപ്പെടുത്തല്‍ നടത്തിയത്. ബന്ദിയാക്കിയ കുര്‍ദിഷ് യുവാവിന്റെ മൃതദേഹമാണ് സ്വന്തം അമ്മയെക്കൊണ്ട് തീറ്റിച്ചത്.
മകനെ അന്വേഷിച്ച് മൊസൂളിലെ ഐസിസ് ആസ്ഥാനത്ത് എത്തിയപ്പോഴായിരുന്നു ഈ ക്രൂരതയെന്നാണ് യാസിറിന്റെ വെളിപ്പെടുത്തല്‍. മകനെ വിട്ടുതരണമെന്നാവശ്യപ്പെട്ട് എത്തിയ വൃദ്ധയെ ഭീകരര്‍ സ്വീകരിച്ചിരുത്തി. ദീര്‍ഘയാത്ര കഴിഞ്ഞു വന്നതിനാല്‍ ക്ഷീണമുണ്ടാകുമെന്നുപറഞ്ഞ് ചായയും ചോറും സൂപ്പും ഇറച്ചിക്കറിയും നല്‍കി. അതുകഴിക്കുന്നതിനിടെ തന്റെ മകന്‍ എവിടെയുണ്ടെന്ന് വൃദ്ധ ചോദിക്കുന്നുണ്ടായിരുന്നുവെങ്കിലും ഭീകരര്‍ ചിരിക്കുക മാത്രമാണ് ചെയ്തത്. വൃദ്ധ ഭക്ഷണം കഴിച്ചു കഴിഞ്ഞപ്പോഴാണ് മകന്റെ ഇറച്ചിയാണ് അവരിപ്പോള്‍ കഴിച്ചതെന്ന് ഭീകരര്‍ വെളിപ്പെടുത്തിയത്.
ഭീകരരുടെ മറ്റുചില കൊടും ക്രൂരതകളും യാസിര്‍ വെളിപ്പെടുത്തുന്നുണ്ട്. ബന്ദികള്‍ ഏതെങ്കിലും തരത്തില്‍ ചെറുത്തുനില്‍പ്പ് നടത്തുന്നു എന്നുതോന്നിയാല്‍ അവരെ ക്രൂരമായി കൊലപ്പെടുത്താന്‍ ഭീകരര്‍ ഒരു മടിയും കാണിച്ചിരുന്നില്ല. ജീവനോടെ കുഴിച്ച് മൂടുക, പച്ചയ്ക്ക് കത്തിക്കുക തുടങ്ങിയവയാണ് ഭീകരരുടെ ക്രൂരവിനോദങ്ങള്‍. ഇപ്പോള്‍ ബ്രിട്ടനിലുള്ള യാസിര്‍ ഉടന്‍തന്നെ ഇറാക്കിലേക്ക് പോകാന്‍ തയ്യാറെടുക്കുകയാണ്. ഭീകരരെ ഇല്ലാതാക്കുന്നതുവരെ ഇറാക്കില്‍ പോരാടുമെന്നും യാസിര്‍ പറഞ്ഞു. യോക്‌ഷെയര്‍ സ്വദേശിയാണ് നാലുകുട്ടികളുടെ അച്ഛനായ യാസിര്‍.