കൊറോണ വൈറസ് മനുഷ്യനില്‍ നിന്ന് മനുഷ്യനിലേക്ക്... അമേരിക്കയില്‍ ഒരാളില്‍ നിന്നു മറ്റൊരാളിലേക്ക് കൊറോണ വൈറസ് ബാധിച്ചു. ഇത്തരത്തിലുള്ള ആദ്യത്തെ കേസാണ് അമേരിക്കയില്‍ റിപ്പോര്‍ട്ട് ചെയ്തിരിക്കുന്നത്. ചിക്കാഗോയില്‍ ഭാര്യയില്‍ നിന്ന് ഭര്‍ത്താവിനാണ് കൊറോണ ബാധിച്ചത്. വുഹാനില്‍നിന്നും കൊറോണ വൈറസ് ബാധിച്ച് നാട്ടിലെത്തിയ ചിക്കാഗോ സ്വദേശിയായ സ്ത്രീയുടെ അറുപതുകാരനായ ഭര്‍ത്താവിനാണ് രോഗം സ്ഥിരീകരിച്ചിരിക്കുന്നത്. ഇയാളുടെ നില തൃപ്തികരമാണെന്ന് ചിക്കാഗോ ആരോഗ്യ വിഭാഗം അറിയിച്ചു. ഭാര്യ ചിക്കാഗോയിലെ ആശുപത്രിയില്‍ ഐസൊലേഷന്‍ വാര്‍ഡില്‍ ചികിത്സയിലാണ്. പിതാവിനെ പരിചരിക്കാനായാണ് ഇവര്‍ വുഹാനില്‍ പോയത്. ഇല്ലിനോയിസില്‍ കൊറോണ രണ്ടു പേര്‍ക്ക് സ്ഥിരീകരിച്ചിട്ടുണ്ട്. ഇവിടെ 21 പേര്‍ നിരീക്ഷണത്തിലുമുണ്ട്.
യുഎസില്‍ ആകെ ആറു പേര്‍ക്ക് ഇതിനകം രോഗം സ്ഥിരീകരിച്ചു. രാജ്യത്ത് 165 പേര്‍ നിരീക്ഷണത്തിലുണ്ടെന്നും ആരോഗ്യ വിഭാഗം പറയുന്നു. ചൈനയില്‍ കൊറോണ വൈറസ് മൂലം ഇതുവരെ 170 പേരാണ് മരിച്ചത്. ഹുബൈ പ്രവിശ്യയില്‍ 24 മണിക്കൂറിനുള്ളില്‍ പുതുതായി 38 മരണം റിപ്പോര്‍ട്ടു ചെയ്തു. ആശുപത്രികളില്‍ ചികിത്സയിലുള്ളവരുടെ എണ്ണം 7711 ആയി ഉയര്‍ന്നു. രോഗബാധിതരുമായി സമ്പര്‍ക്കമുള്ളതിന്റെ പേരില്‍ നിരീക്ഷണത്തിലുള്ളവ രുടെ എണ്ണം 88,693 ആണെന്ന് ഇതുവരെയുള്ള കണക്കുകള്‍ വ്യക്തമാക്കുന്നതായി ദേശീയ ആരോഗ്യ കമ്മീഷന്‍ അറിയിച്ചു.

മറ്റു രാജ്യങ്ങളിലും കൊറോ ണബാധിതരുടെ എണ്ണം പെരുകുന്ന സാഹചര്യത്തില്‍ ലോകമെങ്ങും മുന്‍കരുതല്‍ നടപടികള്‍ ശക്തമാക്കി. ഇതിനിടെ കൊറോണ വൈറസിന്റെ വ്യാപനത്തെ നേരിടാന്‍ ലോകാരോഗ്യ സംഘടന (ഡബ്യുഎച്ച്ഒ) ആഗോള ആരോഗ്യ അടിയന്തരാവസ്ഥ പ്രഖ്യാപിച്ചു. ലോകം മുഴുവന്‍ ഇപ്പോള്‍ ജാഗ്രത പാലിക്കേണ്ടതുണ്ടെന്നും രാജ്യങ്ങള്‍ സുരക്ഷാ മുന്‍കരുതല്‍ സ്വീകരിക്കണമെന്നും മുന്നറിയിപ്പുണ്ട്.