ബൊക്കോ ഹറാം നേതാവ് അബൂബക്കര്‍ ഷെക്കാവു, സംഘടനയുടെ ട്വിറ്റര്‍ അക്കൗണ്ടില്‍ കൊടുത്ത ഓഡിയോ സന്ദേശത്തിലൂടെ ഇസ്‌ലാമിക് സ്‌റ്റേറ്റുമായി ഉറ്റബന്ധമുണ്ടെന്ന് അവകാശപ്പെട്ടു. നൈജീരിയയില്‍ ഇസ്‌ലാമികരാജ്യം സ്ഥാപിക്കുകയെന്ന ലക്ഷ്യവുമായി ഭീകരപ്രവര്‍ത്തനം നടത്തുകയാണ് ബൊക്കോ ഹറാം. വടക്കുകിഴക്കന്‍ നൈജീരിയയില്‍ 58 പേരുടെ മരണത്തിനിടയാക്കിയ ബോംബ് സ്‌ഫോടനം നടത്തിയതിനു പിന്നാലെയാണ് ഈ പ്രഖ്യാപനം.

ബൊക്കോ ഹറാം ഭീകരര്‍ക്ക് ഐഎസുമായി ബന്ധമുണ്ടെന്നു സ്ഥിരീകരിച്ചതായി നൈജീരിയന്‍ പ്രസിഡന്റ് ഗുഡ്‌ലക്ക് ജൊനാഥന്‍ കഴിഞ്ഞയാഴ്ച പറഞ്ഞിരുന്നു. ഇസ്‌ലാമിക് സ്‌റ്റേറ്റ്-ന്റെ അധീശത്വം അംഗീകരിച്ചുകൊണ്ടുള്ള ശപഥമെടുത്തതിനൊപ്പമാണ് ഓഡിയോ സന്ദേശത്തില്‍ ഷെക്കാവു ഐഎസ് ബന്ധം ഊട്ടിയുറപ്പിക്കുന്നത്. അടുത്തിടെയായി ബൊക്കോ ഹറാം പുറത്തുവിടുന്ന വിഡിയോകളില്‍ ഐഎസ് ശൈലിയില്‍ തലയറുത്തു കൊല്ലുന്ന ദൃശ്യങ്ങളുള്ളതു ശ്രദ്ധിക്കപ്പെട്ടിരുന്നെങ്കിലും ഇതാദ്യമായാണ് ബന്ധത്തിന് ഔദ്യോഗിക സ്ഥിരീകരണം നല്‍കുന്നത്.

വടക്കന്‍ ആഫ്രിക്കയും മധ്യപൂര്‍വദേശവും കേന്ദ്രമാക്കി പ്രവര്‍ത്തിക്കുന്ന വിവിധ ജിഹാദി പ്രസ്ഥാനങ്ങള്‍ പരസ്പര സഹകരണമുള്ള പ്രബലശക്തികളായി വളരുകയാണെന്നതിന്റെ തെളിവാണ് ബൊക്കോ ഹറാം തലവന്റെ പുതിയ വെളിപ്പെടുത്തലിലൂടെ വ്യക്തമാകുന്നത്. ഐഎസ് - ബൊക്കോ ഹറാം സഹകരണത്തിന്റെ കൂടുതല്‍ വിശദാംശങ്ങള്‍ ഇപ്പോള്‍ ലഭ്യമല്ല.

നൈജീരിയയുടെ അയല്‍രാജ്യങ്ങളായ ഛാഡ്, കാമറൂണ്‍, നൈജര്‍ തുടങ്ങിയ രാജ്യങ്ങളിലേക്കും സ്വാധീനം വ്യാപിപ്പിച്ചുകഴിഞ്ഞ ബൊക്കോ ഹറാമിന് ആറായിരത്തോളം സായുധാംഗങ്ങള്‍ ഉള്ളതായി പറയപ്പെടുന്നു. വടക്കുകിഴക്കന്‍ നൈജീരിയയില്‍ ഇതുവരെ 20,000 ചതുരശ്ര കിലോമീറ്ററോളം പ്രദേശം ഇവര്‍ കയ്യടക്കിക്കഴിഞ്ഞു.

1987-ല്‍ ലോക പൈതൃകപദവി ലഭിച്ച ചരിത്ര നഗരമായ ഹത്ര ഇസ്‌ലാമിക് സ്‌റ്റേറ്റ് ഭീകരര്‍ തകര്‍ത്തതായി ഇറാഖ് അധികൃതര്‍തന്നെ സ്ഥിരീകരിച്ചു. ചരിത്രനഗരി തകര്‍ത്തതില്‍ യുനെസ്‌കോ ശക്തമായ പ്രതിഷേധം രേഖപ്പെടുത്തി. കഴിഞ്ഞ വ്യാഴാഴ്ച മറ്റൊരു ചരിത്രനഗരമായ നിംറൂദ് ബുള്‍ഡോസറുകള്‍ ഉപയോഗിച്ച് ഐഎസ് നാമാവശേഷമാക്കിയിരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക