ബോഡി ഷെയ്മിങ്ങിന് വിധേയനായ ഒരു കുഞ്ഞിന്റെ സങ്കടം നിറഞ്ഞ വീഡിയോ സമൂഹമാധ്യമങ്ങളില്‍ പോയ നാളുകളില്‍ ചര്‍ച്ചയായിരുന്നു. അന്ന് കുഞ്ഞുവിദ്യാര്‍ഥിയായ ക്വാഡനായിരുന്നുവെങ്കില്‍ ഇന്ന് മറ്റൊരു കുഞ്ഞുമാലാഖ. ഞാന്‍ എന്തൊരു വിരൂപയാണ്. വിങ്ങിപ്പൊട്ടിയ നാലുവയസ്സുകാരിയെ സാന്ത്വനിപ്പിച്ച് മിഷേലും സമൂഹമാധ്യമവും. നിറത്തിന്റെ പേരില്‍ കുട്ടിക്കാലം മുതല്‍ വിവേചനം നേരിടുന്നവര്‍ നമ്മുടെ സമൂഹത്തിലേറെയാണ്. അത്തരത്തില്‍ തന്റെ നിറത്തേക്കുറിച്ച് വിഷമിക്കുന്ന ഒരു നാലുവയസ്സുകാരിയുടെ വീഡിയോ ആണ് ഇപ്പോള്‍ സമൂഹമാധ്യമത്തില്‍ വൈറലാകുന്നത്.

വെളുപ്പും മെലിഞ്ഞ രൂപവുമാണ് പലപ്പോഴും സൗന്ദര്യസങ്കല്‍പമായി എല്ലാവരും ധരിച്ചിരിക്കുന്നത്. അതുകൊണ്ടുതന്നെ നിറം, സൗന്ദര്യം എന്നിവയെ ചൊല്ലിയുള്ള വേര്‍തിരിവുകള്‍ ഇന്നും പലയിടങ്ങളിലും കാണാം. അത്തരത്തില്‍ തന്റെ നിറത്തേക്കുറിച്ച് വിഷമിക്കുന്ന ഒരു നാലുവയസ്സുകാരിയുടെ വീഡിയോ ആണ് ഇപ്പോള്‍ സമൂഹമാധ്യമത്തില്‍ വൈറലാകുന്നത്.

അരിയോന എന്ന പെണ്‍കുട്ടി ഷബ്റിയ എന്നു പേരുള്ള ഹെയര്‍സ്‌റ്റൈലിസ്റ്റിനരികിലേക്ക് തന്റെ മുടി വെട്ടാന്‍ വന്നതായിരുന്നു. ഷബ്റിയയുടെ ഫോണില്‍ മുടി വെട്ടുന്നതിന്റെ വീഡിയോ റെക്കോഡ് ചെയ്യുന്നതിനിടേയാണ് അരിയോന താന്‍ വിരൂപയാണല്ലോ എന്ന് പറയുന്നത്. അരിയോന ഇത് പറഞ്ഞതും ഷബ്റിയ അവളെ സാന്ത്വനിപ്പിക്കാന്‍ ശ്രമിക്കുന്നതും വീഡിയോയില്‍ കാണാം.

'അങ്ങനെ പറയരുത്... നീ സുന്ദരിയാണ്. ഞാന്‍ സുന്ദരിയാണ് എന്നാണ് നിന്നെനോക്കി നീ പറേയണ്ടത്. എന്തു മനോഹരമായ നുണക്കുഴികളാണ് നിനക്ക്. എന്തൊരു ക്യൂട്ടാണ് നീ'- ഷബ്റിയ പറഞ്ഞു. എന്നാല്‍ ഇതൊന്നും അരിയോനയെ സമാധാനപ്പെടുത്തിയില്ല എന്നുമാത്രമല്ല, അരിയോന വിങ്ങിപ്പൊട്ടുകയായിരുന്നു. ഇതുകണ്ടു 'നീ എന്നെയും കരയിക്കുമല്ലോ' എന്ന ഷബ്റിയ ചോദിക്കുന്നതും വീഡിയോയില്‍ കാണാം. നിനക്ക് സുന്ദരമായ ചോക്ലേറ്റ് നിറത്തിലുള്ള ചര്‍മമാണുള്ളതെന്നും ക്ലാസ്സിലെ ഏറ്റവും സുന്ദരിയാണെന്നുമൊക്കെ ഷബ്റിയ പറയുന്നുണ്ട്. കറുപ്പ് സുന്ദരമാണെന്നും ഷബ്റിയ പറഞ്ഞു. എന്നാല്‍ കുഞ്ഞ് അരിയോനയുടെ ഈ സങ്കടം സോഷ്യല്‍മീഡിയ ഏറ്റെടുക്കുകയും ആശ്വാസിപ്പിക്കാന്‍ നിരവധിപേര്‍ എത്തുകയും ചെയ്തു. മുന്‍ അമേരിക്കന്‍ പ്രഥമവനിത മിഷേല്‍ ഒബാമയും അരിയോനയെ സമാധാനിപ്പിച്ച് രംഗത്തെത്തി. അരിയോന സുന്ദരിയും ധീരയും മൂല്യമുള്ളവളുമാണെന്ന് മിഷേല്‍ കുറിച്ചു.