തുര്ക്കി മാധ്യമങ്ങള്ക്ക് വിലക്കേര്പ്പെടുത്തി സൗദി അറേബ്യ ; സൗദി ഭരണകൂട അനുകൂല അക്കൗണ്ടുകള് നടത്തിയ ഓണ്ലൈന് ക്യാമ്പയിനു പിന്നാലെയാണ് നടപടി
പ്രമുഖ തുര്ക്കി മാധ്യമങ്ങളായ ടി.ആര്.ടി അറബിക്, അനഡൊലു എന്നിവയ്ക്ക് വിലക്കേര്പ്പെടുത്തി സൗദി അറേബ്യ. തുര്ക്കി മാധ്യമങ്ങള്ക്കെതിരെ സൗദി ഭരണകൂട അനുകൂല അക്കൗണ്ടുകള് നടത്തിയ ഓണ്ലൈന് ക്യാമ്പയിനു പിന്നാലെയാണ് നടപടി.
സൗദിയിലെ ആക്ടിവിസ്റ്റുകളാണ് തങ്ങള്ക്ക് തുര്ക്കി മാധ്യമങ്ങള് ലഭിക്കുന്നില്ലെന്ന് സോഷ്യല് മീഡിയയിലൂടെ അറിയിച്ചത്. വിലക്കിനെ സംബന്ധിച്ച് സൗദി ഔദ്യോഗികമായി അറിയിപ്പുകളൊന്നും നല്കിയിട്ടില്ല. എന്നാല് മാധ്യമങ്ങള് നിയമങ്ങള് ലംഘിച്ചു എന്ന് സൗദി വിവരവാശ മന്ത്രാലയം മെയില് അയച്ചിട്ടുണ്ട്.
സൗദി അറേബ്യയും തുര്ക്കിയും തമ്മില് നിലനില്ക്കുന്ന അസ്വാരസ്യങ്ങളുടെ തുടര്ച്ചയാണ് ഇപ്പോഴത്തെ നടപടി എന്നാണ് സൂചനകള്. മാധ്യമപ്രവര്ത്തകന് ജമാല് ഖഷോഗ്ജി ഇസ്താംബൂളിലെ സൗദി കോണ്സുലേറ്ററില് വെച്ച് കൊല്ലപ്പെട്ടതിനു പിന്നാലെയാണ് തുര്ക്കിയും സൗദിയും തമ്മില് തര്ക്കം രൂക്ഷമാവുന്നത്.
സൗദി സര്ക്കാറിന്റെ ഉന്നത കേന്ദ്രങ്ങളില് നിന്നാണ് ജമാല് ഖഷോഗ്ജിയെ കൊലചെയ്യാനുള്ള ഉത്തരവിട്ടതെന്നും തുര്ക്കി പ്രസിഡന്റ് എര്ദോഗന് ആരോപിച്ചിരുന്നു. ഒപ്പം ഖഷോഗ്ജിയുടെ വധത്തില് പ്രതികളായ 20 പേര്ക്കെതിരെ തുര്ക്കി കേസെടുക്കുകയും ചെയ്തു. 2018 ഒക്ടോബര് രണ്ടിനാണ് സൗദി മാധ്യമപ്രവര്ത്തകനായ ജമാല് ഖഷോഗ്ജി കൊല്ലപ്പെടുന്നത്. ഇസ്താംബുളിലെ സൗദി കോണ്സുലേറ്റില് പ്രവേശിച്ച അദ്ദേഹത്തെ പിന്നീട് കാണാതാവുകയായിരുന്നു. ഖഷോഗ്ജി കോണ്സുലേറ്റില് വെച്ച് കൊല്ലപ്പെട്ടുവെന്ന് തുര്ക്കി അന്വേഷണ ഉദ്യോഗസ്ഥര് പറഞ്ഞിരുന്നു. എന്നാല് സൗദി ആദ്യം ഇതിനെ എതിര്ത്തെങ്കിലും പിന്നീട് അംഗീകരിച്ചു.
https://www.facebook.com/Malayalivartha