കോവിഡ് വ്യാപനത്തോത് ആഗോളതലത്തില്‍ അനിയന്ത്രിതമായി മുന്നോട്ട് കുതിക്കുന്ന പശ്ചാത്തലത്തില്‍ സുരക്ഷാ മുന്‍കരുതലുകള്‍ നീട്ടി അയര്‍ലന്‍ഡ്. വലിയ പൊതുപരിപാടികളും കൂടിച്ചേരലുകളും സെപ്റ്റംബര്‍ വരെ ഒഴിവാക്കാന്‍ സര്‍ക്കാര്‍ തീരുമാനിച്ചു. സെപ്റ്റംബര്‍ ഒന്നു വരെ 5,000 പേര്‍ക്കടുത്ത് പങ്കെടുക്കുന്ന പരിപാടികള്‍ പാടില്ലെന്നാണ് നിര്‍ദേശം.
മാര്‍ച്ച് 24 മുതല്‍ ഈ നിര്‍ദേശം നിലവിലുണ്ടായിരുന്നുവെന്നും പുതിയ സാഹചര്യങ്ങള്‍ പരിഗണിച്ച് ഇതിന്റെ കാലവധി നീട്ടുകയാണ് ചെയ്തതെന്നുമാണ് വിശദീകരണം. പ്രാദേശിക ഭരണകൂടങ്ങള്‍ ഇത്തരം പരിപാടികള്‍ക്ക് അനുമതി നല്‍കരുതെന്നും നിര്‍ദേശമുണ്ട്. പുതിയ ഉത്തരവ് പ്രകാരം ഇവിടെ വലിയ കായിക മത്സരങ്ങളോ മറ്റ് വിനോദ പരിപാടികളോ സംഘടിപ്പിക്കാനാകില്ല. ചൊവ്വാഴ്ച 44 പേരാണ് കോവിഡ് ബാധിച്ച് അയര്‍ലന്‍ഡില്‍ മരിച്ചത്.