ഇന്ന് നവംബര്‍ 14- ശിശുദിനം. പ്രഥമപ്രധാനമന്ത്രി ജവഹർലാല്‍ നെഹ്‌റുവിന്‍റെ 137-ാം ജന്മദിനം. കുഞ്ഞുങ്ങളെ ജീവനുതുല്യം സ്‌നേഹിച്ച പ്രഥമപ്രധാനമന്ത്രി ജവഹർലാൽ നെഹ്‌റുവിന്റെ ജന്മദിനമായ നവംബർ 14നാണ് ഇന്ത്യയിൽ ശിശു ദിനം ആഘോഷിക്കുന്നത്.

അലഹബാദില്‍ 1889ലാണ് പണ്ഡിറ്റ് ജവഹര്‍ലാല്‍ നെഹ്‌റുവിന്റെ ജനനം.സ്വാതന്ത്ര്യ സമരസേനാനി, എഴുത്തുകാരന്‍, വാഗ്മി , രാഷ്ട്രതന്ത്രജ്ഞൻ, എന്നിങ്ങനെ വിവിധ തലങ്ങളില്‍ പ്രശസ്തനായ നെഹ്‌റു ആധുനിക ഇന്ത്യയെ കെട്ടിപ്പടുക്കുന്നതില്‍ ‍നിർണായക പങ്കുവഹിച്ച ആളായാണ് വിലയിരുത്തപ്പെടുന്നത്. 1964- ല്‍ ജവഹര്‍ലാല്‍ നെഹ്റുവിന്റെ മരണത്തിന് ശേഷമാണ് പാര്‍ലമെന്റ് അദ്ദേഹത്തിന്റെ ജന്മദിന ദിവസമായ നവംബര്‍ 14 ശിശുദിനമായി പ്രഖ്യാപിച്ച് പ്രമേയം പാസാക്കിയത്.

ഇന്ന് രാജ്യം ശിശുദിനം ആഘോഷിക്കുകയാണ്. രാജ്യത്തിന്റെ ഭാവി മാത്രമല്ല, ഇന്നത്തെ വർത്തമാനകാലത്തിന്റെ തന്നെ സർഗാത്മക വിസ്‌മയങ്ങളാണ് നമ്മുടെ കുരുന്നുകൾ. മാറിക്കൊണ്ടിരിക്കുന്ന ലോകത്തിനൊപ്പം അതിവേഗം വളരുകയും പുതിയ വഴികൾ വെട്ടിത്തുറക്കുകയും ചെയ്യുകയാണ് പുതിയ തലമുറ.

"ഇന്നത്തെ കുട്ടികളാണ് നാളത്തെ ഇന്ത്യയെ രൂപപ്പെടുത്തുന്നത്; അവരെ നാം എങ്ങനെ വളർത്തുന്നുവോ അങ്ങനെയായിരിക്കും രാജ്യത്തിന്റെ ഭാവി" എന്ന ജവഹർലാൽ നെഹ്‌റുവിന്റെ വാക്കുകൾ ഓരോ ശിശുദിനത്തിലും നമുക്ക് വലിയൊരു ഉത്തരവാദിത്തമാണ് ഓർമിപ്പിക്കപ്പെടുന്നത്.

ചാച്ചാജിയുടെ വേഷമണിഞ്ഞും പനിനീര്‍പ്പൂ നെഞ്ചോടു ചേര്‍ത്തും രാജ്യത്ത് കുട്ടികൾ ശിശുദിനം ആചരിക്കുന്നു. ചാച്ചാജി എന്ന ഓമനപ്പേരിനാൽ നെഹ്‌റു എന്നും ഓർമ്മിക്കപ്പെടുന്നു.