മലയാളികൾക്ക് റിമി ടോമിയെ പരിചയപ്പെടുത്താൻ പ്രത്യേകിച്ച് വിശേഷണങ്ങളൊന്നും വേണ്ട. പാട്ടിലൂടെ മാത്രമല്ല, പൊട്ടിച്ചിരിപ്പിക്കുന്ന സംസാരത്തിലൂടെയും ജീവിതത്തിലെ കൊച്ചുകൊച്ചു വിശേഷങ്ങൾ പങ്കുവയ്ക്കുന്ന രീതിയിലൂടെയും ആരാധകരുടെ മനസ്സിൽ ഇടം നേടിയ താരമാണ് റിമി. എന്നാൽ ഇത്തവണ റിമി പങ്കുവച്ചിരിക്കുന്നത് ഒരു സാധാരണ വിശേഷമല്ല. വർഷങ്ങളോളം അധ്വാനിച്ച് സ്വന്തമാക്കിയ ഒരു സ്വപ്നത്തെക്കുറിച്ചാണ്. അതും മുംബൈയിലെ ബാന്ദ്ര വെസ്റ്റിൽ സ്വന്തമായി വാങ്ങിയ ഫ്ലാറ്റ്!

വീഡിയോയിൽ ഫ്ലാറ്റിന്റെ വിശേഷങ്ങൾ പങ്കുവയ്ക്കുന്നതിനിടെ റിമി പറഞ്ഞ ചില വാക്കുകളാണ് ആരാധകരുടെ ശ്രദ്ധ നേടുന്നത്. 'ചോര നീരാക്കി ഉണ്ടാക്കിയ സമ്പാദ്യം കൊണ്ട് വാങ്ങിയ ഫ്ലാറ്റാണിത്. ഞാൻ ഏറെ ആഗ്രഹിച്ച് സ്വന്തമാക്കിയതാണ്. ലോൺ ഒക്കെ തീർന്നശേഷം എല്ലാവരെയും ഈ കാര്യം അറിയിക്കാമെന്ന് കരുതി' എന്നാണ് റിമി പറയുന്നത്. ഒരു വീട് സ്വന്തമാക്കുക എന്നത് പലരുടെയും സ്വപ്നമാണ്. എന്നാൽ സ്വന്തം അധ്വാനത്തിലൂടെ, ആരെയും അറിയിക്കാതെ, സാമ്പത്തിക ബാധ്യതകൾ തീർത്തശേഷം ആ സന്തോഷം പങ്കുവയ്ക്കാൻ കാത്തിരുന്ന റിമിയുടെ വാക്കുകളിൽ ആ സ്വപ്നത്തിന്റെ വില വ്യക്തമാണ്.

മുംബൈയുമായി റിമിക്ക് നേരത്തേ തന്നെ ഒരു ബന്ധമുണ്ടായിരുന്നു. സഹോദരി ഏറെക്കാലം അന്ധേരിയിൽ താമസിച്ചിരുന്നു. അമ്മയ്ക്കൊപ്പം പലതവണ മുംബൈയിലെത്തിയിട്ടുമുണ്ട്. അങ്ങനെയാണ് നഗരത്തോട് ഇഷ്ടം തോന്നിത്തുടങ്ങിയത്. പിന്നീട് മുംബൈയിൽ ഒരു ഫ്ലാറ്റ് സ്വന്തമാക്കണമെന്ന ആഗ്രഹവും മനസ്സിലുണ്ടായി. ഏകദേശം മൂന്നോ നാലോ വർഷം മുമ്പാണ് ബാന്ദ്ര വെസ്റ്റിൽ ഈ ഫ്ലാറ്റ് വാങ്ങിയത്. രണ്ട് ബെഡ്‌റൂമുകളുള്ള ഫ്ലാറ്റ് വലുപ്പത്തിൽ ചെറുതാണെന്ന് തോന്നാമെങ്കിലും അത് സ്വന്തമാക്കാൻ കഴിഞ്ഞതാണ് ഏറ്റവും വലിയ സന്തോഷമെന്നും റിമി പറയുന്നു.

ഈ ഫ്ലാറ്റ് വാങ്ങിയ സമയത്ത് എന്തിനാണ് ദൈവം തന്നെക്കൊണ്ട് ഇവിടെ വീട് വാങ്ങിപ്പിച്ചതെന്ന് ചിന്തിച്ചിരുന്നുവെന്നും റിമി ഓർത്തെടുക്കുന്നുണ്ട്. എന്നാൽ ജീവിതത്തിലെ ചില തീരുമാനങ്ങളുടെ അർഥം പിന്നീട് മാത്രമേ മനസ്സിലാകൂ എന്നതുപോലെയാണ് കാര്യങ്ങൾ മുന്നോട്ടുപോയത്. പല ഫിറ്റ്നസ് ട്രെയിനർമാർക്കൊപ്പവും പരിശീലനം നടത്തിയിരുന്ന റിമി, കഴിഞ്ഞ മാർച്ചിലാണ് ലിബിനെ പരിചയപ്പെടുന്നത്. അതിനുശേഷം മുംബൈയിലേക്കുള്ള യാത്രകളും വർധിച്ചു. ഇപ്പോൾ ആ നഗരവുമായുള്ള ബന്ധത്തിന് പുതിയൊരു അർഥം കൂടി കൈവന്നിരിക്കുകയാണ്.

മലയാളി ഫിറ്റ്നസ് ട്രെയിനറായ ലിബിനുമായുള്ള വിവാഹവാർത്ത പുറത്തുവന്നതിനു പിന്നാലെ ഇരുവരുടെയും വിശേഷങ്ങൾ അറിയാൻ ആരാധകർക്ക് വലിയ താൽപര്യമാണ്. വിവാഹത്തിന് മുന്നോടിയായി മുംബൈയിലെത്തിയ റിമി പങ്കുവച്ച ഈ വ്ലോഗ് അതുകൊണ്ടുതന്നെ ശ്രദ്ധ നേടുകയാണ്. വിവാഹശേഷമുള്ള ജീവിതവും ബാന്ദ്രയിലെ ഈ സ്വന്തം ഫ്ലാറ്റിലായിരിക്കുമെന്നാണ് റിമി പറയുന്നത്.

പൊതുവേദികളിൽ എപ്പോഴും ചിരിച്ചും തമാശ പറഞ്ഞും കാണുന്ന റിമിയുടെ ജീവിതത്തിന് പിന്നിൽ എത്രമാത്രം അധ്വാനവും കാത്തിരിപ്പുമുണ്ടെന്ന് ഈ വാക്കുകൾ വ്യക്തമാക്കുന്നു. ഒരുപാട് ആഗ്രഹിച്ച് സ്വന്തമാക്കിയ വീട്, സാമ്പത്തിക ബാധ്യതകൾ തീരുന്നതുവരെ രഹസ്യമാക്കി സൂക്ഷിച്ച സന്തോഷം, ഇപ്പോൾ പുതിയൊരു ജീവിതത്തിലേക്ക് കടക്കുമ്പോൾ ആരാധകരുമായി പങ്കുവയ്ക്കുന്നു. വിവാഹത്തിന് മുമ്പുള്ള റിമിയുടെ ഈ സർപ്രൈസ് ആരാധകർ ഏറ്റെടുത്തുകഴിഞ്ഞു. പാട്ടും ചിരിയും നിറഞ്ഞ ജീവിതത്തിൽ ഇനി പുതിയൊരു അധ്യായം കൂടി!