രാജ്യത്തെ കോവിഡ് ബാധിതരുടെ എണ്ണം 62,700 ആയി. ഇന്നലെ വരെയുള്ള കണക്കുകള്‍ അനുസരിച്ച് 2000 ലധികം പേര്‍ കോവിഡ് 19 ബാധിച്ച് രാജ്യത്ത് മരിച്ചു. മഹാരാഷ്ട്ര, ഗുജറാത്ത്, തമിഴ്നാട്, ഡല്‍ഹി എന്നീ സംസ്ഥാനങ്ങളില്‍ രോഗബാധിതരുടെ എണ്ണം ഗണ്യമായി കൂടിക്കൊണ്ടിരിക്കുകയാണ്. ഇതരസംസ്ഥാനങ്ങളില്‍ നിന്നുള്ളവരും വിദേശത്തു നിന്നുള്ളവരും തിരിച്ചെത്തിക്കൊണ്ടിരിക്കുന്നതിനാല്‍ വരും ദിവസങ്ങളില്‍ രോഗബാധിതരുടെ എണ്ണം ഇനിയും ഉയരുമെന്നാണ് വിദഗ്ധര്‍ ചൂണ്ടിക്കാട്ടുന്നത്. ഈ അപകടം മനസ്സിലാക്കി നിലവിലെ പ്രവര്‍ത്തനങ്ങളെക്കാള്‍ ഊര്‍ജ്ജിതമായ നടപടികള്‍ സ്വീകരിക്കേണ്ട ആവശ്യകത ഉയര്‍ന്നുവരികയാണ്. ഈ സാഹചര്യത്തില്‍ പ്രതിരോധ പ്രവര്‍ത്തനങ്ങളും കൂടുതല്‍ വാക്സിന്‍ പരീക്ഷണങ്ങളും കൂടുതല്‍ ഊര്‍ജ്ജിതമാക്കാനാണ് പ്രധാനമന്ത്രിയുടെ നിര്‍ദേശം.

ഈ സാഹചര്യത്തില്‍ വൈറസിനെതിരായ കേന്ദ്രസര്‍ക്കാരിന്റെ പോരാട്ടത്തിന് കരുത്ത് പകര്‍ന്ന് ഐസിഎംആര്‍. ഇതിന്റെ ഭാഗമായി തദ്ദേശീയമായി വാക്‌സിന്‍ വികസിപ്പിക്കാനുള്ള ശ്രമങ്ങള്‍ക്ക് ഐസിഎംആര്‍ തുടക്കം കുറിച്ചതായാണ് റിപ്പോര്‍ട്ട്. ഇന്ത്യയിലെ പ്രമുഖ മരുന്ന് നിര്‍മ്മാതാക്കളായ ഭാരത് ബയോടെക് ഇന്റര്‍നാഷണല്‍ ലിമിറ്റഡുമായി സഹകരിച്ചാണ് ഐസിഎംആറിന്റെ പ്രവര്‍ത്തനം.നാഷണല്‍ ഇന്‍സ്റ്റിറ്റ്യൂട്ട് ഓഫ് വൈറോളജി (എന്‍ഐവി) ശേഖരിച്ച വൈറസ് സ്‌ട്രെയിനുകള്‍ ഉപയോഗിച്ചാണ് ഐസിഎംആറിന്റെ വാക്‌സിന്‍ നിര്‍മ്മാണം. വൈറസ് സ്‌ട്രെയിനുകള്‍ ഭാരത് ബയോട്ടെക്കിനു കൈമാറിയെന്നും വാക്‌സിന്‍ നിര്‍മ്മാണം ആരംഭിച്ചു കഴിഞ്ഞെന്നും ഐസിഎംആര്‍ പ്രസ്താവനയിലൂടെ അറിയിച്ചു.

വാക്‌സിന്‍ വികസിപ്പിക്കുന്നതിന്റെ വിവിധ ഘട്ടങ്ങള്‍ക്ക് ഫാസ്റ്റ് ട്രാക്ക് അനുമതി നല്‍കാനും തുടര്‍ന്ന് ആദ്യ ഘട്ടത്തില്‍ ഇതിന്റെ പരീക്ഷണം മൃഗങ്ങളില്‍ നടത്താനും ആവശ്യമായ നടപടികള്‍ അതിവേഗം സ്വീകരിക്കുമെന്ന് ഐസിഎംആര്‍ അറിയിച്ചു. പരീക്ഷണങ്ങള്‍ക്കും മറ്റും ആവശ്യമായ വോളണ്ടിയര്‍മാരെ കണ്ടെത്തുന്നതിനുള്ള നടപടികളും വേഗത്തിലാക്കുമെന്ന് ഐസിഎംആര്‍ വ്യക്തമാക്കി.

തമിഴ്‌നാട്ടില്‍ കൊറോണ വൈറസിനെതിരായ മരുന്ന് വികസിപ്പിച്ച് സ്വയം പരീക്ഷിച്ച ഔഷധ വ്യാപാരി മരിച്ചു. 47കാരനായ കെ.ശിവനേശന്‍ എന്നയാളാണ് മരിച്ചത്. കഴിഞ്ഞ 27 വര്‍ഷമായി ആയുര്‍വേദ മരുന്ന് നിര്‍മ്മാണ രംഗത്ത് പ്രവര്‍ത്തിച്ചു വരികയായിരുന്നു ശിവനേശന്‍.ശിവനേശനും മരുന്ന് കമ്പനിയുടെ ഉടമ ഡോ. രാജ് കുമാറും വ്യാഴാഴ്ച കൂടിക്കാഴ്ച നടത്താന്‍ തീരുമാനിച്ചിരുന്നു. നൈട്രിക് ഓക്‌സൈഡ്, സോഡിയം നൈട്രേറ്റ് എന്നിവ ഉപയോഗിച്ച് കൊറോണ വൈറസിന് മരുന്ന് ഉണ്ടാക്കാനായിരുന്നു ഇവരുടെ പദ്ധതി. മരുന്ന് നിര്‍മ്മാണം വിജയിച്ചാല്‍ കമ്പനിക്ക് വലിയ നേട്ടമുണ്ടാകുമെന്ന പ്രതീക്ഷയിലാണ് ഇവര്‍ മരുന്ന് നിര്‍മ്മാണം ആരംഭിച്ചതെന്ന് കേസ് അന്വേഷിക്കുന്ന ഉദ്യോഗസ്ഥന്‍ അറിയിച്ചു.

പരീക്ഷണ വേളയില്‍, രാസവസ്തുക്കളുടെയും സോപ്പുകളുടെയും നിര്‍മ്മാണത്തിലും പെട്രോളിയം ശുദ്ധീകരണത്തിലും ഉപയോഗിക്കുന്ന സോഡിയം ഹൈഡ്രേറ്റ് ശിവനേശന്‍ ഉപയോഗിച്ചിരുന്നു. കൊറോണ വൈറസ് ചികിത്സയ്ക്കും ശരീരത്തില്‍ പ്ലേറ്റ് ലെറ്റിന്റെ എണ്ണം മെച്ചപ്പെടുത്തുന്നതിനും ഈ മിശ്രിതം ഉപയോഗിക്കാമെന്ന് ഇരുവരും വിശ്വസിച്ചിരുന്നതായാണ് വിവരം. 67കാരനായ കമ്പനി ഉടമയുടെ ആരോഗ്യനില മെച്ചപ്പെട്ടു വരികയാണെന്നും ഇവരുടെ താമസസ്ഥലത്ത് സ്ഥാപിച്ച താത്ക്കാലിക ലബോറട്ടറിയില്‍ നിന്ന് പിടിച്ചെടുത്ത വസ്തുക്കള്‍ പരിശോധനയ്ക്കായി അയച്ചെന്നും പോലീസ് അറിയിച്ചു.