ചൈനയുടെ 'വ്യംഗ്യസന്ദേശങ്ങള്'; തിരിച്ചടിച്ച് ഇന്ത്യ
ചൈനയുടെ സന്ദേശങ്ങള് പ്രശ്നങ്ങള് വലുതാകുമ്പോള് ചൈനക്കാര് പൊതുവിലും നയതന്ത്രതലത്തില് പ്രത്യേകിച്ചും കാര്യങ്ങള് നേരിട്ടുപറയാതെ 'വ്യംഗ്യസന്ദേശങ്ങള്' നല്കുക പതിവാണ്. അത്തരമൊരു സന്ദേശമാണ് അതിര്ത്തിയില് പലയിടങ്ങളില് ഒരേസമയം കടന്നുകയറിക്കൊണ്ട് ഇന്ത്യക്കുനല്കാന് ശ്രമിക്കുന്നതെന്നും പറയാം. ഈയിടെ പീപ്പിള്സ് ബാങ്ക് ഓഫ് ചൈന ഇന്ത്യന് വിപണിയില് നടത്തിയ ചില ഇടപെടലുകള്ക്കുശേഷം ചൈനീസ് നിക്ഷേപങ്ങള് ഇനിമുതല് സര്ക്കാര്നിരീക്ഷണത്തിന് വിധേയമാക്കും എന്ന ഇന്ത്യന്തീരുമാനം ചൈനയെ ചൊടിപ്പിച്ചിരുന്നു.
അതേപോലെ അമേരിക്കയുമായി ഇന്ത്യ അടുക്കുന്നത് ചൈനയ്ക്ക് ഒരിക്കലും സഹിക്കാന്കഴിയാത്ത കാര്യമാണ്. ഇന്ത്യ അമേരിക്കയോടും ഓസ്ട്രേലിയയോടും ചൈനയുടെ പരമ്പരാഗതവൈരികളായ ജപ്പാനോടും ചേര്ന്ന് ചതുര്ഭുജ സുരക്ഷാകാര്യ സംവാദപ്രക്രിയയ്ക്ക് (ക്വാഡ്) രൂപംനല്കിയത് ചൈനയെ ഒതുക്കാനാണെന്നും നാളെ അതിനൊരു സൈനികതലംകൂടി ഉണ്ടാകുമെന്നും അവര് ദൃഢമായി വിശ്വസിക്കുന്നു. ഈ നാലുരാജ്യങ്ങളില് ഇന്ത്യക്കു മാത്രമാണ് ചൈനയുമായി സുദീര്ഘവും അതും ദശകങ്ങളായി തര്ക്കത്തില് തുടരുന്നതുമായ ഒരു ഭൂതല അതിര്ത്തിയുള്ളതെന്നും ചൈന ഓര്മിപ്പിക്കുന്നു. കോവിഡിന്റെ പശ്ചാത്തലത്തില് ആഗോള അടിസ്ഥാനത്തില് നടന്നുകൊണ്ടിരിക്കുന്ന ചൈനാവിരുദ്ധ നടപടികളില് ഐക്യരാഷ്ട്രസഭയിലും ലോകാരോഗ്യ സംഘടനയുടെ നിര്വാഹകസമിതി തുടങ്ങിയ മറ്റു സുപ്രധാനവേദികളിലും ഇന്ത്യ അമേരിക്കയ്ക്കൊപ്പം മുന്നിട്ടിറങ്ങിയാല് അതിന് വലിയവില കൊടുക്കേണ്ടിവരും എന്നരീതിയിലുള്ള ഒരുഭീഷണിയുടെ സ്വരവും വ്യക്തമാണ്.
https://www.facebook.com/Malayalivartha