സിഇആര്‍ടി-ഇന്‍ മുന്നറിയിപ്പ്: ചൈന സൈബര്‍ യുദ്ധവുമായി രംഗത്തെത്തും
ഇന്ത്യയിലെ സൈബര്‍ സെക്യൂരിറ്റി സംബന്ധിച്ച സര്‍ക്കാര്‍ ഏജന്‍സി സിഇആര്‍ടി-ഇന്‍ ചൈനീസ് ഭീഷണി ഇനി സൈനികമായി ആയിരിക്കില്ല, സൈബര്‍ ഇടങ്ങളിലായിരിക്കും എന്ന മുന്നറിയിപ്പ് നല്‍കി. കഴിഞ്ഞആഴ്ചയില്‍ ഇവര്‍ ഇറക്കിയ മാര്‍ഗനിര്‍ദേശത്തില്‍ ചൈനീസ് സൈബര്‍ ആക്രമണ വെല്ലുവിളിയെ മുന്‍കൂട്ടി പ്രതിരോധിക്കാന്‍ രാജ്യത്തെ സൈബര്‍ ഇടങ്ങള്‍ തയ്യാറാകണമെന്നാണ് പറയുന്നത്.
ഇന്ത്യയിലെ വ്യക്തികളെയും സ്ഥാപനങ്ങളെയും സംരംഭങ്ങളെയും വലിയ തോതിലുള്ള വ്യാജ പ്രോഗ്രാമുകള്‍ ഉപയോഗിച്ച് സൈബര്‍ ആക്രമണത്തിന് വിധേയമാക്കാനുള്ള പദ്ധതികള്‍ തയ്യാറാകുന്നു എന്ന മുന്നറിയിപ്പാണ് സിഇആര്‍ടി-ഇന്‍ മാര്‍ഗ്ഗനിര്‍ദേശത്തിലെ പ്രധാന വസ്തുത. പ്രധാനമായും ബാങ്കുകള്‍, ധനകാര്യ സ്ഥാപനങ്ങള്‍, ഐടി കമ്പനികള്‍ എന്നിവയുടെ സൈബര്‍ സുരക്ഷപിഴവിലൂടെ ആയിരിക്കും ഇത്തരം ആക്രമണങ്ങള്‍ക്ക് സാധ്യത എന്നാണ് ദ ക്വിന്റ് റിപ്പോര്‍ട്ട് ചെയ്യുന്നത്.
ടൈംസ് നൗ റിപ്പോര്‍ട്ട് പറയുന്നത് കഴിഞ്ഞ ജൂണ്‍ 15-ന് ശേഷം ചൈനയില്‍ നിന്നും ഇന്ത്യയ്‌ക്കെതിരേ 40,300 സൈബര്‍ ആക്രമണ ശ്രമങ്ങള്‍ നടന്നു എന്നാണ്. ചൈനീസ് സൈന്യത്തിന്റെ സൈബര്‍ വാര്‍ വിഭാഗത്തിന്റെ ആസ്ഥാനമെന്നു കരുതപ്പെടുന്ന ചൈനയിലെ സ്വിചാന്‍ പ്രവിശ്യയില്‍ നിന്നുമാണ് പ്രധാനമായും ഈ ആക്രമണങ്ങള്‍ ഉണ്ടായിരിക്കുന്നത്. കഴിഞ്ഞ ഒരാഴ്ചയ്ക്കുള്ളില്‍ ചൈനയില്‍ നിന്നും ഇന്ത്യയിലേക്കുള്ള സൈബര്‍ ആക്രമണം വര്‍ദ്ധിച്ചിട്ടുണ്ടെന്നും വാര്‍ത്തകളുണ്ട്.
ചൈനീസ് പീപ്പിള്‍സ് ലിബറേഷന്‍ ആര്‍മിയുടെ സൈബര്‍ വിഭാഗം നേരിട്ടല്ല, മറിച്ച് പിഎല്‍എ നിയമിച്ച രാജ്യന്തര ടെക്കികളാണ് ഈ സൈബര്‍ യുദ്ധമുഖത്തുള്ളതെന്നും കൃത്യമായി പ്രതിരോധിക്കാനായില്ലെങ്കില്‍ ഈ ആക്രമണങ്ങള്‍ സേവനങ്ങളെ ബാധിക്കുമെന്നും വിവിധ വെബ്സൈറ്റുകളെ തകര്‍ക്കുമെന്നും സൈബര്‍ വിദഗ്ധന്‍ പ്രശാന്ത് മാലി ടൈംസ് നൌവിനോട് പറഞ്ഞു.
ഇന്ത്യയില്‍ സൈബര്‍ ആക്രമണത്തിന് പ്രധാനമായും രണ്ട് രീതികളാണ് ചൈന ഉപയോഗിക്കുന്നത് എന്നാണ് റിപ്പോര്‍ട്ട്. ആദ്യത്തേത് 'ഡിസ്ട്രിബ്യൂട്ടഡ് ഡിനൈല്‍ ഓഫ് സര്‍വീസ് ' ആണ്. ഇതില്‍ ഒരു യൂട്ടിലിറ്റി പ്രൈവറ്റ് വെബ്സൈറ്റിന് ആയിരം അഭ്യര്‍ഥനകള്‍ മാത്രമേ സ്വീകരിക്കാന്‍ കഴിയൂവെങ്കില്‍ ചൈനീസ് ഹാക്കര്‍മാര്‍ക്ക് ശേഷി പത്ത് ലക്ഷമായി ഉയര്‍ത്താന്‍ കഴിയും. ഇത് സെര്‍വര്‍ സജ്ജീകരണം തകരാന്‍ ഇടയാക്കും.
'ഇന്റര്‍നെറ്റ് പ്രോട്ടോക്കോള്‍ ഹൈജാക്ക്' ആണ് രണ്ടാമത്തെ രീതി. അതില്‍ നിരീക്ഷണ ആവശ്യത്തിനായി, ടാര്‍ഗെറ്റിലേക്ക്, ചൈന വഴി ഇന്റര്‍നെറ്റ് അക്കൗണ്ടും ട്രാഫിക്കും വഴിതിരിച്ചുവിടാന്‍ ഹാക്കര്‍മാര്‍ക്ക് കഴിയുമെന്നാണ് റിപ്പോര്‍ട്ട്. അതിര്‍ത്തിയില്‍ ഇരുരാജ്യങ്ങളും സന്ധിയിലേക്കും സൈനിക പിന്‍മാറ്റത്തിലേക്കും നീങ്ങിയിട്ടുണ്ടെങ്കിലും ഗൂഢാമായ സൈബര്‍ ഇടത്തിലെ നീക്കങ്ങള്‍ പ്രവചിക്കാന്‍ സാധിക്കില്ല. അതിനാല്‍ തന്നെ കൂടുതല്‍ സൈബര്‍ സുരക്ഷ ഉറപ്പാക്കിയാലേ ഇന്ത്യന്‍ സൈബര്‍ ലോകത്തിന് ചൈനയില്‍ നിന്നുള്ള വെല്ലുവിളി നേരിടാന്‍ സാധിക്കൂ എന്നാണ് വിദഗ്ധരുടെ അഭിപ്രായം.
https://www.facebook.com/Malayalivartha
