ലോകം കൊറോണയെ പേടിച്ച് പ്രതിരോധശേഷിക്കുള്ള വാക്‌സിനും കാത്തുനില്‍ക്കുകയാണ്. എന്നാല്‍ ഒരു രാജ്യത്ത് മാത്രം കൊറോണയെ പേടിയും ഇല്ല, വാക്‌സിന് വേണ്ടി കാത്തിരിക്കുന്നുമില്ല. കിഴക്കനേഷ്യയിലെ ദ്വീപ് രാജ്യമായ തായ്‌വാനാണ് ലോകത്തെ തന്നെ അത്ഭുതപ്പെടുത്തുന്നത്.പ്രാദേശികമായി കൈമാറ്റം ചെയ്യപ്പെട്ട ഒരു കോവിഡ് കേസ് പോലുമില്ലാതെ തായ്‌വാന്‍ തികച്ചത് 200 ദിവസമാണ്.തായ്‌വാനില്‍ ഏറ്റവും അവസാനം റിപ്പോര്‍ട്ട് ചെയ്ത പ്രാദേശിക കേസ് ഏപ്രില്‍ 12 നാണ്. രാജ്യത്ത് രണ്ടാമത്തെ തരംഗവും ഉണ്ടായില്ല. ഒരു പ്രാദേശിക കോവിഡ് കേസ് പോലുമില്ലാതെ വെള്ളിയാഴ്ച 201ാം ദിവസത്തിലേയ്ക്കാണ് തായ്‌വാന്‍ കടന്നത്. 23 ദശലക്ഷം ജനങ്ങള്‍ വസിക്കുന്ന ഈ ദ്വീപ് രാഷ്ട്രത്തില്‍ ഇതുവരെ സ്ഥിരീകരിച്ചത് 553 കോവിഡ് കേസുകളും ഏഴ് മരണവും മാത്രവുമാണ്. കോവിഡിനെ പ്രതിരോധിക്കാന്‍ അതിര്‍ത്തികള്‍ നേരത്തെ തന്നെ അടച്ചു. യാത്ര കര്‍ശനമായി നിയന്ത്രിക്കുകയും ചെയ്തു. കര്‍ശനമായ കോണ്‍ട്രാക്ട് ട്രെയിസിങ്ങ്, സാങ്കേതിക വിദ്യയിലൂടെ നടപ്പിലാക്കുന്ന ക്വാറന്റീന്‍, മാസ്‌ക് ധരിക്കല്‍ എന്നിവയില്‍ തായ്‌വാന്‍ കര്‍ക്കശമാക്കി. സാര്‍സ് എന്ന മഹാമാരിയെ അതിജീവിച്ച തായ്‌വാന്‍ കോവിഡിനെതിരെ രണ്ടും കൂട്ടി പൊരുതി.ലോകത്തെ അസൂയപ്പെടുത്തുക തന്നെ ചെയ്തു. അതേസമയം പൂര്‍ണമായും തായ്‌വാന്‍ കോവിഡ് മുക്തമായിട്ടില്ല. പുറത്തുനിന്നെത്തിയ മൂന്നു പേര്‍ക്ക് വ്യാഴാഴ്ച കോവിഡ് സ്ഥിരീകരിച്ചിരുന്നു. ഫിലിപ്പിന്‍സ്, യുഎസ്, ഇന്തോനേഷ്യ, എന്നിവിടങ്ങളില്‍ നിന്നെത്തിയവര്‍ക്കാണ് രോഗബാധ സ്ഥിരീകരിച്ചത്. കഴിഞ്ഞ രണ്ടാഴ്ചയ്ക്കിടെ പുറത്തുനിന്നെത്തിയ 20 പേര്‍ക്കാണ് കോവിഡ് സ്ഥിരീകരിച്ചത്.