നാട്ടിലേക്ക് പോകാന് ടിക്കറ്റ് എടുത്ത് കാത്തിരുന്നു; ഇരിപ്പിടത്തിലേക്ക് ചാഞ്ഞ് മരണം; വിമാനത്താവളത്തില് പ്രവാസിക്ക് ദാരുണാന്ത്യം;
നാട്ടിലേക്ക് പോകാനായി വിമാനം കാത്തിരിക്കവെ വിമാനത്താവളത്തില് വെച്ച് ഹൃദയാഘാതമുണ്ടായി ഇന്ത്യന് പ്രവാസിക്ക് ദാരുണാന്ത്യം. യുപി സഹറന്പൂര് സ്വദേശി മുഹ്തസിം അഹമ്മദ് ആണ് വിമാനത്താവളത്തില് വെച്ച് മരിച്ചത്. റിയാദ് കിങ് ഖാലിദ് അന്താരാഷ്ട്ര വിമാനത്താവളത്തിലെ ഡിപ്പാര്ച്ചര് ടെര്മിനല് പാസഞ്ചേഴ്സ് ലോഞ്ചിൽ ചൊവ്വാഴ്ചയാണ് സംഭവം. ഗോ എയര് റിയാദ്- ഡല്ഹി വിമാനത്തില് യാത്ര ചെയ്യാനാണ് മുഹ്തസിം ടിക്കറ്റ് എടുത്തത്. ബോഡിങ് പാസെടുത്ത് എമിഗ്രേഷന് നടപടികളും പൂര്ത്തീകരിച്ച് വിമാനം കാത്തിരിക്കുകയായിരുന്നു. പെട്ടെന്ന് നെഞ്ചുവേദന വന്ന് ഇരിപ്പിടത്തിലേക്ക് ചാഞ്ഞു മരണം സംഭവിക്കുകയായിരുന്നു. മൃതദേഹം റിയാദ് നസീം മഖ്ബറയില് ഖബറടക്കും. റിയാദ് കെഎംസിസി മലപ്പുറം ജില്ലാ വെല്ഫെയര് വിങ്ങാണ് മരണാനന്തര നടപടിക്രമങ്ങള് പൂര്ത്തീകരിച്ചത്.
അതേസമയം പ്രവാസ ലോകത്ത് ദുരിതം അനുഭവിക്കുന്ന മറ്റൊരു പ്രവാസിയുടെ വാർത്തയും കഴിഞ്ഞ ദിവസം പുറത്ത് വന്നിരുന്നു. കടുത്ത പ്രമേഹത്തെ തുടര്ന്ന് കാലിലെ വ്രണം പഴുത്ത് ദുര്ഗന്ധം വമിക്കാന് തുടങ്ങിയതിന് പിന്നാലെയാണ് യുപി സ്വദേശിയെ കൂടെ താമസിക്കുന്നവര് മുറിയില് നിന്നും പുറത്താക്കിയത്. റിയാദില് ജോലി ചെയ്തിരുന്ന ഉത്തര്പ്രദേശ് മഹാരാജ്ഖണ്ഡ് സ്വദേശി ജാഹിര് അലിയെയാണ് പുറത്താക്കിയത്. എന്നാല്, ഇയാളെ സഹായിക്കാനായി മലയാളി സാമുഹിക പ്രവര്ത്തകരായ കെഎംസിസി സഹായഹസ്തവുമായെത്തി.
മുറിയില് നിന്ന് പുറത്താക്കപ്പെട്ട ജാഹിര് അലി താമസിച്ചിരുന്ന കെട്ടിടത്തിന്റെ ടെറസില് ആണ് കഴിഞ്ഞിരുന്നത്. കാലിലെ മുറിവ് പഴുത്ത് ദുര്ഗന്ധം വമിക്കുന്നതിനാല് മുറിയിലുള്ളവര് കെട്ടിടത്തിന്റെ മുകളിലേക്ക് മാറ്റുകയായിരുന്നു. സന്ദര്ശക വിസയില് സൗദി കിഴക്കന് പ്രവിശ്യയിലെ ജൂബൈലില് എത്തിയ മകന് പിതാവിനെ തന്റെ അടുത്ത് എത്തിക്കാന് റിയാദിലുള്ള ടാക്സി ഡ്രൈവര് സാദിഖ് വല്ലപ്പുഴയെ ഏല്പിക്കുകയായിരുന്നു. ഇയാളെ കൊണ്ടുപോകാനായി റിയാദിലെ താമസസ്ഥലത്ത് ചെന്നപ്പോഴാണ് ടെറസില് കഴിയുന്ന രോഗിയെ കണ്ടത്. ഇയാളുടെ അവസ്ഥ കണ്ട സാദിഖ് റിയാദ് കെഎംസിസി സെന്ട്രല് കമ്മിറ്റി വെല്ഫെയര് വിങ് ചെയര്മാന് സിദ്ദിഖ് തുവ്വൂരിനെ ബന്ധപ്പെട്ട സഹായം തേടുകയായിരുന്നു.
കണ്വീനര് യൂസുഫിന്റെ നേതൃത്വത്തില് ജൂബൈലില് നിന്നെത്തിയ ജാഹിര് അലിയുടെ മകനും ചേര്ന്ന് അടിയന്തര ചികിത്സയ്ക്കായി റിയാദ് ശൂമൈസിയിലെ ആശുപത്രിയില് പ്രവേശിപ്പിച്ചു.ജാഹിര് അലിയുടെ കാലില് കടുത്ത അണുബാധയുണ്ടെന്നും ഇത് ജീവന് തന്നെ അപകടമാണെന്നും ഡോക്ടര്മാര് പരിശോധനയ്ക്ക് ശേഷം പറഞ്ഞു. തുടര്ന്ന്, കുടുംബത്തിന്റെ സമ്മതത്തോടെ കാല് മുറിച്ചു. അപകടനില തരണം ചെയ്തതിനെ തുടര്ന്ന് ആശുപത്രിയില് നിന്ന് ഡിസ്ചാര്ജ് ചെയ്ത് റൂമില് തിരിച്ചെത്തി. എന്നാല്, വീണ്ടും ആരോഗ്യനില മോശമായതിനെ തുടര്ന്ന് അമീര് മുഹമ്മദ് ആശുപത്രിയില് പ്രവേശിപ്പിച്ചു. രണ്ടാഴ്ചത്തെ ചികിത്സയ്ക്ക് ശേഷം വ്യാഴാഴ്ച ലഖ്നോയിലേക്കുള്ള സ്പൈസ് ജെറ്റ് വിമാനത്തില് നാട്ടുകാരനായ ജാവേദിന്റെ കൂടെ യാത്രയാക്കി.
https://www.facebook.com/Malayalivartha
