ഇന്ത്യാക്കാര്‍ക്ക് പൊതുവെ മലയാളികള്‍ക്ക് ഒട്ടും ഇഷ്ടമില്ലാത്ത ഒരു കാര്യമാണ് ക്യൂ നില്‍ക്കുക എന്നത്. കേരളത്തില്‍ കുറച്ചെങ്കിലും ക്ഷമയോടെ ക്യൂ നില്‍ക്കുന്നത് ബിവറേജസുകളുടെ മുന്നിലാണ്. എന്നാല്‍ മറ്റ് സ്ഥലങ്ങളില്‍ ഇടയ്ക്കു കയറ്റവും തള്ളലും ബഹളവുമാണ്. എന്നാല്‍ ചില അത്യാവശ്യങ്ങള്‍ക്ക് ക്യൂ നില്‍ക്കുമ്പോള്‍ അത് മണിക്കൂറുകള്‍ നീണ്ടുപോകാറുമുണ്ട്.

ചിലര്‍ ക്ഷിണിച്ച് വീഴാറുമുണ്ട്. ഇതെല്ലാം മുന്നില്‍ കണ്ട് ലണ്ടണിലെ ഒരു യുവാവ് ക്യൂ നിന്ന് പണം സമ്പാദിക്കുകയാണ്. ഫുള്‍ ടൈം ജോലിയായി തന്നെയാണ് ഈ യുവാവ് ഇതിനെ കാണുന്നത്. ടെന്‍ഷനില്ല, മുടക്കുമുതല്‍ വേണ്ട, ബോസിന്റെ വഴക്കു കേള്‍ക്കേണ്ട. ശമ്പളവും കിട്ടും.

ലണ്ടന്‍ നിവാസിയായ ഫ്രെഡി ബെക്കിറ്റ് എന്ന യുവാവാണ് താരം. ഫ്രെഡി ക്യൂ നില്‍ക്കുന്ന ഓരോ മണിക്കൂറിനും പണം കൊടുക്കണം. ഒരു ദിവസം എട്ടുമണിക്കൂര്‍ 'വരി നില്‍ക്കല്‍' ജോലി ചെയ്ത് 16,000 രൂപയാണ് ഫ്രെഡി പ്രതിദിനം കീശയിലാക്കുന്നത്.

വരിനില്‍ക്കാന്‍ താത്പര്യമില്ലാത്ത കാശുകാരും ആരോഗ്യമില്ലാത്ത വയോധികരുമാണ് വെസ്റ്റ് ലണ്ടനിലെ ഫുള്‍ഹാം നിവാസിയായ ഫ്രെഡിയുടെ പ്രധാന കസ്റ്റമേഴ്‌സ്. തങ്ങള്‍ക്കാവശ്യമുള്ളത് ലഭിക്കാന്‍ കൊടും തണുപ്പും കത്തുന്ന വെയിലും കാത്തുനില്‍ക്കുന്നതിനേക്കാള്‍ ഭേദം കാശ് കൊടുത്ത് സേവനം തേടുന്നതാണെന്നാണ് ഭൂരിഭാഗം സമ്പന്നരുടേയും മനോഭാവം.

ക്യൂ നില്‍ക്കാന്‍ ആളുകളില്‍നിന്ന് മണിക്കൂറിന് 20 പൗണ്ടാണ് ഫ്രെഡി പ്രതിഫലം കൈപ്പറ്റുന്നത്. എട്ടുമണിക്കൂറിന് 160 പൗണ്ട് അതായത് ഏകദേശം 16,276 ഇന്ത്യന്‍ രൂപ ലഭിക്കും. ലണ്ടന്‍ സ്വദേശിയായതിനാല്‍ മണിക്കൂറുകളോളം വരിയില്‍ നില്‍ക്കുന്നത് തനിക്ക് ഒരു പ്രശ്‌നമല്ലെന്ന് ഈ 31 കാരന്‍ പറയുന്നു. 'പക്ഷേ, ഈ ജോലിക്ക് ക്ഷമയും ശാന്തതയും അത്യാവശ്യമാണ്.

ജനപ്രിയ പരിപാടികളിലേക്കുള്ള ടിക്കറ്റുകള്‍ക്ക് വരി നില്‍ക്കുന്നതാണ് ഏറ്റവും നല്ല ജോലി. 60 പിന്നിട്ടവര്‍ക്കായി ക്രിസ്റ്റ്യന്‍ ഡിയര്‍ എക്‌സിബിഷന്‍ ടിക്കറ്റിനുവേണ്ടി ഞാന്‍ എട്ട് മണിക്കൂര്‍ ജോലി ചെയ്തിട്ടുണ്ട്. ഏകദേശം മൂന്ന് മണിക്കൂറായിരുന്നു വരി നിന്നതെന്ന് ഫ്രെഡി പറയുന്നു.