കാടിനെ അറിയാനുള്ള സഞ്ചാരികളുടെ യാത്ര പലപ്പോഴും അപകടങ്ങള്‍ ക്ഷണിച്ചുവരുത്താറുണ്ട്. ചിലപ്പോഴൊക്കെ വിനോദ സഞ്ചാരികളില്‍ കാട്ടുപാതിയിലൂടെയുള്ള യാത്രകളൊക്കെ ഭീതിയിലാഴ്ത്താറുമുണ്ട്. അത്തരമൊരു സംഭവത്തിന്റെ ഭയാനക ദൃശ്യങ്ങളാണിപ്പോള്‍ സോഷ്യല്‍ മീഡിയയില്‍ പ്രചരിക്കുന്നത്.


സൗത്ത് ആഫ്രിക്കയിലെ ക്വാസിലു നാതാ പ്രവിശ്യയിലാണ് ആരെയും ഞെട്ടിപ്പിക്കുന്ന സംഭവമുണ്ടായത്. പൊതുവേ ആഫ്രിക്കന്‍ ആനകള്‍ അപകടകാരികളല്ല. എന്നാല്‍ ദേഷ്യം കയറിയാല്‍ ഭയങ്കര അപകടകാരികള്‍ ആണ് താനും. കണ്ണില്‍ കണ്ടതെല്ലാം കുത്തിമറിച്ചും എടുത്തെറിഞ്ഞുമാണ് ഇവര്‍ ദേഷ്യം തീര്‍ക്കുക.

കലികയറിയ കാട്ടാന കാറില്‍ സഞ്ചരിക്കുകയായിരുന്ന നാലംഗ കുടുംബത്തെ കുത്തിമറിച്ചിടുന്ന ദൃശ്യമാണ് ഇപ്പോള്‍ സമൂഹമാധ്യമങ്ങളിലൂടെ പുറത്തുവരുന്നത്. സമീപത്തെ വാഹനങ്ങളിലുണ്ടായിരുന്നവരാണ് നടുക്കുന്ന ഈ ദൃശ്യം പകര്‍ത്തിയത്.


കാറിനരികിലെത്തിയ കാട്ടാന തുമ്പിക്കൈ കൊണ്ട് കാറ് തലകീഴായി മറിച്ചിടുകയായിരുന്നുവെന്ന് ദൃക്‌സാക്ഷികള്‍ പറയുന്നു. രണ്ട് കുട്ടികളും മാതാപിതാക്കളുമാണ് വാഹനത്തിലുണ്ടായിരുന്നത്. ഞായറാഴ്ചയായിരുന്നു സംഭവം. തലകീഴായി മറിച്ചിട്ട കാറ് വീണ്ടും ആന കുത്തിമറിക്കാന്‍ ശ്രമിക്കുന്നുണ്ടായിരുന്നു.



സംഭവമറിഞ്ഞ് പാര്‍ക്ക് അധികൃതര്‍ ഉടന്‍തന്നെ സ്ഥലത്തെത്തി. അല്‍പസമയം കൂടി കാറിനു സമീപം നിന്ന ആന കൂടുതല്‍ ആക്രമണത്തിനു മുതിരാതെ പിന്‍വാങ്ങുകയും ചെയ്തു. അധികൃതരെത്തി കാറിനുള്ളിലുണ്ടായിരുന്ന വരെ സുരക്ഷിതമായി പുറത്തെത്തിക്കുകയും ചെയ്തു.


ആനയുടെ ആക്രമണത്തില്‍ ഭയന്നുവിറച്ച നിലയിലായിരുന്നു കുടുംബം. ഇവര്‍ക്കാര്‍ക്കും അപകടത്തില്‍ പരുക്കുകളൊന്നും സംഭവിച്ചില്ലയെന്ന് പാര്‍ക്ക് അധികൃതര്‍ വ്യക്തമാക്കി.

വന്യജീവി സങ്കേതങ്ങളിലെത്തുന്നവര്‍ വന്യമൃഗങ്ങളില്‍ നിന്ന് ചുരുങ്ങിയത് 50 മീറ്ററെങ്കിലും അകലം പാലിക്കണമെന്നാണ് നിയമം. എന്നാല്‍ ഇതു പാലിക്കാത്തതാണ് പപ്പോഴും ഇത്തരത്തിലുള്ള അപകടങ്ങള്‍ക്ക് കാരണമാകുന്നതെന്നും അധികര്‍ പറഞ്ഞു.