യുഎസില്‍ നോര്‍ത്ത് റിച്ച്‌ലാന്റ് ഹില്‍ഡിലെ വീട്ടില്‍ അതിക്രമിച്ചു കയറി 17ഉം 19 ഉം വയസ്സുളള രണ്ടു യുവാക്കളെ വെടിവച്ചു കൊന്ന കേസ്സില്‍ പ്രതി അറസ്റ്റില്‍.

ഐഗയ മാനുവേല്‍(19), ആന്റണി(17) എന്നിവരെ ഇവരുടെ മാതാവിന്റെ കാമുകന്‍ ജെസ്സി വില്യംസ്(51) ആണ് വീട്ടില്‍ അതിക്രമിച്ചു കയറി വെടിവച്ചു കൊലപ്പെടുത്തിയത്.

ജനുവരി 24 തിങ്കളാഴ്ച രാവിലെയായിരുന്നു സംഭവം. സംഭവം നടക്കുമ്ബോള്‍ രണ്ടുപേരും വീട്ടില്‍ ഉറങ്ങിക്കിടക്കുകയായിരുന്നു. മാതാവ് സ്ഥലത്തുണ്ടായിരുന്നില്ല. ഈ സമയത്താണ് കാമുകന്‍ ജെസ്സി വില്യംസ് വീട്ടില്‍ എത്തിയത്. വാതില്‍ തളളിതുറന്ന് അകത്തു കടക്കുകയും ഉറങ്ങുകയായിരുന്നു ഇവരുടേയും തലയ്ക്കു വെടിയുതിര്‍ക്കുകയും ആയിരുന്നു. സംഭവത്തിനുശേഷം പ്രതി സ്ഥലത്തു നിന്നും രക്ഷപ്പെട്ടു.

45 മിനിറ്റിനു ശേഷം വീട്ടില്‍ എത്തിയ മാതാവാണ് മക്കളിരുവരും വെടിയേറ്റു കിടക്കുന്നത് ആദ്യമായി കണ്ടത്. ഉടനെ 911 വിളിച്ചു പൊലീസിനെ അറിയിച്ചു. ഗുരുതരമായി പരുക്കേറ്റ ഐഗയെ ആശുപത്രിയില്‍ എത്തിച്ചുവെങ്കിലും ജീവന്‍ രക്ഷിക്കാനായില്ല. രക്ഷപ്പെട്ട പ്രതി ജെസ്സി വില്യംസിനെ ട്രാഫിക് സ്‌റ്റോപ്പിനിടെ തിങ്കളാഴ്ച വൈകിട്ട് പൊലീസ് പിടികൂടി.