ആർത്തവരക്തം അശുദ്ധമാണ് എന്ന് വിശ്വസിക്കുന്നവരും അല്ലാത്തവരുമായി രണ്ട് വിഭാഗങ്ങളുണ്ട്. എന്നാൽ, ഇത് അശുദ്ധമാണ് എന്നതിന് ശാസ്ത്രീയ അടിസ്ഥാനമൊന്നുമില്ല എന്നതാണ് വാസ്തവം. ആർത്തവ രക്തത്തെ നമ്മൾ അശുദ്ധമാണെന്ന് പറഞ്ഞ് പുച്ഛിക്കുമ്പോൾ 30 വയസുകാരിയും ഒരു കുട്ടിയുടെ അമ്മയുമായ ബാഴ്‌സലോണിയൻ യുവതി ജാസ്മിൻ അലിസിയ കാർട്ടർ തന്റെ ആർത്തവരക്തം മുഖത്ത് പുരട്ടുകയും, കുടിക്കുകയുമൊക്കെയാണ് ചെയ്യുന്നത്.

ഇത് തന്റെ ആരോഗ്യം മെച്ചപ്പെടുത്തുന്നുവെന്ന വിചിത്രവാദമാണ് ഇവർ സാമൂഹികമാധ്യമങ്ങളിൽ പങ്കുവെച്ചിരിക്കുന്നത്. ആർത്തവചക്രത്തെയും രക്തത്തെയും പവിത്രമായി കാണണം എന്നും പറഞ്ഞ് സ്ത്രീകളെ പരിശീലിപ്പിക്കുന്ന ഒരു ഉപദേശക കൂടിയാണ് ഈ യുവതു. ആർത്തവരക്തം മുഖത്ത് പുരട്ടുന്നത് തന്റെ ശാരീരികവും ആത്മീയവുമായ ആരോഗ്യം മെച്ചപ്പെടുത്തിന് സഹായകമാകുന്നുവെന്നാണ് അവർ അവകാശപ്പെടുന്നത്. ജാസ്മിൻ തന്റെ ആർത്തവ രക്തം ഫേസ് മാസ്‌ക്കായി മുഖത്ത് പുരട്ടുകയും, രക്തം ഉപയോഗിച്ച് 'പീരിയഡ് പെയിന്റിംഗുകൾ' എന്ന പേരിൽ ചിത്രങ്ങൾ വരയ്ക്കുകയും ചെയ്യുന്നു.

ഇങ്ങനെ രക്‌തം മുഖത്ത് പുരട്ടുന്നത് ചർമ്മത്തിന് വളരെ നല്ലതാണ് എന്നാണ് അവരുടെ അഭിപ്രായം. "നിങ്ങളുടെ ആർത്തവരക്തം ശുദ്ധമായ മരുന്നാണ്" ജാസ്മിൻ പറയുന്നു. സ്ത്രീകൾ തങ്ങളുടെ ആർത്തവത്തെക്കുറിച്ച് ലജ്ജിക്കാൻ പാടില്ലെന്നും അവൾ പറയുന്നു. ഇൻസ്റ്റാഗ്രാമിൽ അവൾക്ക് 22,800 ഫോളോവേഴ്‌സുണ്ട്. ശാസ്ത്രീയമായി നോക്കുമ്പോൾ യുവതിയുടെ അവകാശവാദം ശുദ്ധമണ്ടത്തരമണ്.

ആർത്തവരക്തം പോഷകസമ്പുഷ്ടമാണെന്നും, പ്രോട്ടീൻ, ഇരുമ്പ്, സെലിനിയം എന്നിവയും ആന്റിമൈക്രോബയൽ ഗുണങ്ങളും പുനരുജ്ജീവിപ്പിക്കുന്ന സ്റ്റെം സെല്ലുകളും ഉൾപ്പെടുന്നു എന്നാണ് ജാസ്മിൻ അവകാശപ്പെടുന്നത്. എന്നാൽ, നിലവിലെ ഗവേഷണങ്ങൾ സൂചിപ്പിക്കുന്നത് ആർത്തവരക്തം ബാക്ടീരിയകളുടെ പ്രജനനകേന്ദ്രമാണ് എന്നതാണ്.