പതിനാലു വയസ്സുകാരനായ മകന് സ്ഥിരമായി മയക്കുമരുന്ന് നല്‍കിയ അമ്മയെ പോലീസ് അറസ്റ്റ് ചെയ്തു. ബന്ധുക്കളിലൊരാളുടെ പരാതിയെത്തുടര്‍ന്നാണ് അറസ്റ്റ്. ഫ്‌ളോറിഡയിലെ പാസ്‌കോ കൗണ്ടിയിലെ 38കാരിയായ ചെറില്‍ ആന്‍ ആസിക്കാണ് അറസ്റ്റിലായത്. കുട്ടിയെ ഫോണില്‍ വിളിച്ച സംസാരിച്ച ബന്ധുവിന് കുട്ടിയുടെ സംസാരത്തില്‍ എന്തോ പന്തികേട് അനുഭവപ്പെടുകയായിരുന്നു.

ഇത് ചോദ്യം ചെയ്തപ്പോള്‍ പെട്ടന്ന് കുട്ടിയുടെ കയ്യില്‍ നിന്ന് ഫോണ്‍ വാങ്ങിയ അമ്മ അവന്‍ സെഡേഷനുള്ള ഒരു മരുന്ന് കഴിച്ചിട്ടുണ്ടെന്ന് പറഞ്ഞ് വിഷയം മാറ്റുകയായിരുന്നു. പിന്നീട് സ്ഥകാലബോധം നഷ്ടപ്പെട്ട കുട്ടിയെ ആശുപത്രിയില്‍ എത്തിക്കാനായി ബന്ധു ഇടപെട്ട് ആംബുലന്‍സ് വിളിക്കുകയായിരുന്നു. ഈ സമയത്ത് കുട്ടിയെ അരികില്‍ വിളിച്ച അമ്മ താന്‍ മരുന്ന് നല്‍കിയ കാര്യം ആരോടും പറയരുതെന്ന് കുട്ടിയോട് പറഞ്ഞു.

പിന്നീട് പരിശോധനയില്‍ കുട്ടി മയക്കുമരുന്ന് ഉപയോഗിച്ചതായി തെളിഞ്ഞതോടെ താന്‍ കുളിക്കാന്‍ പോകുന്നതിനിടയില്‍ മകന്‍ താനറിയാതെ മരുന്ന് എടുത്തതാണെന്ന് യുവതി പോലീസിനോട് പറഞ്ഞു. കൂടുതല്‍ ചോദ്യം ചെയ്യലില്‍ താന്‍ തന്നെയാണ് മരുന്ന് നല്‍കിയതെന്ന് യുവതി സമ്മതിച്ചു. മകന് റിലാക്‌സേഷന്‍ ലഭിക്കാനാണ് താന്‍ മയക്കുമരുന്ന് നല്‍കിയതെന്നും യുവതി മൊഴി നല്‍കി. കുട്ടികളെ ദുരുപയോഗം ചെയ്യുക, പ്രായപൂര്‍ത്തിയാകാത്ത കുട്ടികളെ കുറ്റകൃത്യത്തിന് പ്രേരിപ്പിക്കുക എന്നീ വകുപ്പുകള്‍ ചേര്‍ത്താണ് യുവതിക്കെതിരെ കേസെടുത്തിരിക്കുന്നത്.