യൂനിസ് കൊടുങ്കാറ്റിൽ യൂറോപ്പിൽ കനത്ത നാശനഷ്ടം.മണിക്കൂറിൽ 196km  വരെ റെക്കോർഡ് വേഗത്തിലാണ് കാറ്റ് വീശിയടിച്ചത്. കൊടുങ്കാറ്റിൽ എട്ട് പേർ കൊല്ലപ്പെട്ടു. പടിഞ്ഞാറൻ യൂറോപ്പിൽ വിമാനങ്ങളും ട്രെയിനുകളും ഫെറികളും തടസപ്പെട്ടു. ദശലക്ഷക്കണക്കിന് ആളുകളെ മാറ്റിപ്പാർപ്പിച്ചു.

ഒരു നാട് മുഴുവൻ ആശങ്കയിലാഴ്ന്നിട്ടും അവിടെ, ബ്രിട്ടനിൽ നിന്നുള്ള രസകരമായ ഒരു വീഡിയോയാണ് സമൂഹമാദ്ധ്യമങ്ങളിൽ ഇപ്പോൾ വൈറലാകുന്നത്. ശക്തമായ കാറ്റിൽ തലയിൽ നിന്നും പറന്നുപോയ വിഗ്ഗിന് പിന്നാലെ ഓടുന്ന ഒരാളുടെ ദൃശ്യങ്ങളാണ് വൈറലായത്.

സൈമൺ വിൽക്‌സ് എന്നയാളുടെ വിഗ്ഗാണ് കാറ്റത്ത് പറന്നുപോയത്. കാറുകൾ പാർക്ക് ചെയ്യുന്ന സ്ഥലത്ത് നിൽക്കുകയായിരുന്ന വിൽക്‌സിന്റെ വിഗ്ഗ് കാറ്റടിച്ച് തലയിൽ നിന്നും പറന്നുപോകുകയായിരുന്നു. ആ സമയത്ത് അവിടെ നിന്ന ഒരു വ്യക്തി ഇതിന്റെ ദൃശ്യങ്ങൾ സമൂഹമാദ്ധ്യമങ്ങളിൽ പോസ്റ്റ് ചെയ്തു.

കാറ്റടിച്ച് വിഗ്ഗ് പറന്നുപോയപ്പോൾ, ഞെട്ടലോടെ ചുറ്റും നോക്കുന്ന വിൽക്‌സിനെ ദൃശ്യങ്ങളിൽ കാണാം. തൽക്ഷണം തന്നെ അദ്ദേഹം ഓടിചെന്ന് അത് എടുക്കുകയും തലയിൽ വെയ്‌ക്കുകയും ചെയ്തു. വീഡിയോ എടുത്ത വ്യക്തി ഇതെല്ലാം കണ്ട് ചിരിക്കുന്നതിന്റെ ശബ്ദം വീഡിയോയിലൂടെ കേൾക്കാൻ സാധിക്കുന്നുണ്ട്.

ബ്രിട്ടനിൽ ആഞ്ഞുവീശുന്ന യൂനിസ് കൊടുങ്കാറ്റ് വൻ നാശനഷ്ടങ്ങളാണ് സൃഷ്ടിച്ചിരിക്കുന്നത്. ലക്ഷക്കണക്കിന് വീടുകളിലെ വൈദ്യുതി ബന്ധം വിച്ഛേദിക്കപ്പെട്ടിരിക്കുകയാണ്. മണിക്കൂറിൽ 122 കിലോമീറ്റർ വേഗത്തിലാണ് കാറ്റ് വീശുന്നത്. ധാരാളം വിമാനങ്ങളും ഇതിനോടകം റദ്ദാക്കിയിട്ടുണ്ട്.

ബ്രിട്ടന് അപ്പുറം, നെതർലൻഡ്‌സിൽ മരം വീണു മൂന്നു പേരും തെക്കുകിഴക്കൻ അയർലൻഡിൽ 60 വയസ്സുള്ള ഒരാളും മരിച്ചു. ബെൽജിയത്തിൽ 79 വയസ്സുള്ള ഒരു കനേഡിയൻ കൊല്ലപ്പെട്ടു. നെതർലൻഡ്‌സിന്റെ വടക്കൻ പ്രവിശ്യയായ ഗ്രോനിംഗനിൽ അഡോർപ്പിന് സമീപം റോഡിന് കുറുകെ വീണ മരത്തിൽ കാർ ഇടിച്ച് ഒരു വാഹനയാത്രികൻ മരിച്ചു.

ലണ്ടനിലെന്നപോലെ, തെക്കൻ ഇംഗ്ലണ്ട്, സൗത്ത് വെയിൽസ്, നെതർലാൻഡ്‌സ് എന്നിവിടങ്ങളിൽ ഉയർന്ന കാലാവസ്ഥാ മുന്നറിയിപ്പ് പ്രഖ്യാപിച്ചു, നിരവധി സ്‌കൂളുകൾ അടച്ചു, തീവണ്ടിയാത്ര സ്തംഭിച്ചു, ഉയർന്ന തിരമാലകൾ തീരത്ത് കടൽഭിത്തികൾ തകർത്തു.

അതേസമയം കാറ്റ് മൂലം ഇംഗ്ലണ്ടിലെ 1,40,000-ലധികം വീടുകളിലേക്കും, അയർലണ്ടിലെ 80,000 പ്രോപ്പർട്ടികളിലേക്കും വൈദ്യുതി മുടക്കിയെന്ന് യൂട്ടിലിറ്റി കമ്പനികൾ പറഞ്ഞു.യുകെ തലസ്ഥാനത്തിന് ചുറ്റും, കൊടുങ്കാറ്റിൽ പരിക്കേറ്റ് മൂന്ന് പേരെ ആശുപത്രിയിൽ പ്രവേശിപ്പിച്ചു. തലസ്ഥാനത്തെ മില്ലേനിയം ഡോമിലെ മേൽക്കൂരയുടെ വലിയൊരു ഭാഗം കാറ്റിൽ തകർന്നു