യുക്രെയ്‌നില്‍ യുദ്ധം പ്രഖ്യാപിച്ച് റഷ്യയ്ക്ക് ആദ്യ തിരിച്ചടി. യുക്രൈന്‍ റഷ്യയുടെ യുദ്ധവിമാനം വെടിവച്ചിട്ടു. പ്രതിരോധത്തിന് മുതിരരുതെന്നും ആയുധം താഴെവച്ച് കീഴടങ്ങണമെന്നും യുക്രെയ്ന്‍ സൈന്യത്തോട് റഷ്യന്‍ പ്രസിഡന്റ് വ്‌ലാഡിമിര്‍ പുടിന്‍ ആവശ്യപ്പെട്ടതിന് പിന്നാലെയാണ് നടപടി.  യുക്രെയ്ന്‍ തലസ്ഥാനമായി കീവില്‍ റഷ്യ ആക്രമണം തുടങ്ങിയെന്ന് വാര്‍ത്താ ഏജന്‍സികള്‍ നേരത്തേ തന്നെ റിപ്പോര്‍ട്ട് ചെയ്തിരുന്നു. കീവില്‍ സ്ഫോടനങ്ങള്‍ ഉണ്ടായി. ഖാര്‍ക്കീവില്‍ യുക്രെയ്ന്‍ സൈന്യം റഷ്യന്‍ സൈനിക വിമാനം വെടിവച്ചിട്ടു എന്നാണ് വാര്‍ത്താ ഏജന്‍സികളുടെ റിപ്പോര്‍ട്ട്.

ഇന്നലെ രാത്രി, നൂറോളം ടാങ്കുകള്‍ ഉള്‍പ്പടെ ഒരു സൈനികവ്യുഹം ഖര്‍ക്കിവ് ലക്ഷ്യമാക്കി നീങ്ങിന്നുണ്ട്. കീവിലും മറ്റും വ്യോമാക്രമണവും നടത്തും. ഉക്രെയിനെതിരെ ഒരു സമ്പൂര്‍ണ്ണ യുദ്ധമാണ് പുട്ടിന്‍ ഉന്നം വയ്ക്കുന്നത്. അമേരിക്കന്‍ ഉപരോധത്തെ ചെറുക്കാനുള്ള കഴിവ് തങ്ങള്‍ക്കുണ്ടെന്ന് പറഞ്ഞ റഷ്യ, ഇതിനെതിരെ ശക്തമായി പ്രതികരിക്കുകയും ചെയ്യുമെന്ന താക്കീതും നല്‍കിയിട്ടുണ്ട്.


അതേസമയം രക്തച്ചൊരിച്ചില്‍ ഉണ്ടായാല്‍ ഉത്തരവാദിത്തം യുക്രെയ്‌നും സഖ്യത്തിനുമെന്ന് പുടിന്‍ അറിയിച്ചു. അപകടകരമായ സാഹചര്യമെന്ന് ഇന്ത്യ പ്രതികരിച്ചു.. നയതന്ത്ര തലത്തില്‍ പ്രശ്‌നത്തിന് പരിഹാരം കാണണമെന്നും ആവശ്യപ്പെട്ടു.

പുടിന്റെ നടപടി നീതീകരിക്കാനാവാത്തതാണെന്ന് യുഎസ് പ്രസിഡന്റ് ജോ ബൈഡന്‍ പറഞ്ഞു.'നാറ്റോ വിപുലീകരണത്തിന് യുക്രെയ്‌നെ പങ്കാളിയാക്കുന്നത് അംഗീകരിക്കില്ല. യുക്രെയ്‌നില്‍ സൈനിക നടപടി അനിവാര്യമാണ്. റഷ്യന്‍ നീക്കത്തിനെതിരെ ബാഹ്യ ശക്തികള്‍ ഇടപെട്ടാല്‍ പ്രത്യാഘാതം രൂക്ഷമായിരിക്കുമെന്നും പുടിന്‍ പറഞ്ഞു.

യുക്രെയ്‌നിലെ ഡോണ്‍ബാസിലാണ് സൈനിക നടപടിക്ക് പുടിന്‍ ഉത്തരവിട്ടത്. ഇതിനിടെ, യുഎന്‍ രക്ഷാസമിതി അടിയന്തര യോഗം ചേര്‍ന്നു. സൈനിക നടപടികള്‍ നിര്‍ത്തിവയ്ക്കണമെന്ന് യുഎന്‍ സെക്രട്ടറി ജനറല്‍ പുടിനോട് ആവശ്യപ്പെട്ടു.  

കിഴക്കന്‍ ഉക്രെയ്നില്‍ റഷ്യയുടെ അധിനിവേശത്തെത്തുടര്‍ന്ന് യുക്രെയ്നില്‍ അടിയന്തരാവസ്ഥ പ്രഖ്യാപിച്ചിരുന്നു. റഷ്യ സന്ദര്‍ശിക്കരുതെന്ന് ഉക്രെയിന്‍ പൗരന്മാരോടു സര്‍ക്കാര്‍ നിര്‍ദേശിച്ചിട്ടുണ്ട്. റഷ്യയിലുള്ളവരോട് എത്രയും വേഗം മടങ്ങാന്‍ ആവശ്യപ്പെട്ടിട്ടുണ്ട്.

ഉക്രെയ്നെതിരെ യുദ്ധം പ്രഖ്യാപിച്ച് റഷ്യ നല്‍കുന്നത് ലോകത്തെ പ്രതിസന്ധിയിലാക്കുമെന്ന സൂചനയാണ്. സൈനിക നടപടിക്ക് റഷ്യന്‍ പ്രസിഡന്റ് വ്ളാഡിമിര്‍ പുട്ടിന്‍ ഔദ്യോഗികമായി അനുമതി നല്‍കിയത് ലോക രാജ്യങ്ങളെ വെല്ലുവിളിച്ചാണ്. എന്തിനും തയാറാണെന്നും തടയാന്‍ ശ്രമിക്കുന്നവര്‍ക്ക് സൈന്യം മറുപടി നല്‍കുമെന്നും പുട്ടിന്‍ മുന്നറിയിപ്പ് നല്‍കി. ഐക്യരാഷ്ട്ര സഭ ഉക്രെയിന് പിന്നില്‍ അണിനിരത്തുമ്പോഴാണ് ഈ ഭീഷണി. അമേരിക്കയെയാണ് പരോക്ഷമായി യുദ്ധത്തിന് പു്ട്ടിന്‍ വെല്ലുവിളിക്കുന്നത്.

റഷ്യയുടെ കളിപ്പാവകളായ ഉക്രെയിന്‍ വിമത നേതാക്കള്‍, ഉക്രെയിന്‍ ആക്രമണത്തെ ചെറുക്കുന്നതിന് റഷ്യയുടെ സഹായം അഭ്യര്‍ത്ഥിച്ചതോടെ യുദ്ധകൊതിയുമായി റഷ്യന്‍ പ്രിസിഡന്റ് പുട്ടിന്‍ രംഗത്തു വരുന്നുവെന്നതാണ് വസ്തുത. റഷ്യന്‍ പിന്തുണയുള്ള വിഘടനവാദികളെ തുരത്താന്‍ ഉക്രെയിന്‍ സൈന്യത്തിന്റെ ആക്രമണം ഉണ്ടാകും എന്ന വാദം ചര്‍ച്ചയാക്കിയാണ് യുദ്ധപ്രഖ്യാപനം. ഉക്രെയിന്‍ സൈന്യത്തിന്റെ ഷെല്‍ വര്‍ഷത്തില്‍ നിരവധി സാധാരണക്കാര്‍ക്ക് ജീവന്‍ നഷ്ടപ്പെട്ടു എന്ന് ചൂണ്ടിക്കാട്ടിയാണ് വിമതനേതാക്കള്‍ പുടിന് കത്തയച്ചത് എന്ന് റഷ്യന്‍ വക്താവ് ഡിമിറ്റ്രി പെസ്‌കോവ് പറഞ്ഞു. എന്നാല്‍ ഇതെല്ലാം വെറും റഷ്യന്‍ തിരക്കഥയാണെന്നാണ് ലോക രാജ്യങ്ങളുടെ നിലപാട്.