അധിനിവേശത്തിന്റെ ആറാം ദിവസവും യുക്രെയ്‌നിലെ വിവിധ മേഖലകളില്‍ റഷ്യന്‍ സേന ആക്രമണം തുടരുന്നു. കൂടുതല്‍ റഷ്യന്‍ സൈനീകര്‍ കീവ് ലക്ഷ്യമാക്കി എത്തുകയാണ്. അവര്‍ എത്തുന്ന മുറയ്ക്ക്. ബോംബ് ആക്രമണങ്ങള്‍ കൂട്ടാനാണ് റഷ്യയുടെ തീരുമാനം. വ്യോമ മാര്‍ഗമാണ് ബോംബ് വിക്ഷേപണം റഷ്യ പ്ലാന്‍ ചെയ്യുന്നത്. ബ്രോവറിയില്‍ ഇന്ന് റഷ്യ ബോംബിട്ടിരുന്നു. യുദ്ധം ആറാം ദിവസത്തിലേയ്ക്ക് കടക്കുമ്പോള്‍ കീവ് തന്നെയാണ് പ്രധാന ലക്ഷ്യം. ബോംബ് ആക്രമണങ്ങള്‍ക്കു പുറമേ ടെറെഹോവില്‍ തുടര്‍ച്ചയായി ഷെല്ലാക്രമണങ്ങള്‍ ഉണ്ടായതായി മേയര്‍ അറിയിച്ചു. റഷ്യന്‍ അതിര്‍ത്തിയോട് ചേര്‍ന്നു കിടക്കുന്ന ഹര്‍കീവിലുണ്ടായ രൂക്ഷമായ റോക്കറ്റാക്രമണങ്ങളില്‍ പാര്‍പ്പിടസമുച്ചയങ്ങള്‍ നിലം പൊത്തിയിരുന്നു.

ബ്രോവറിലുണ്ടായ ബോംബ് ആക്രമണത്തില്‍ മേയര്‍ക്കും പരിക്കേറ്റു റിപ്പോര്‍ട്ടുകള്‍. അതിനാല്‍ തന്നെ ജനങ്ങള്‍ സുരക്ഷിതമയി സ്ഥലങ്ങളിലേക്ക് മാറണമെന്ന നിര്‍ദേശമാണ് അധികൃതര്‍ നല്‍കിയിയിരിക്കുന്നത്.

ഖാര്‍കീവില്‍ ഇപ്പോഴും ഷെല്ലാക്രമണം തുടരുകയാണ്. ഖാര്‍കീവിലെ മേയര്‍ക്കും ആക്രമണത്തില്‍ മേയര്‍ക്കും പരിക്കെന്നാണ് റിപ്പോര്‍ട്ട് ഉണ്ട്. യുക്രൈന്റെ തലസ്ഥാനമായ കീവില്‍ വീണ്ടും സ്ഫോടനങ്ങളാണ് ഇന്ന് നടന്നത്. കീവിനെ കത്തിക്കുയ എന്നതാണ് റഷ്യയുടെ പ്രഖ്യാപിത ലക്ഷ്യം.

അതേസമയം റഷ്യയുടെ ആക്രമണങ്ങളില്‍ കൊല്ലപ്പെടുന്ന സാധാരണക്കാരുടെ എണ്ണം കൂടുകയാണ്. സൈനികനീക്കം യുക്രൈനിലെ സാധാരണക്കാരെ ലക്ഷ്യംവെയ്ക്കില്ലെന്ന റഷ്യന്‍ പ്രസിഡന്റ് വ്‌ലാദിമര്‍ പുടിന്റെ അവകാശവാദം തെറ്റെന്ന് തെളിയിക്കുന്ന റിപ്പോര്‍ട്ടുകളാണ് പുറത്തുവരുന്നത്.

യുക്രൈന്‍ നഗരമായ മരിയുപോളിലെ സിറ്റി ആശുപത്രിയിലേക്ക് കഴിഞ്ഞ ദിവസം ഒരു ആംബുലന്‍സ് ചീറിപ്പാഞ്ഞുവന്നു. റഷ്യന്‍ ഷെല്ലാക്രമണത്തില്‍ ഗുരുതരമായി പരിക്കേറ്റ ആറു വയസ്സുകാരിയാണ് ആംബുലന്‍സിലുണ്ടായിരുന്നത്. അവളുടെ ഉടുപ്പ് ചോരയില്‍ കുതിര്‍ന്നിരുന്നു. അവളുടെ പിതാവിനും ഗുരുതരമായി പരിക്കേറ്റിരുന്നു. ഇരുവരെയും ഉടനടി ആശുപത്രി അധികൃതര്‍ ഉള്ളിലേക്ക് കൊണ്ടുപോയപ്പോള്‍ കുട്ടിയുടെ അമ്മ പുറത്ത് കണ്ണീരോടെ കാത്തുനിന്നു.

ഡോക്ടര്‍മാരും നഴ്‌സുമാരും കുഞ്ഞിന്റെ ജീവന്‍ രക്ഷിക്കാന്‍ പരമാവധി ശ്രമിച്ചു. ഒരാള്‍ ഇഞ്ചക്ഷന്‍ നല്‍കി, ഒരാള്‍ ഓക്‌സിജന്‍ നല്‍കി. സിപിആര്‍ ചെയ്ത് ആ കുഞ്ഞിന്റെ ഹൃദയത്തിന്റെ മിടിപ്പ് നിലനിര്‍ത്താന്‍ ശ്രമിക്കുന്നതിനിടെ ഡോക്ടര്‍ കരഞ്ഞുപോയി. ഡോക്ടര്‍മാര്‍ക്ക് കുഞ്ഞിനെ രക്ഷിക്കാനായില്ല. ആശുപത്രിക്കുള്ളില്‍ ഈ ദൃശ്യങ്ങള്‍ പകര്‍ത്തുകയായിരുന്ന മാധ്യമപ്രവര്‍ത്തകനോട് ഡോക്ടര്‍ സങ്കടവും രോഷവും താങ്ങാനാകാതെ ഇങ്ങനെ പറഞ്ഞു- 'ഇതെല്ലാം ആ പുടിനെ കാണിക്കൂ... ഈ കുഞ്ഞിന്റെ കണ്ണുകളെയും കരയുന്ന ഡോക്ടര്‍മാരെയും...'

പോളിന എന്ന നാലാം ക്ലാസ് വിദ്യാര്‍ഥിനിയെ റഷ്യന്‍ സംഘം വെടിവെച്ചുകൊന്നു എന് വാര്‍ത്തയും യുക്രൈനില്‍ നിന്നും വന്നു. പോളിനയെയും മാതാപിതാക്കളെയും കിയവില്‍ കാറില്‍ സഞ്ചരിക്കവേ റഷ്യന്‍ ഡിആര്‍ജി സംഘം വെടിവെച്ചുകൊന്നു എന്നാണ് കിയവ് ഡപ്യൂട്ടി മേയര്‍ വ്‌ലാഡിമര്‍ ബൊന്ദരെങ്കോ സോഷ്യല്‍ മീഡിയയില്‍ അറിയിച്ചത്. ഖാര്‍കിവിന് പുറത്തുള്ള ഒരു ചെറുപട്ടണമായ ചുഹുയിവില്‍ ഷെല്ലാക്രമണത്തെ തുടര്‍ന്ന് ഫ്‌ലാറ്റുകള്‍ക്ക് തീ പിടിച്ച് ഒരു ആണ്‍കുട്ടി കൊല്ലപ്പെട്ട റിപ്പോര്‍ട്ടും പുറത്തുവന്നു.

യുക്രൈന്‍ സര്‍ക്കാരിന്റെ കഴിഞ്ഞ ദിവസത്തെ കണക്കു പ്രകാരം കൊല്ലപ്പെട്ടത് 352 പേരാണ്. 1684 പേര്‍ക്ക് പരിക്കേറ്റു. 5 ലക്ഷത്തിലധികം പേര്‍ രാജ്യം വിട്ട് പലായനം ചെയ്തു.

ബെലാറൂസ് അതിര്‍ത്തിയില്‍ യുക്രെയ്ന്റഷ്യ ആദ്യഘട്ട ചര്‍ച്ച ഇന്നലെ പൂര്‍ത്തിയായി. ഇരുകൂട്ടരും മറുപക്ഷത്തിന്റെ ആവശ്യങ്ങള്‍ ഭരണനേതൃത്വങ്ങളെ അറിയിച്ചശേഷം രണ്ടാംഘട്ട ചര്‍ച്ചയ്ക്കുള്ള സമയം നിശ്ചയിക്കും. രണ്ടാം റൗണ്ട് ചര്‍ച്ചകള്‍ നടക്കുന്നതോടെ സമാധാനം പുലരാനുള്ള നടപടികള്‍ക്ക് വേഗം കൂടുമെന്നാണ് ലോകരാജ്യങ്ങളുടെ പ്രതീക്ഷ. യുക്രെയ്‌നിലെ റഷ്യന്‍ സൈനിക നടപടി യുഎന്‍ പൊതുസഭയും ചര്‍ച്ചചെയ്തു. ആക്രമണം അവസാനിപ്പിക്കണമെന്ന് യുഎന്‍ സെക്രട്ടറി ജനറല്‍ അന്റോണിയോ ഗുട്ടെറസ് ആവശ്യപ്പെട്ടു.

റഷ്യയുടെ യുഎന്‍ പ്രതിനിധികളെ പുറത്താക്കുന്നതായി യുഎസ് വ്യക്തമാക്കി. മാര്‍ച്ച് 7നകം രാജ്യം വിടാന്‍ നിര്‍ദേശം നല്‍കി. ഉദ്യോഗസ്ഥര്‍ രാജ്യത്തിന് ഭീഷണിയെന്ന് ചൂണ്ടിക്കാണിച്ചാണ് അമേരിക്കന്‍ നടപടി. യുഎന്‍ പ്രതിനിധികളായെത്തി വിവരങ്ങള്‍ ചോര്‍ത്തുന്നെന്നാണ് അമേരിക്കയുടെ വിശദീകരണം. റഷ്യയിലെ അമേരിക്കന്‍ എംബസി സേവനം വെട്ടിച്ചുരുക്കി. യുഎസ് പൗരന്‍മാരോട് റഷ്യ വിടാനും യുഎസ് നിര്‍ദേശിച്ചു.

റഷ്യന്‍ ദേശീയ ബാങ്കുമായുള്ള ഇടപാടുകളില്‍ പാശ്ചാത്യ രാജ്യങ്ങള്‍ക്ക് പുറമെ ജപ്പാനും കടുത്ത നിയന്ത്രണം ഏര്‍പ്പെടുത്തി. റഷ്യയ്ക്കെതിരെ യുക്രെയ്‌നില്‍ നേരിട്ട് സൈനിക നടപടി ആലോചനയില്ലെന്ന് നാറ്റോ വ്യക്തമാക്കി. ഇപ്പോഴത്തെ ആക്രമണവും പ്രത്യാക്രമണവും ഒരു സമ്പൂര്‍ണ യുദ്ധമായി മാറുന്നത് തടയലാണ് നാറ്റോയുടെ ഉത്തരവാദിത്വമെന്നും നാറ്റോ തലവന്‍ ജെന്‍ സ്റ്റോളന്‍ബെര്‍ഗ് പറഞ്ഞു.