മൂന്നാം ചര്‍ച്ചയില്‍ ഉപാധി കടുപ്പിച്ച് റഷ്യ.... മൂന്നാമത്തെ വെടിനിറുത്തലില്‍ യുക്രെയിന്‍ പൗരന്മാര്‍ക്ക് രക്ഷപ്പെടാനുള്ള ഇടനാഴി റഷ്യയിലേക്ക് തുറന്നതും ആക്രമണം നിറുത്തിവയ്ക്കാതിരുന്നതും രക്ഷാദൗത്യം നടന്നില്ല...
മൂന്നാമത്തെ വെടിനിറുത്തലില്‍ യുക്രെയിന്‍ പൗരന്മാര്‍ക്ക് രക്ഷപ്പെടാനുള്ള ഇടനാഴി റഷ്യയിലേക്ക് തുറന്നതും ആക്രമണം നിറുത്തിവയ്ക്കാതിരുന്നതും രക്ഷാദൗത്യം വീണ്ടും അസാധ്യമാക്കി.
തലസ്ഥാനമായ കീവിന് പടിഞ്ഞാറ് ജനവാസമേഖലവരെ റഷ്യന്‍ ടാങ്കുകള്‍ എത്തി. കീവിന് പുറത്ത് ശക്തമായ ഏറ്റുമുട്ടല്‍ നടക്കുകയാണ്. ജനവാസ കേന്ദ്രത്തിലെ ആക്രമണത്തില്‍ രണ്ടു കുട്ടികള്‍ അടക്കം എട്ടുപേര്‍ മരിച്ചു. മിക്കോലായീവ് വിമാനത്താവളം തിരിച്ചുപിടിച്ചെന്ന് യുക്രെയിന്‍ അറിയിച്ചു.ഇതുവരെ 11,000 റഷ്യന്‍ സൈനികരെ വധിച്ചെന്നാണ് യുക്രെയിനിന്റെ അവകാശവാദം.മരിച്ച സിവിലിയന്മാര്‍ 406 എന്ന് യു.എന്‍.
സുമിയില്‍ കുടുങ്ങിയ മലയാളികള്‍ അടക്കമുള്ള ഇന്ത്യന്‍ വിദ്യാര്‍ത്ഥികള്‍ വെടിനിറുത്തല്‍ അറിഞ്ഞ് ഇന്ത്യന്‍ എംബസിയുടെ നിര്‍ദ്ദേശ പ്രകാരം നാലു ബസുകളില്‍ റഷ്യന്‍ അതിര്‍ത്തിയിലേക്ക് പുറപ്പെടാന്‍ ഒരുങ്ങിയെങ്കിലും വഴിയില്‍ സ്‌ഫോടനം നടന്നതായി അറിഞ്ഞ് യാത്ര ഉപേക്ഷിച്ചു.
12 ദിവസമായി ആക്രമണം തുടരുന്ന റഷ്യ, ഇന്നലെ പ്രഖ്യാപിച്ച വെടിനിറുത്തലില്‍ വിദേശികള്‍ അടക്കമുള്ളവരെ ഒഴിപ്പിക്കാന്‍ റഷ്യയിലേക്കും ബെലാറൂസിലേക്കുമുള്ള ഇടനാഴികള്‍ കൂടി ഉള്‍പ്പെടുത്തിയതാണ് യുക്രെയിനെ ചൊടിപ്പിച്ചത്.
ആക്രമണത്തിന് ഒത്താശ ചെയ്തുകൊടുക്കുന്ന ബെലാറൂസിന്റെ ഭാഗമായ ഗോമലിയിലേക്കാണ് കീവില്‍ നിന്നുള്ള ഇടനാഴി നിര്‍ദ്ദേശിച്ചത്. ഖാര്‍കീവില്‍ നിന്നുള്ള ഏക ഇടനാഴി റഷ്യയിലേക്കായിരുന്നു. സുമിയില്‍ നിന്നും മരിയൂപോളില്‍നിന്നും രണ്ടു പാതകള്‍ വീതം നിര്‍ദ്ദേശിച്ചെങ്കിലും ഓരോ പാതകള്‍ റഷ്യയിലേക്കാണ്. അവിടെനിന്ന് ലക്ഷ്യ സ്ഥാനങ്ങളിലേക്ക് പോകാമെന്നായിരുന്നു റഷ്യയുടെ നിര്‍ദ്ദേശം.
സ്വന്തം പൗരന്മാരെ ശത്രുവിന്റെ പ്രദേശങ്ങളിലേക്ക് കൊണ്ടുപോകുന്നത് അധാര്‍മികമെന്ന നിലപാടിലാണ് യുക്രെയിന്‍.റഷ്യന്‍ സേന വളഞ്ഞുനില്‍ക്കുന്ന മരിയൂപോള്‍, ശക്തമായ പോരാട്ടം നടക്കുന്ന ഖാര്‍കീവ്, മലയാളികള്‍ അടക്കം എഴുന്നൂറിലേറെപ്പേര്‍ കുടുങ്ങിക്കിടങ്ങുന്ന സുമി, ശക്തമായ ഷെല്ലാക്രമണം തുടരുന്ന തലസ്ഥാനമായ കീവ് എന്നിവിടങ്ങളില്‍ നിന്ന് പൊതുജനങ്ങള്‍ക്ക് ഒഴിഞ്ഞു പോകാനാണ് റഷ്യ ആറ് ഇടനാഴികള്‍ നിര്‍ദ്ദേശിച്ചത്.
ഇരുരാജ്യങ്ങളും രൂപരേഖ തയ്യാറാക്കി സാഹചര്യം ഒരുക്കാത്തതിനാലാണ് മൂന്നുതവണയും വെടിനിറുത്തല്‍ പ്രയോജനപ്പെടാതെപ്പോയതെന്ന് റെഡ്‌ക്രോസ് വ്യക്തമാക്കി.മൂന്നാം ചര്‍ച്ചയില്‍ ഉപാധി കടുപ്പിച്ച് റഷ്യ ഇന്ത്യന്‍ സമയം ഇന്നലെ രാത്രി ഏഴരയ്ക്ക് യുക്രെയിന്‍ മൂന്നാം വട്ടസമാധാന ചര്‍ച്ച തുടങ്ങി.
ക്രൈമിയ റഷ്യന്‍ പ്രദേശമായി അംഗീകരിക്കുക. ഡൊണെസ്‌കും ലുഹാന്‍സ്‌കും സ്വതന്ത്ര രാഷ്ട്രങ്ങളായി അംഗീകരിക്കുക. യുക്രെയിന്റെ ഭരണഘടന ഭേദഗതി ചെയ്ത് നാറ്റോ പോലുള്ള സൈനിക സഖ്യങ്ങളില്‍ ഏര്‍പ്പെടില്ലെന്ന് ഉറപ്പുവരുത്തുക. ഇവയാണ് റഷ്യയുടെ ഉപാധികള്‍. രണ്ടു ചര്‍ച്ച നടന്ന ബെലറൂസാണ് ഇന്നലത്തെ വേദിയെന്നാണ് സൂചന.
https://www.facebook.com/Malayalivartha
