വീണ്ടും യുദ്ധം ശക്തമാകുകയാണ്.യുക്രെയ്ന്‍ ചെറുത്ത് നില്‍പ് ശക്തമാക്കിയതോടെ തന്ത്രങ്ങള്‍ മാറ്റി ആക്രമണം കൂടുതല്‍ കടുപ്പിച്ച്‌ റഷ്യ. തലസ്ഥാനമായ കിയവിനു ചുറ്റും ആക്രമണം ശക്തമാക്കി. വടക്കുപടിഞ്ഞാറന്‍ മേഖലകളില്‍ രൂക്ഷപോരാട്ടമാണ് നടക്കുന്നത്.

കിയവില്‍നിന്ന് 25 കിലോമീറ്റര്‍ അകലെ റഷ്യന്‍ സൈന്യം നിലയുറപ്പിച്ചു. ഖാര്‍കിവ്, ചെര്‍ണീവ്, സുമി, മരിയുപോള്‍ നഗരങ്ങളും റഷ്യന്‍ സൈന്യം വളഞ്ഞു. കിഴക്കന്‍ മേഖലയിലെ ഡ്നിപ്രോ, പടിഞ്ഞാറുള്ള ലുട്സ്ക്, ഇവാനോ -ഫ്രാന്‍കിവ്സ്ക് നഗരങ്ങളിലും വ്യോമാക്രമണം തുടരുകയാണ്. കിയവിലെ വാസില്‍കിവ് നഗരത്തിന് സമീപത്തെ വ്യോമതാവളവും ആയുധസംഭരണകേന്ദ്രവും റഷ്യയുടെ റോക്കറ്റാക്രമണത്തില്‍ തകര്‍ന്നതായി മേയര്‍ നതാലിയ ബലാസിനോവിച് അറിയിച്ചു. ശനിയാഴ്ച രാവിലെയാണ് റോക്കറ്റാക്രമണം നടന്നത്.

തുറമുഖ നഗരമായ മരിയുപോളില്‍ തുര്‍ക്കി പൗരന്മാരടക്കം 80ലേറെ ആളുകളുടെ അഭയകേന്ദ്രമായിരുന്ന പള്ളി റഷ്യ ഷെല്ലാക്രമണത്തില്‍ തകര്‍ത്തു. ആക്രമണത്തില്‍ എത്രപേര്‍ മരിച്ചുവെന്നത് വ്യക്തമല്ല. ഒരാഴ്ചയായി റഷ്യന്‍ സൈന്യത്തിന്റെ ഉപരോധത്തിലാണ് മരിയുപോള്‍. ഇവിടെ കനത്ത ആക്രമണമാണ് നടക്കുന്നത്. വെള്ളവും ഭക്ഷണവുമില്ലാതെ തണുപ്പ് അതിജീവിക്കാന്‍ സംവിധാനമില്ലാതെ നിരാശരായ ജനക്കൂട്ടമാണ് മരിയുപോളിലുള്ളതെന്ന് ഡോക്ടേഴ്സ് വിത്തൗട്ട് ബോര്‍ഡേഴ്സ് വെളിപ്പെടുത്തി. റഷ്യ ആക്രമണം കടുപ്പിച്ചതോടെ മരിയുപോളില്‍ നിന്ന് ഒഴിപ്പിക്കലും നടക്കുന്നില്ല.