ഒറ്റ ദിവസം കൊണ്ട് ശ്രീലങ്കയില്‍ പെട്രോളിന് 77 രൂപയും ഡീസലിന് 55 രൂപയും വര്‍ദ്ധിച്ചു. സര്‍ക്കാരിന്റെ എണ്ണക്കമ്ബനിയായ സിലോണ്‍ പെട്രോളിയമാണ് വില വര്‍ദ്ധിപ്പിച്ചത്. ഇന്ത്യന്‍ ഓയില്‍ കോര്‍പ്പറേഷന്റെ ഉപവിഭാഗമായ ലങ്ക ഐ ഒ സി ലങ്കയിലെ പ്രധാന എണ്ണ വിതരണ കമ്ബനിയാണ്. ഐ ഒ സിയും വില കൂട്ടിയതോടെ ശ്രീലങ്കയില്‍ എണ്ണ വില ഉയരുകയായിരുന്നു. ശ്രീലങ്കന്‍ വില അനുസരിച്ച്‌ പെട്രോളിന് 75 രൂപയും ഡീസലിന് 50 രൂപയുമാണ് ഐ ഒ സി വില വര്‍ദ്ധിപ്പിച്ചത്. ഇതിന് പിന്നാലെ സിലോണ്‍ പെട്രോളിയം കോര്‍പ്പറേഷന്‍ പെട്രോളിന് 43.5 ശതമാനവും ഡീസലിന് 45.5 ശതമാനവും വില കൂട്ടി. ശ്രീലങ്കയില്‍ ശ്രീലങ്കന്‍ രൂപ അനുസരിച്ച്‌ പെട്രോളിന് ലിറ്ററിന് 254 രൂപയും ഡീസലിന് 176 രൂപയുമാണ് ഇന്നത്തെ വില.

അതേസമയം, ഇന്ത്യയില്‍ പെട്രോള്‍ വില 25 രൂപ വരെ ഉയര്‍ന്നേക്കുമെന്നാണ് വിലയിരുത്തല്‍. റഷ്യയില്‍ നിന്നുള്ള എണ്ണ വിതരണത്തിന് യൂറോപ്യന്‍ രാജ്യങ്ങള്‍ ഉപരോധം ഏര്‍പ്പെടുത്തുമെന്ന വാര്‍ത്തകള്‍ക്ക് പിന്നാലെ ക്രൂഡ് ഓയില്‍ വില ഉയര്‍ന്നിരുന്നു. ഇതോടെ നൂറിലേറ ദിവസമായി ഇന്ത്യയില്‍ മാറ്റമില്ലാതെ തുടരുന്ന പെട്രോള്‍ ഡീസല്‍ വിലയിലും വര്‍ദ്ധനവുണ്ടാകുമെന്നാണ് റിപ്പോര്‍ട്ടുകള്‍. കഴിഞ്ഞ വര്‍ഷം നവംബര്‍ നാലിനാണ് അവസാനമായി ഇന്ധന വില ഉയര്‍ന്നത്.