യുക്രെയ്‌നെ  ആക്രമിച്ചു മുന്നേറുന്ന റഷ്യ, കരിങ്കടല്‍ഭാഗത്തെ നിയന്ത്രണം ഏറ്റെടുത്തു. കരിങ്കടല്‍ തീരത്തിന്റെ നിയന്ത്രണം റഷ്യന്‍ നാവികസേന പൂര്‍ണമായും പിടിച്ചെടുത്തതായി ബ്രിട്ടീഷ് പ്രതിരോധ മന്ത്രാലയം അറിയിച്ചു. കടല്‍മാര്‍ഗമുള്ള വ്യാപാരങ്ങളുടെ നിയന്ത്രണവും റഷ്യ ഏറ്റെടുത്തതായി ബ്രിട്ടന്‍ സ്ഥിരീകരിച്ചു. ഇതോടെ യുെ്രെകന്റെ കടല്‍ വഴിയുള്ള അന്താരാഷ്ട്രവ്യാപാരം നിലച്ചു. രാജ്യത്തെ കയറ്റുമതിയുടെ 70 ശതമാനവും കടല്‍മാര്‍ഗമാണ്.


യുദ്ധത്തിന്റെ പത്തൊമ്പതാം ദിവസവും കീവിനുനേരെ ശക്തമായ ആക്രമണം തുടരുന്നു. പടിഞ്ഞാറന്‍ നഗരമായ റിവ്‌നിയില്‍ ടെലിവിഷന്‍ ടവറിനുനേരെയുണ്ടായ ആക്രമണത്തില്‍ ഒമ്പതുപേര്‍ കൊല്ലപ്പെട്ടതായി അധികൃതര്‍ അറിയിച്ചു.

കീവിലെ ഒബൊലോണ്‍ ജില്ലയില്‍ ഒമ്പതുനില പാര്‍പ്പിടസമുച്ചയം റഷ്യ തകര്‍ത്തു. ഇവിടെ രണ്ടുപേര്‍ കൊല്ലപ്പെട്ടു. ഒട്ടേറെ പേര്‍ക്ക് പരിക്കേറ്റു. കീവില്‍ 20 ലക്ഷംപേര്‍ ഇപ്പോഴും തുടരുന്നുണ്ടെന്നാണ് കണക്ക്.

നഗരത്തിന് 11 കിലോമീറ്റര്‍ അകലെ ഹോസ്‌റ്റൊമല്‍ വ്യോമതാവളത്തിലും വ്യോമാക്രമണമുണ്ടായി. ഹാര്‍കിവില്‍ ബോംബാക്രമണത്തില്‍ രണ്ടുപേര്‍ കൊല്ലപ്പെട്ടതായും റിപ്പോര്‍ട്ടുണ്ട്.

റഷ്യന്‍ വിമതരുടെ നിയന്ത്രണത്തിലുള്ള ഡൊണെറ്റ്‌സ്‌ക് മേഖലയില്‍ യുെ്രെകന്‍സേന നടത്തിയ മിസൈലാക്രമണത്തില്‍ 23 പേര്‍ കൊല്ലപ്പെട്ടതായി റഷ്യ ആരോപിച്ചു.