രാജ്യത്ത് പ്രവേശിക്കരുത്; അമേരിക്കന് പ്രസിഡന്റ് ജോ ബൈഡനും കാനഡ പ്രധാനമന്ത്രി ജസ്റ്റിസ് ട്രൂഡോ ഉള്പ്പെടെ 13 പേര്ക്ക് വിലക്ക് ഏര്പ്പെടുത്തി റഷ്യ
അമേരിക്കന് പ്രസിഡന്റ് ജോ ബൈഡന്, സ്റ്റേറ്റ് സെക്രട്ടറി ആന്റണി ബ്ലിങ്കന്, കാനഡ പ്രധാനമന്ത്രി ജസ്റ്റിസ് ട്രൂഡോ ഉള്പ്പെടെ 13 പേര്ക്ക് വിലക്ക് ഏര്പ്പെടുത്തി റഷ്യ. രാജ്യത്തേയ്ക്ക് പ്രവേശിക്കുന്നതിനാണ് വിലക്ക് ഏര്പ്പെടുത്തിയിരിക്കുന്നത്. റഷ്യയിലേക്ക് പ്രവേശിക്കുന്നതില് നിന്നും തടയുന്ന സ്റ്റോപ്പ് ലിസ്റ്റില് ഇവരെ ഉള്പ്പെടുത്തിയതായി റഷ്യ അറിയിച്ചു.
അമേരിക്കയുടെ പ്രതിരോധ സെക്രട്ടറി ലോയ്ഡ് ഓസ്റ്റിന്, സിഐഎ മേധാവി വില്യം ബേണ്സ്, ദേശീയ സുരക്ഷാ ഉപദേഷ്ടാവ് ജെയ്ക് സള്ളിവന് മുന് സ്റ്റേറ്റ് സെക്രട്ടറി ഹിലരി ക്ലിന്റണ് എന്നിവരും വിലക്കേര്പ്പെടുത്തിയവരുടെ ലിസ്റ്റില് ഉള്പ്പെടുന്നു. റഷ്യന് ഉദ്യോഗസ്ഥര്ക്കും ഉത്പന്നങ്ങള്ക്കും ഉപരോധം ഏര്പ്പെടുത്തിക്കൊണ്ടുള്ള നടപടിയ്ക്ക് പകരമാണ് വിലക്ക് ഏര്പ്പെടുത്തിയത്.
യുക്രെയ്ന് യുദ്ധം ആരംഭിച്ചപ്പോള് മുതല് അന്താരാഷ്ട്ര തലത്തില് റഷ്യയ്ക്കെതിരെ ഉപരോധം ഏര്പ്പെടുത്താന് യുഎസും യുകെയും ഉള്പ്പെടെയുളള രാജ്യങ്ങള് നീക്കം തുടങ്ങിയിരുന്നു. റഷ്യന് വിമാനങ്ങള്ക്ക് പോലും ഈ രാജ്യങ്ങള് വിലക്കേര്പ്പെടുത്തിയിരിക്കുകയാണ്. റഷ്യന് ബാങ്കുകളെ സ്വിഫ്റ്റില് നിന്നും യൂറോപ്യന് യൂണിയന് ഒഴിവാക്കുകയും ചെയ്തു.
യുക്രെയ്നില് ഇപ്പോഴും റഷ്യയുടെ ആക്രമണം തുടരുകയാണ്. റഷ്യയുടെ ഷെല്ലാക്രമണം രൂക്ഷമായതോടെ കീവില് 35 മണിക്കൂര് കര്ഫ്യൂ ഏര്പ്പെടുത്തിയിട്ടുണ്ട്. ചൊവ്വാഴ്ച രാത്രി എട്ട് മണി മുതല് വ്യാഴാഴ്ച രാവിലെ ഏഴ് മണിവെയായിരിക്കും കര്ഫ്യൂ എന്ന് മേയര് വിറ്റാലി ക്ലിറ്റ്ഷ്കോ അറിയിച്ചു. ഷെല്റ്ററുകളിലേക്കും ബങ്കറുകളിലേക്കും പോകുന്നതൊഴിച്ച് മറ്റെല്ലാ യാത്രകളും തടഞ്ഞിട്ടുണ്ട്.
അതേസമയം ഫെബ്രുവരി 24ന് യുക്രെയ്നില് റഷ്യന് അധിനിവേശം ആരംഭിച്ചത് മുതല് ദശലക്ഷക്കണക്കിന് ആളുകളാണ് സ്വന്തം വീടും നാടും വിട്ടൊഴിഞ്ഞ് അഭയാര്ത്ഥികളായി മാറുന്നത്. ഇതുസംബന്ധിച്ച കണക്ക് ഐക്യരാഷ്ട്ര സഭ പുറത്തുവിട്ടിരുന്നു. യുക്രെയ്ന് സംഘര്ഷാവസ്ഥയില് ഓരോ സെക്കന്ഡിലും ഒരു കുട്ടി വീതം യുക്രെയ്നില് അഭയാര്ത്ഥിയായി മാറുന്നുവെന്നാണ് യുഎന് വക്താവ് പറഞ്ഞത്.
https://www.facebook.com/Malayalivartha
